Solomon Gɔŋɔ 6

1Ho zaba la keŋɛ la bɛ? Pɔgɔsɛka n som gana pɔgɔhe zan'an wa? A doohe la sɔrɔɔ kone te to doohe ɛ en? 2Mam zaba la sige la a samanɛ poan. A sige la nyuŋo soŋɔ puuro poan ha, te a ta gu' a piihe, ge go'ohe puuro. 3Mam dela a zaba la te enŋa me dɛna mam. A gu'ure a piihe la mɔpuuro poan. 4N zaba wa, ho som mɛ wo Tirza teŋa la, som wo Yerusalem, ana perebi wo pɛɛntɛɛnreba n zɛnkɛ ba danlehom zanla la. 5Ŋmɛregɛ ho nini wa n zen'an ge i kpegere mam mɛ. Ho zonto wa ana wo boohe n ze'ele Gilead zulugera na te se kɔnberɔ lɔbera se'em la. 6Ho nyɛna la pelege mɛ wo piihe te ba pee te se nan ze'ele kologan dɔɔra na la la. Ho nyɛna la ze' la sɛnpi wo leeba la, te deyena me ka bɔregɛ. 7Ho han vuge bɔbɔga ho sapɛgehe la muulom mɛ wo konɛ la. 8Naba pɔgɔba pihiyoobe, bii pɔgɔbɔ'ɔrenhe pihinii, bii pɔgɔsa'a kanha n ka tare kanlɛ han zɛ'a, 9ge mam dayene wa, mam soŋadaana wa boe la ho tɔka. Enŋa ma'an n de a ma bipugula. A ma nɔŋɛ en mɛ. Pɔgɔsa'ara nyɛ n mɛ yi'ira n te popeelomdaana, te naba pɔgɔba la pɔgɔbɔ'ɔrenhe pɛngera en. 10Ane n bala nɛɛ wo bolika belomŋma'arɛ wa, pelege wo ŋmarega, nyagera wo yentule, ana wana perebe wo ŋmarebibihe n boe saazuo wa? 11Mam sige la va'amen ha te n behɛ tan'ahe la, ge behɛ tiihe la n puuri se'em, ge behɛ tiwɔla tiihe n puuri bii *pomegranate la n tanhere? 12Ge mam ta baŋera la te mam yam bonɔ wa dekɛ mam ta yagelɛ la mam nɛreba nadoma yiri toroto zuo. 13Sulam buuri nɛra wa, lebe na, lebe na, lebe na te to behɛ hɔ. Wane te ya bɔta ya behɛ Sulam buuri nɛra wo nɛreba n de'ene te ya kae beha se'em la?

will be added

X\