Atiti 3

1Da bahɛ te ho nɛreba la tamɛ te ba sontii ba eta sɛla te zuodoma sɛba n sɔe teŋa la behera la yele te ba eta la. Ba nana ba ge me kɔ'ɔn bɔta la ba eta yelese'ere woo n ane soŋa. 2Yele ba te ba da tɔgɔra sɛla n ka an soŋa bɔ'ɔra nɛreba. Ge ba ton tara sunma'ahom la ba ge dɛna zɔtɔ la ba ge me eta sɛla n de na'ahegɔ etegɔ daarɛ woo bɔ'ɔra nɛra woo. 3Se'ere n sɔe la, tomam mɛhe me n daa nan ka sakɛ bo Yesu la, to daa ane me wo bama n an se'em la. To daa tone gɔɔntooma ge ka nana ge me daa ka dɔla yelemɛŋɛrɛ sore la. To daa dela yamehe bo yelese'a n ka an soŋa bo to gee me daa bɔta sɛla woo n ete to sunya nyɛlom yema yema. To daa boe be'em bɔŋa poan gee me daa bɔta sɛla n dagɛ to denɛ. Le yɛ'ɛha me to daa yaɛ nɛresɛba n daa yaɛ tɔ. 4Ge Na'ayenɛ se'em n de to faanra wa daa fan' tɔ bahɛ to yelebe'ero poan yɛhera la a etesoŋɔ la la a nɔŋerɛ la te a tara bɔ'ɔra nɛreba la. 5N daa fan' to bahɛ la daa dagɛ la tom mam mɛhe daa eŋɛ la sɛla n an soŋa zuo. Ge, la dela a mɛŋa n zote ninbɔn'ɔn bɔ'ɔra nɛreba la zuo te a fan' to bahɛ yɛhera Sea la tooma poan. A Sea la tooma la dela a duuhe la to yelebe'ero bahɛ ge te to ana wo ba malom dɔgɛ tomam mɛ ge te to dɛna nɛrepaalehe. 6Ge Yenɛ daa bahɛ te a Sea la daa bɔna la tɔ yɛhera la to Faanra Yesu Krista poan. 7A daa eŋɛ bala te a zo'ohogɔ zuo to wan dɛna tontɔɔdoma enŋa Yenɛ nɛŋa ge me wan tara vom sebo n ka tare ba'ahegɔ te to sakɛ to suunre poan gura la a zen'en. 8Dene poan, mam yele se'em wa dela yelemɛŋɛrɛ. Bala n bote ho dekɛ yetɔgɔbɔna wa mɛ la ninmɔ'ɔrɛ. Te bala te sɛba n nam Yenɛ la wan dekɛ dɛ te la dɛna ba toonɛ te ba kɔ'ɔn eta yelese'a n ane soŋa. Yele ana wa dela yelese'a n ane soŋa ge me soŋora nɛra woo. 9Yehe ho mɛŋa nɔkpe'enyooro poan bii ho nɔŋɛ ho tuura sɔyaabdoma yu'ura, bii ho gan'angera ge zabera yɛhera pa'alegɔ la yele. Bana wa dela yoo gee me ka tara vɔnrɛ. 10Nɛra se'em n bote a tare yelehego kena na, tɔgɛ la ninmɔ'ɔrɛ sugumnɔɔren boyi' bo en. Te a han sina gee kelom eta bala, da tara sɛla te ho eŋɛ la en yɛ'ɛha. 11Ho mɛŋa mi' te nɛra han ana bala, a dela se'em n de ŋmɛlema nɛra ge te a be'emtooma la me pa'alɛ te a ka ete sɛla n de yelemɛŋɛrɛ. 12Ge n han tom Artemas bii Tikikus ho zen'en na, hon me kpeŋe ho mɛŋa ge wa'an n zen'en Nikopolis teŋa na. Se'ere n sɔe la, n eŋɛ n potɛn'ɛrɛ te n bɔna la bini ɔɔrɔ dabeha la. 13Kpeŋe ho mɛŋa ge soŋɛ Zenas se'em n daa pon tabelɛ pa'ala Moses pa'alegɔ la la Apolos te ba keŋɛ ba kene mea. Soŋɛ ba te ba nyɛ' sɛla woo n sontii ba tara. 14La sontii to nɛreba zamehɛ tona toonsoma daarɛ woo. Bala te ba wan tara sɛla woo te ba bɔta. Han dagana bala, ba wan bɔna bɔŋsɛka n ka tare vɔnrɛ. 15Sɛba woo n boe la mam la po'ohere ho na. Po'ohɛ to zɔdoma sɛba n me lagom sakɛ bo Yesu wo tomam me n sakɛ se'em la bo to. Yenɛ zo'ohogɔ bɔna la ya zan'an.

will be added

X\