Zekaria 10

1Kɛ'ɛŋa saŋa, ne soke ya Na'ayenɛ n bahere te sabeeo tare saa kena na la, Na'ayenɛ n bahere te saa niira bahera yamam, la bonbula woo n boe samana zuto la, te ya bote la saa. 2Baga yelehom ka tare vɔnrɛ, te behereba me ka nyɛta yelemɛŋɛrɛ, te zaanhom zaanheneba me tɔgɔra ponpɔrɔŋɔ zaanheŋɔ yɛla, ge bɔ'ɔra kan'aŋɔ seko n ka tare sɛla. Bala n bahɛ te nɛreba la yeregɛ wo piihe la, ba namehe mɛ ban ka tare ugura la zuo. 3Mam suunre nyie mɛ la duŋkeema wa, n wan namehɛ mam nɛreba wa nɛŋadoma la. Mam Pɛɛntɛɛnreba Na'ayenɛ wa mɛŋa, wan behɛ n piihe la n de Yuda yire wa, ge eŋɛ ba te pa'ala ba nyanlena wo n zaba yiri la. 4Ɛnberɛ kugure la wan ze'ele la Yuda poan na, yire la wan ze'ele la enŋa poan na, paŋa zan'an, la nɛŋadaana woo wan ze'ele la enŋa poan na. 5Ba wan naɛ taaba wo pɛɛntɛɛnreba n boe pɛɛnbɔn'en la, nɛɛra dima la feta sore la tentɔnɔ poan, ba wan ze'ele zabɛ. Se'ere n sɔe la, Na'ayenɛ n boe la ba, ba wan diihe sɛba n yagɛ yiri zuo zabera la ba. 6N wam kpemehe Yuda yire wa, ge fan' Yosef yire wa bahɛ, ge tare ba lebena, n ninbɔn'zɔrɛ la zuo. Ba wan ana wo n pon ka tabelɛ zagahɛ ba mɛ la. Se'ere n sɔe la, mam Na'ayenɛ de ba Yenɛ. N wan wom ba. 7Epraimdoma wan kpe'em wo pɛɛntɛɛnreba la, nyeena wo ba nyu la daam la, te ba kɔma nyɛ, me nyeena, te ba sunya pɛngera Na'ayenɛ. 8N wan ne yebehɛ ba, kan'ahɛ ba kɛn' na. Se'ere n sɔe la, mam yɔ mɛ to'e ba. Ba me wan yi'ɛ wo ban yuun pon ana se'em la. 9La mam n pon yeregɛ ba bahɛ teŋhe poan la, ba wan bɔna teŋse'ehe n zaan ha poan, ge tɛnra mam yele. Ba wan uge ba kɔma bilam ha, tare ba lebe na. 10N wan tare ba Mizraim teŋa, ge kan'ahɛ ba Asiria teŋa poan lebena. N wan tare ba na kɛn'ɛhɛ Gilead, la Lebanon teŋa poan, te ba ta perɛ se, te fole ka bɔna. 11Ba wan doohe daaŋɔ n gan' wo ko'kantɛ la poan dooe na, ge ko'kantɛ la ko'mi'inhe la yee baanlam, te Nile ko'om la ku'e gan'an, te Asiria pa'ale mɛŋa la paɛ teŋa, te Mizraim na'am muŋa la yehe a poan. 12N wan bahɛ te n nɛreba wa kpe'em mam Na'ayenɛ poan, te ba wan kena mam yu'urɛ wa poan.

will be added

X\