Zekaria 1

1Darius na'am dia yuuma ayi' la poan, de ŋmarehe senii poan, te Na'ayenɛ dekɛ a yelehom doohe Ido dayɔa Berekia me dayɔa Zekaria la n de nɔtɔgɔha la poan yeti, 2Na'ayenɛ yuum eŋɛ la suunre la ya sɔyaabdoma. 3Bala, yele ba yeti, Pɛɛntɛɛnreba Na'ayenɛ la yeti, ŋmɛregɛ ya lebe n zen'an na, te n me lebe ya zen'an na. 4Da ane ya wo ya sɔyaabdoma la te mam nɔtɔgɔheba la yuun tɔgɔra bɔ'ɔra ba te ba ana se'em la. Pɛɛntɛɛnreba Na'ayenɛ la n yeti se'ere n wana, ŋmɛregɛ ya ya be'em sɔya la, la ya be'emtooma la poan lebe n zen'an na. Ge sɛla ka tɔkɛ ba tobai, bii ba kelehe mam. Na'ayenɛ yele se'em n bala. 5Ya sɔyaabdoma la, ba bɛɛ? Ge nɔtɔgɔheba la wan vɔna la wuuha yoi? 6Ge mam yelehom la, la mam malema la te mam bo n yamehe la nɔɔrɛ te ba tɔgɛ bɔ la, bo ka di ya sɔyaabdoma la? Bala te ba nya tee ba suunre, ge yeti, Yelemɛŋɛrɛ, Pɛɛntɛɛnreba Na'ayenɛ wa yɔ to la to sɔrɔtɔ la to etegɔ la n nare yɔ se'ere, wo n pon maahom te a eŋɛ dɛ se'em la. 7Naba Darius na'am dia yuuma ayi' mea poan, ŋmarega pia la kayena poan, ŋmaresɛka te ba yi'ira ka Sebat ŋmarega la, ka dapihiyi' la anaahe daarɛ, te Na'ayenɛ dekɛ a yelehom le doohe a nɔtɔgɔha Zekaria wa poan, te a yeti, 8Yu'uŋɔ te Na'ayenɛ lilige sɛla pa'alɛ mam, te mam nyɛ te boraa ban' yeho mɔlɔgɔ! A ban' yeho wa naɛ zɛ'a mɛ la tuntuuro seto vɔntɔ n nyangera, te to tara puuro te to nyuŋo ana soŋa la, naherɛ poan ha. Te yiri mɔlɔ la yiri n de burima la yiri peela zɛ'a a pooren. 9Te mam yeti, N Daana, bana dela bem? Te Na'ayenɛ soŋora yele mam yeti, N wan pa'alɛ hɔ ban de sɛla. 10Te boraa sɛka n ze la tuntuuro wa lebehe na yeti, Na'ayenɛ n loe ba te ba kae teŋa wa behɛ. 11Te ba nya tɔgɛ bo Na'ayenɛ soŋora wa n de boraa la zɛ'a la tuntuuro la yeti, to ɛ kae, teŋa wa zuo dela sunma'ahom ma'an. 12Te Na'ayenɛ soŋora wa nya yeti, Pɛɛntɛɛnreba Na'ayenɛ wa, wane ma'an te ho bahɛ te sunma'ahom wa'an Yerusalem, la Yuda teŋhe te ho suunre nyie la ba yuun pihiyopɔe wa woo poan wa na? 13Te Na'ayenɛ lebehe zo'ohogɔ, la iŋkpeŋere yɛla bo Na'ayenɛ soŋora la n tɔgɔre la mam la. 14Bilam te Na'ayenɛ soŋora la n tɔgɔre la mam la yele mam yeti, mɔɔle yeti Pɛɛntɛɛnreba Na'ayenɛ yeti mam nini tɛnte Yerusalem la Zion zuo mɛ. 15Ge n suunre n nyiin mɛ la teŋse'ehe n ton tara sunma'ahom wa. Se'ere n sɔe la, mam sunsunya n nyie la Yerusalem fiin wa la, ge bama kɔ'ɔn doohe la bilam bahɛ te ba sagaŋɔ la yalegɛ nɔɔrɛ. 16Na'ayenɛ yeti, Bala zuo, n lebe Yerusalem zen'an mɛ na, la ninbɔn'zoolom. N wan mɛ' n yire Yerusalem poan. Pɛɛntɛɛnreba Na'ayenɛ yele se'em n bala. Mam teŋa wa wan malom mɛ le yɛ'ɛha. 17Mɔɔlɛ yele dena wa me pa'ahɛ yeti, Pɛɛntɛɛnreba Na'ayenɛ la yeti, mam teŋa wa wan le malom panrɛ mɛ gaŋɛ. Na'ayenɛ wa wan le bogolɛ Zion suunre ge kelom loe Yerusalem teŋa. 18Te mam gorege saazuo behe, nyɛ iila anaahe. 19Te mam soke Na'ayenɛ soŋora la n tɔgɔre la mam la yeti, Bana dela bem? Te a lebehe yele mam yeti, Iila ana n gbirige Yuda la Israel la Yerusalem teŋhe bahɛ la. 20Te Na'ayenɛ le lilige kuteba banaahe pa'alɛ mam. 21Mam soke, Ba ye'ehe na te ba eŋɛ la bene? Te a lebehe mam yeti, Iila ana wa wa'ana gbirige Yuda teŋa bahɛ mɛ, te nɛrezure da ta'an bɔna ka poan. Ge bana wa'ana te ba bahɛ te dabeem n kɛn' iila la ba wan wɔnrɛ teŋse'ehe woo n dekɛ se iila zabɛ la Yuda teŋa yeregɛ ka la bahɛ.

will be added

X\