Atiti 2

1Ge la han dɛna hon, la dela ho pa'ala sɛla n de yelemɛŋɛrɛ pa'alegɔ. 2Pa'ala boraa se'ehe n de bonkɛgehe la te ba tara ba mɛhe soŋa soŋa gee bɔ'ɔra ba mɛhe na'ahegɔ gee me tara potɛn'sonɛ. Ba de'a sɛba n wan sɛ' ze'ele soŋa soŋa ba sakerɛ Yesu sore dɔlɔga la poan. Ba tara nɔŋerɛ ge me ŋmebera. 3Bala mea me, ho pa'alɛ pɔgɔse'ehe n de bonkɛgehe te ba bɔna wo pɔgɔse'ehe n boe bo Yenɛ ma'an n sontii ba bɔna se'em la. Ba da dɔla zuunra nɛreba nya'anzum bii de'a daamnyuureba. La dela ba pa'ala sɛla n an soŋa. 4Te dena wa n wan bahɛ te ba ta'an pa'alɛ pɔgɔbibihe la me woo te ba nɔŋɛ ba sereba la ba kɔma, 5ge dɛna sɛba n wan tara ba mɛhe soŋa soŋa ge kan eta sɛla n de dɛngerɔ, ge me wan dɛna pɔgɔsonhe ba sereba yiya poan nana ba. Etekona wa n wan ta'an bahɛ te nɛra se'em kan ta'an tɔgɛ sɛla n ka an soŋa yɛhera Yenɛ yetɔgom la. 6Dene mea le yɛ'ɛha, yele bodibinpaalehe la la ninmɔ'ɔrɛ te ba tara ba mɛhe soŋa soŋa. 7Ge hon mɛŋa me sontii ho eta sɛla woo n ane soŋa la ho pa'alɛ sɛba me te ba behɛ tɔgɔhe. De'a se'em n wan eta sɛla n de yelemɛŋɛrɛ ge me mɔ'ɛ nini ho pa'alegɔ la poan. 8Tɔgɔra yetɔgom sebo n ane soŋa te se'em kan ta'an yete ho tue ya. Te bala te vi' wan nyɔkɛ ho diŋdoma yɛhera ba kan nyɛ' sɔrɔɔ seko te ba wan ta'an tɔgɛ sɛla n ka an soŋa yɛhera to yɛla. 9Ge ya mɛhe sontii ba nana ba doma ge eta sɛla woo n wan eŋɛ ba doma la sunya nyɛlom. Te la ka sontii ba doma la ne tɔgɛ sɛla, 10te ba me tɔgɔra lebeha bii ba zuunra ba lɔgɔrɔ. Ge ba wan ton eta se'em dela la sontii ba eta sɛla n wan pa'alɛ te daarɛ woo ba dela nɛresoma ge me dɛna sɛba te ba wan ta'an nam. Te la wan bahɛ te nɛreba pɛngɛ Yenɛ se'em n de to Faanra la. 11Na'ayenɛ lilige a zo'ohogɔ la mɛ te nɛreba woo nyɛ faanrɛ. 12Zo'ohogɔ kona wa pa'alɛ to te to da bɔna wo nɛresɛba n ka sakɛ bo en n boe se'em la. Le yɛ'ɛha, to da bɔta a diŋdoma lɔgɔrɔ. La le pa'alɛ tɔ te to tara to mɛhe soŋa soŋa to bɔŋa poan ge me dɛna yelemɛŋɛrɛdoma ge bɔna bɔŋsɛka n an soŋa teŋa wa zuo wo nɛresɛba n sakɛ bo en la. 13To me gura ninmɔ'ɔrɛ dabaherɛ la te to sakɛ to sunya poan gura la. De daarɛ mea wan dɛna popeelom dabaherɛ. To Faanra Yesu Krista se'em n de Yenɛ gane zan'an wan nɛɛ na la pɛnka. 14A daa dekɛ a mɛŋa tihɛ mɛ te ba ko' en tomam zuo. A daa eŋɛ bala te a fan' to bahɛ mɛ to yelebe'ero poan ge bahɛ tɔ te to dɛ'a lagaŋyeŋɔ dɔla enŋa ma'an ge me kɔ'ɔn bɔta la to tona sɛla n ane soŋa. 15Dene poan, yele ana wa n de yelese'a te ho sona te ho pa'ala nɛreba. Soŋora nɛresɛba n kelehe ho yetɔgom la ge me kan'ana sɛba me n ka ete sɛla n an soŋa. Eta dena wa wo nɛra se'em n tare sore te a eta bala la. Da bahɛ te nɛra se'em behɛ ho yoo.

will be added

X\