Zekaria 7

1Naba Darius na'am dia yuuma anaahe poan, ŋmaresɛka n pa'ahere sewae' te ba yi'ira ka Kislev ŋmarega la, ka dabeha anaahe daarɛ te Na'ayenɛ yelehom wa'an Zekaria zen'an yeti, 2Betel teŋa nɛreba wa tom la Sarezer, la Aregem Melek la a nɛreba te ba wa'ana belom Na'ayenɛ te a zɔ ba ninbɔn'ɔn, 3te malemadoma la n boe Pɛɛntɛɛnreba Na'ayenɛ Yire la poan la, la a nɔtɔgɔheba, po'ohɛ yeti, to kelom kɛla, ka dita ŋmarehe senuu wa poan wo yuuma kekeko n tole ha te to pon eŋɛ se'em la? 4Te Pɛɛntɛɛnreba Na'ayenɛ la tɔgɛ bo mam yeti, 5Yele teŋa la nɛreba la zan'an, la malemadoma la yeti, Ya han lota ya nɔya, ge fabela ŋmarehe senuu wa poan, la ya yuuma pihiyopɔe la poan la, mam te ya daa lota bɔ'ɔra wa? 6Ge yan ne ta dita la, la yan ne ta nyuura la, ya ne ka dita ge nyuura bɔ'ɔra la ya mɛhe ma'an? 7Dagɛ yelehom bona mea te Na'ayenɛ yuun dekɛ doohe a nɔtɔgɔheba poan tɔgɛ saŋsɛka te Yerusalem yuum perɛ la nɛreba, ge panrɛ la lɔgɔrɔ, te teŋse'ehe woo n kae en la me ana bala mea, te Negev la zobibihe n lem nɛŋa poan me lagom perɛ la nɛreba la? 8Na'ayenɛ le tɔgɛ bo Zekaria yeti, 9Pɛɛntɛɛnreba Na'ayenɛ la yeti, gankera yɛla la yelemɛŋɛrɛ, tare ya taaba giinle, ge zote ya taaba ninbɔn'ɔn. 10Da muguhere ya pɔkɔɔnrɛ, keebega, saana, bii naha, ge me da uge be'em ya sunya poan tara bɔ'ɔra taaba. 11Mam yuum yele ba la bala te ba zagahɛ te ba kan kelehe, ge bire ba pɔya bahɛ mam na, ge le' ba toba, te ba pon da wom. 12Ba yuun kanbɛ la ba sunya te ba kan ta'an nana pa'alegɔ la yelehom sebo te Pɛɛntɛɛnreba Na'ayenɛ la dekɛ tom a Sea, doohe a nɔtɔgɔheba la poan na saŋkaŋa ha la. Bala te Pɛɛntɛɛnreba Na'ayenɛ wa suunre yuum nyie. 13Mam n ne yi ba, te ba kan kelehe se'em la, bala mea te bama me han yi, mam me kan kelehe. Pɛɛntɛɛnreba Na'ayenɛ n yele. 14Ge dekɛ sabeeo kantɛ yerege ba bahɛ teŋse'ehe te ba ka mina poan. Bala te ba teŋa la te ba bahɛ la lebege daboo, te nɛnɛra ka dɔla ka poan tɔla wa. Teŋsoŋa n bahɛ yoo.

will be added

X\