Zekaria 9

1Na'ayenɛ yelehom bona wa yeti baha la Hadrak teŋa zuo, bo mam wan sige Damaskus teŋa zuo. Aram teŋa, la Israel buuri la zan'an dela Na'ayenɛ denɛ, 2la Hamat teŋa n beene la Tire, la Sidon teŋhe la n de yamdoma la zan'an. 3Tire teŋa mɛ la zen'kanra bo a mɛŋa, te sanlenpeela buge en wo sɔgɔrɔ la, te sanlema me gan'an en yoo wa sore zuo sɔgɔrɔ la. 4Ge nananawa, to Daana wan yɛɛ a na'am la, kpilom a tarega la bahɛ ko'kantɛ poan, ge te bugum taɛ en. 5Askelon teŋa wan nyɛ bala, te dabeem kɛn' en. Gaza me wan nyɛ bala te a suunre sagom, la wan daam Ekron teŋa me. Se'ere n sɔe la, a potɛn'ɛrɛ n boe zen'an n bala. Gaza teŋa naba wan mɛlom, te ba zɔ yeregɛ ge bahɛ Askelon teŋa me. 6Nɛre genrema wan tee to'e Asdod teŋa, te Pilistidoma pa'ale mea la ma'ɛn. 7N wan bahɛ te ba ogɛ ziim sebo te ba di la, ba nɔɔrɛn na, ge kperom ganleŋɔ dia la ba nyɛna poan bahɛ na. Kaŋa me wan dɛna Yenɛ nɛreba sɛba n yee fiin la. Ka wan ana wo yizuo la Yuda teŋa poan, te Ekron ana wo Yebus teŋadoma la. 8N wan bɔna n yire la poan gura dɛ, te se'em kan ta'an kɛn' de poan na, ge yehe n bote se'em. Se'em n wan muke ba, kan le nyɛ sore nɛ ba bala le yɛ'ɛha tole. Se'ere n sɔe la, mam mɛŋa nini nyɛte sɛla n ete. 9Nyeena Zion teŋa wa, Yerusalem, vɔɔla mɛ la popeelom. Behɛ, ho naba la n bala yɛ'a ho zen'an na la, faanra la, la yelemɛŋɛrɛdaana n bala, enŋa n bala sigehe a mɛŋa yaga boŋbila zuo la. 10N wan wan gu' yiri toroto la n daane Epraim teŋa la, ge dige zaba yiri, Yerusalem poan bahɛ, ge gu pɛɛntɛɛnrɛ. A wan bahɛ te sunma'ahom bɔna teŋa la zuo. A kpe'eŋo la wan ze'ele ko'kantɛ deyema yagehɛ ko'kantɛ deyema ha, ge ze'ele Euprates Kolaa nɔɔrɛ ta paɛ teŋa wa beene. 11Ge han dɛna hom, mam n deŋɛ dekɛ ziim biŋe nɔɔrɛ la ho la zuo, n wan fan' ho nɛresɛba n boe paka zen'enhe la poan la bahɛ. 12Hom se'em te ba pagɛ ge te ho kelom tara potɛn'ɛrɛ wa, nya lebe ho teŋkpe'eŋɔ la poan na, zina, mam yeti, N lebehe dekɛ sɛla woo la sugumnɔɔren boyi', bo ho. 13Mam ba' Yuda teŋa mɛ wo tanhɔ la, te Epraim dɛna pɛɛnɛ. N wan ihege Zion dayɔɔhe wa sunya, te ba dɛna so'a, zabɛ la hom Greek teŋa dayɔɔhe wa. 14Na'ayenɛ wan bɔna la ba, te a pɛɛnɛ la nyagera wo bugum la tɔla na. Daana Na'ayenɛ la wan peebe tentanɛ la. A wan bɔna sabeeo kantɛ la n ze'ele gɔbega bɔba na la poan, wa'ana. 15Pɛɛntɛɛnreba Na'ayenɛ la mɛŋa wan pin' a nɛreba la, te ba sagom, ge nɛ sɛba woo n tɛɛnre ba la biŋe teŋa. Ba so'ahe wan nyu' ba ziim wo daam la, nyu' perɛ wo laa n perɛ se'em la, te bo ɔkɛ gan'an wo kaanbegɔ daka loga poan te ziim ne gan'an bini se'em la. 16De daarɛ la, Na'ayenɛ la n de ba Yenɛ la, wan fan' ba bahɛ, se'ere zuo, ba dela a nɛreba, te ba bɔna a teŋa la poan nyagera wo sanlema muŋa n vuge a zuin la. 17Ba soŋa, la ba ninpeelom kan tara makerɛ. Boom ma'an wan bahɛ te bonbilipaalehe la perɛ, te daam paalom me bahɛ te pugunto iŋhe saalom.

will be added

X\