Zekaria 8

1Te Pɛɛntɛɛnreba Na'ayenɛ wa le tɔgɛ bo mam yeti, 2Pɛɛntɛɛnreba Na'ayenɛ la n yeti, Mam nyuune Yerusalem zuo mɛ, la nyuunre kantɛ, n nyuunɛ a zuo mɛ la sunsunyiim. 3Na'ayenɛ yeti, N wan lebe Zion poan na, la n bɔna Yerusalem teŋasoka. Ba wan yi'ira Yerusalem la Yelemɛŋɛrɛ Teŋa, te Pɛɛntɛɛnreba Na'ayenɛ zoore la mɛ yu'urɛ yi'ira Fa'a Zoore. 4Pɛɛntɛɛnreba Na'ayenɛ la n yeti, Yerusalem teŋa wa wan le tara boraa yan'ahe, la pɔgɔyan'ahe, te se zanla dɔya ɛɛra ka poan, korogɛ te se zuto pelege 5Bodibinto la pugunto wan le perɛ Yerusalem teŋa wa sɔrɔtɔ zuto me'en, dɛ'ɛna. 6Pɛɛntɛɛnreba Na'ayenɛ la n yeti, yele dena wa n kpe'em bo ya, la yan gee fiin wa la zuo, de wan kpe'em bo mam me yoi? Pɛɛntɛɛnreba Na'ayenɛ yele se'em n bala. 7Pɛɛntɛɛnreba Na'ayenɛ la yeti, N wan fan' n nɛreba wa nɛŋa, la pooren bɔba teŋhe wa nu'uhen bahɛ. 8N wan tare ba lebe na te ba bɔna Yerusalem teŋa wa poan. Ba wan dɛna mam nɛreba, te mam me dɛna birikina, la tontɔɔ Yenɛ bɔ'ɔra ba. 9Pɛɛntɛɛnreba Na'ayenɛ la yeti, Yamam sɛba n wom yelehom la dabeha wa nɔtɔgɔheba wa nɔyan la tare ya iŋkpeŋere, ba daa boe daanse'ere daarɛ te ba daa ɛɛnbɛ Pɛɛntɛɛnreba Na'ayenɛ Yire la mɛ. 10Saŋkaŋa ha la, yɔɔrɛ yuun ka boe bɔ'ɔra nɛra, bii duŋa. Nɛra yuun ka boe wan ɛɛra en bote se'em tona a tooma ya diŋdoma la zuo, mam mɛŋa n ŋmɛregɛ ya tugule taaba. 11Ge nananawa, n kan eŋɛ yamam sɛba n yee fiin la wo mam n yuun eŋɛ se'em la. Pɛɛntɛɛnreba Na'ayenɛ yele se'em n bala. 12Ya wan borɛ ya borehe yehe la sunma'ahom, tiihe wan wom, teŋa la wan maalɛ dia soŋa, saŋgbana wan ni saa soŋa, n wan bahɛ te nɛreba wa n gee fiin wa, nyɛ lɔgɔtona wa woo te ya sɔna. 13Yuda la Israel yire wa, wo yamam n de teŋhe wa bonkɛhela se'em la, n wan fan' ya, te ya sɔna ya mɛŋa. Da zote ya dabeem, tare ya iŋkpeŋere. 14Pɛɛntɛɛnreba Na'ayenɛ la yeti, wo ya yaabdoma n yuum nyiihe mam sunsunya te mam yuum maahom te n tara sagaŋɔ seko wa'an ba zuo na, kan zɔ' ba ninbɔn'ɔn la, 15bala mea te n maahom te n maahom saŋkana wa poan, te n tom som bo Yerusalem, la Yuda yire wa. Da zote ya dabeem. 16Yele se'a te ya wan eta dela, tɔgɔre ya yelemɛŋɛrɛ bɔ'ɔra taaba, ge gankera gankerɛ se'a n de yelemɛŋɛrɛ, tara sunma'ahom ya teŋa la zanɔya la poan. 17Da uge ya be'em ya sunya poan tara bɔ'ɔra taaba, bii ya nɔŋɛ ya pɔta yoo yoo. Se'ere n sɔe la yele ana woo dela sɛla te mam yaɛ. Na'ayenɛ yele se'em n bala. 18Te Pɛɛntɛɛnreba Na'ayenɛ la yelehom wa'an mam zen'an na yeti, 19Pɛɛntɛɛnreba Na'ayenɛ yeti, ya ŋmarehe senaahe la senuu la seyopɔe la pia poan nɔlorɛ la nya wan dɛna popeelom la nyeema de'eŋɔ Yuda yire wa. Bala zuo, ba nɔŋɛ yelemɛŋɛrɛ la sunma'ahom. 20Pɛɛntɛɛnreba Na'ayenɛ la yeti, nɛreba wan wa'ana, nɛresɛba n sɔe mam teŋhe wa. 21Teŋa kayema nɛreba, wan ihege ta yele n teŋa kayema doma yeti, Bahɛ ya te to ton lebe ta belom Na'ayenɛ la, to ta ɛ Pɛɛntɛɛnreba Na'ayenɛ la, mam mɛŋa ye' mɛ n bala. 22Nɛreba kekeko, la teŋkpɛ'ɛma wan wa'ana te ba ɛ Pɛɛntɛɛnreba Na'ayenɛ la, ge sɔnhɛ a ninbɔn'zɔrɛ Yerusalem teŋa wa poan. 23Pɛɛntɛɛnreba Na'ayenɛ la yeti, dabeha aŋa poan, boraahe pia wan yehe teŋa wa zuo buuri woo poan han nyɛ, Yuda teŋa nɛra, ba wan gin' a fuo vɛ'ɛra, ge yɛta en yeti, Bahɛ te to doohe ho keŋɛ ho teŋa, te wom te Yenɛ boe la ya ya teŋa la poan.

will be added

X\