Atiti 1

1Mam Paul se'em n de Yenɛ yameŋa gee me de'a Yesu Krista tontoneba la ayema la n golehɛ gɔŋɔ wa. Yenɛ daa loe mam mɛ, tom te n ta yele a nɛresɛba te a loe la yɛhera ba sakerɛ Yesu sore dɔlɔga la poan. La n me bahɛ ba te ba baŋɛ yelemɛŋɛrɛ la yɛhera Yenɛ yele. 2Sɛla n de ninmɔ'ɔrɛ yia te to tara vom sebo n ka tare ba'ahegɔ Yenɛ zen'en dela ton sakɛ sɛla to sunya poan gura la. Yenɛ se'em n dagɛ ponpɔrɔma la biŋe a nɔɔrɛ te a wan bahɛ te to tara vom wa. A daa eŋɛ dena wa mɛ gee daa baŋɛ naam teŋa wa zuo. 3Te lan daa ta paɛ daanse'ere daarɛ te a bɔta la, a daa bahɛ te nɛreba mina yele dena wa te nɛnɛra daa nan ka mina la yɛhera a yele. A me daa dekɛ yele la eŋɛ la mam nu'uhen. Te Yenɛ se'em n de to Faanra la n daa bo ɔ nɔɔrɛ te n mɔɔlɛ dɛ. 4N golehɛ gɔŋɔ wa bɔ'ɔra la hon Titus se'em n de yelemɛŋɛrɛ dayɔa te mam la hon lagom tara sakerɛ deyena Yesu sore dɔlɔga la poan la. To Sɔ Yenɛ la to Faanra Krista Yesu wan eŋɛ ho som gee bahɛ te ho tara sunma'ahom. 5Ge Titus, n daa bahɛ hɔ Krete teŋa te ho leen maale yelese'a n nare la soŋa soŋa. Ho me le doohe teŋhe la ho loohe nɛresɛba n bo lagaŋseto woo n dole Yesu sore la te bama de'a zuodoma. Tɛnra mam n bo ho nɔɔrɛ se'em yɛhera hon wan loe zuodoma la se'em la. 6Se'em n yete a de'a zuodaana sontii a da tara tuure. A sontii a tara pɔgɔyeŋɔ ma'an, gee te a kɔma me de'a sɛba n sakɛ bo Yesu, ge te nɛreba mina te a kɔma la dagɛ kɔmyaalehe, bii ba ka nana se'em. 7Te a daana n tone bɔ'ɔra Yenɛ la zuo, la ka sone te enŋa zuodaana la tara tuure. La ka sontii a zɛnkera a mea saazuo bii a suunre ihegera tɔtɔ tɔtɔ. A me ka sontii a de'a daambugura bii a bɔta zaba bii a de'a se'em n nyigere ligiri zuo. 8La sontii a de'a se'em n wan tɔ'ɔha saama soŋa soŋa gee me nɔŋɛ sɛla n an soŋa. La sontii a tara a mea soŋa soŋa gee me de'a tontɔɔdaana. A de'a se'em n wan bɔna bo Yenɛ ma'an gee me de'a se'em n bo'ore a mea na'ahegɔ. 9La sontii a gorɛ yelesoma la te nɛreba wan ta'an nam la wo ban pa'alɛ dɛ se'em la kaŋkaŋɛ. Bala, te a wan ta'an soŋɛ nɛreba te ba baŋɛ yelemɛŋɛrɛ pa'alegɔ la gee me bahɛ te nɛreba nyɛ' nɛresɛba n pa'ale sɛla n dagɛ yelemɛŋɛrɛ la tuure n de se'ere. 10Ge nɛreba kekeko dela sɛba n zaberɛ la ba zuodoma zo'e zo'e gee pan'aha nɛreba basɛba la yetɔgɔyooro. Nɛresɛba n ete dena wa dela nɛresɛba n dole Yudoma etegɔ la. 11La me nare te ho go'e ba te ba da tɔgɔra bala. Se'ere n sɔe la, pa'aleseko te ba pa'ala la, tare la daaŋɔ kena nɛreba la la ba yiredoma woo zen'en na. Ba ete be'emtooma ana wa la ligiri zuo. 12Ge la daa dela Krete teŋa mea nɛra se'em n de ba mɛhe nɔtɔgɔhadoma la ayema n daa yeti, Krete teŋa nɛreba parone mɛ daarɛ woo gee me eta sɛla n pon ka pa'ala te ba de nɛresaaleba. Ba me le de'a la ponya'andoma ma'an ka tona sɛsɛla. 13Nɔtɔgɔha la n yele se'em la dela yelemɛŋɛrɛ. Bala, la sontii ho kan'an ba soŋa soŋa. Te bala te ba wan sɛ' ze'ele soŋa soŋa ba sakerɛ Yesu sore dɔlɔga la poan. 14La me wan le kelom bahɛ ba te ba kan sakɛ bo Yudoma sɔlema la kihise'a te nɛresaaleba sɛba n zagahɛ yelemɛŋɛrɛ la yɛta te nɛreba eta la. 15Sɛla woo n ka tare dɛngerɔ ane soŋa bo sɛba n ka tare dɛngerɔ. Sɛla woo dela dɛngerɔ bo sɛba n ganlom ge ka nam la. Se'ere n sɔe la, ba ganlom mɛ ba tɛn'ɛhegɔ poan. 16Ba dekɛ ba mɛhe te bama mi' Yenɛ, ge ban ete se'em la pa'ale te ba ka mi' en. Yenɛ ka tare popeelom la ba. Ge ba me ka mi' Yenɛ. Te la dela dena wa n bahɛ ba te ba ka nara te ba eŋɛ sɛla n ane soŋa.

will be added

X\