Zekaria 14

1Behɛ, Na'ayenɛ dabaherɛ la kene na, te ban zin'ire ho nɛŋan tɔnrɛ ban fan' ho lɔgɔseto la. 2N wan gan'ahɛ teŋhe wa woo te se zabɛ la Yerusalem, to'e teŋa la, fan' ka, ge zɛ ka poan pɔgɔhe, ge pɛnregɛ ka poan nɛreba loŋe teŋa, ge te sɛba n yee la bɔna bini. 3Te Na'ayenɛ nya zabɛ la teŋhe la wo n ne zabera se'em pɛɛntɛɛnre daarɛ la. 4Daanden daarɛ, a na'ma wan zɛ'a la Olive Zoore la n boe Yerusalem nɛŋan dapɔya ha la, te Olive Zoore la bɔkɛ boyi', lebehe dapɔya bɔba la nɛŋa bɔba ha, te bɔn'ɔn kantɛ gan'an teŋasoka te kayema tɔɔra zuɔ te kayema tɔɔra gɔbega. 5Ya wan doohe la mam nagerɛ la n yelege zoore la zɔ peɛn. Nagerɛ la gan' la bala ta paɛ Azel teŋa. Ya zɔ wo Yuda teŋa naba Uzia saŋa la te ya yuun zɔ se'em peɛn teŋmiiŋɔ la. Bilam te Na'ayenɛ mam Yenɛ la wan wa'ana, la sɛba woo n de a ma'an denɛ la. 6De daarɛ wontɛɛŋa kan nyagɛ, nɛɛhom kan bɔna, ge te la ana boo. 7De yeti de dɛna la dabaherɛ te yenɛ ka luta Na'ayenɛ ma'an n mi de beere yelegerɛ, bii yenɛ lua kan bɔna, zanɔɔrɛ saŋa, nɛɛhom wan bɔna. 8Daanden daarɛ, vom ko'om wan ze'ele Yerusalem teŋa poan uura na, bosebo wan aan zɔta yɛ'a dapɔya bɔba mɔga la poan, te bosebo me aan zɔta yɛ'a zanɔya bɔba mɔga la me poan. Oonɛ, la seɔn zan'an bo zote la bala. 9Na'ayenɛ n wan ta dɛna teŋa wa zuo zan'an naba. Daanden daarɛ teŋa wa wan tara la Na'ayenɛ deyena, yu'urɛ de ma'an. 10Teŋa la zan'an, ze'ele Geba ta paɛ Arimon n boe Yerusalem gɔbega bɔba la zan'an wan dɛ'a la paberɛ gan'an. Ge Yerusalem wan dɛna la teŋsoŋa, ze'ele Benyamin Nayahe nɔɔrɛn ta paara a nayahe la n yuun pon bɔna zen'an la, ta paara nayaŋa sɛka n boe sɛnka poan la, ze'ele bilam ta paara Hananel dewoko la, ta paɛ naba daam ŋmɛkerɛ zen'an la. 11Nɛreba wan kɛn'ɛra ka poan te, sagaŋɔ kan le malom paɛ ka na, Yerusalem teŋa nya wan bɔna fai, te daaŋɔ kana. 12Namehe seko te Na'ayenɛ wan dekɛ namehɛ teŋse'ehe n zabɛ la Yerusalem teŋa la n dela ba iŋgana wan pon'ɛn, ge te ba nan vɔna, te ba nimbeele pon'ɛn ba nini poan ha, te ba zɛlehe pon'ɛn ba nɔɔrɛn. 13De daarɛ, Na'ayenɛ wan dekɛ tookantɛ bahɛ ba zuo na, te boraa woo wan gin' ka tadaana nu'o te ba zabɛ la taaba. 14Yuda teŋa wan zabɛ la Yerusalem teŋa, to'ohe teŋse'ehe woo n lɛm la lɔrɔgɔ zan'an, ba sanlema la, sanlenpeela, la ba futo kekeko. 15Namehegɔ koŋɔ mea n sige ba yiri la ba yiribonhe la ba yogoma la ba bonhe la ba duŋse'ehe woo te ba tara la zuo na. 16Te sɛba woo n peɛn teŋse'ehe woo n lagahɛ na zabɛ la Yerusalem la poan, wan kena Yerusalem teŋa na yuunɛ woo te ba po'ohɛ naba la n de Pɛɛntɛɛnreba Na'ayenɛ la, ge me de'em Pagahe Tin'a De'eŋɔ la. 17Teŋa wa zuo, buuri se'ere han ka keŋɛ Yerusalem ta po'ohɛ naba la n de Pɛɛntɛɛnreba Na'ayenɛ la, saa kan ni ba teŋa la poan. 18Mizraim teŋa nɛreba han ka keŋɛ ta dekɛ ba mɛŋa pa'alɛ, Na'ayenɛ wan dekɛ too seko te a dekɛ kɛn'ɛhɛ teŋse'ehe n ka de'ene Pagahe Tin'a De'eŋɔ la kɛn'ɛhɛ bama me. 19Namehe seko n wan sige Mizraim teŋa, la teŋse'ehe woo n ka kene dɛ'ɛna Pagahe Tin'a De'eŋɔ la n bala. 20Daanden daarɛ, la wan golehɛ eŋɛ yiri loma la poan te, Na'ayenɛ Toolom Denɛ. Te dogorɔ la n boe Na'ayenɛ Yire la poan la, wan dɛna fa'a wo laahe se'ehe la n ze' lɛm kaanbegɔ daka la, 21te dokɔ woo n boe Yerusalem, la Yuda teŋa, dɛna toolom lɔkɔ bo Pɛɛntɛɛnreba Na'ayenɛ la, te hom se'em woo n wa'ana te ho kaanbɛ, wan ta'an to'e dokɔ woo dogɛ ho nɛnɔ la te ho kaanbɛ la. De daarɛ kɔɔhereba kan le bɔna Pɛɛntɛɛnreba Na'ayenɛ yire la poan.

will be added

X\