Solomon Gɔŋɔ 4

1Mam yam bonɔ wa, ho som mɛ, ho som mɛ, te ho nini pelege wo tan'ama yile la, te ho zuo zonto lɔbere wo boohe n ze'ele Gilead zulugera na te se kɔnberɔ lɔbera se'em la. 2Ho nyɛna la pelege mɛ wo piihe te ba nan pee te se ze'ele kologan dɔɔra na la. Ho nyɛna la ze' la sɛnpi wo leeba la, deyena ka bɔregɛ. 3Ho nɔɔrɛ mɔ'ɛ loi ana soŋa. Ho han vuge bɔbɔga, ho sapɛgehe wa muulom mɛ saalom wo konɛ la. 4Ho nyugela ba' zɛ'a wo David pɛɛntɛɛnreba bɔŋa zen'an la, te ho nyugela nonɔm zɔnrɔgɔ la yula ka poan wo pɛɛntɛɛnreba logoro n yule ba'a zuo la. 5Ho bin'iha ayi' la ze' la yika wo walega kɔma n de leeba lagom ɔbera tuntuuro la. 6Han dagana beere n ta yelegɛ te sɛla woo nɛɛ, mam ye' la nyuŋo soŋɔ zoore wa zuo, mam ye' la digilom zoore wa zuo. 7Mam yam bonɔ wa, ho sɛla woo som mɛ, ho zen'an ka gbelege. 8N pɔgɔsaaŋa wa, doohe la mam Lebanon te to yehe, to wan doohe taaba yehe Lebanon teŋa wa. To keehe Amana zoore wa. To fɔnregɛ Senir zoore wa, Hermon zoore wa zuin, ge bahɛ gbegema wa. To fɔnregɛ yeobaahe wa zen'an. 9Mam tanya wa, mam pɔgɔsaaŋa wa, ho dekɛ la ho behega wa zun mam suunre. Ho zun mam suunre mɛ la ho nyugela banhe wa ma'an. 10Mam tanya wa, mam pɔgɔsaaŋa wa, ho nɔŋerɛ la tegɛ la mam nini. Ho nɔŋerɛ la zan'anhom gaŋɛ daam mɛ, te ho kaam nyuŋo la ana soŋa gana tiihe biila. 11Ho nɔɔrɛ zan'anhom gana seerom, te ho zɛleŋa yetɔgom ana wo seerom la iilom la, te ho futo nyuŋo ana wo Lebanon tisoma puuro nyuŋo la. 12Mam tanya wa, mam pɔgɔsaaŋa wa, ho ane wo samanɛ te ba beŋe de kae la. Ho ane wo bulega te ba pagɛ la. 13Ho ane mɛ wo samanɛ n perɛ la dia la kaam n tare nyuŋo soŋɔ la zinzira, 14la kaam se'a n tare nyuŋo soŋɔ, tiihe pɔgɔrɔ n de mɔgɔdɔɔnrɔ te ka mɔ'ɔra la kenkanyɛlegɔ la tiihe se'ehe n tare nyuŋo soŋɔ la *muur la tiihe seto woo n tare nyuŋo soŋɔ. 15Ho dela ko'niho n boe samanɛ te ba beŋe de kae. Ho dela bulega, ho dela Lebanon kolega n zote la ko'om somɔ. 16Ihege, zuɔ bɔba sabeeo wa, gɔbega bɔba sabeeo wa, lobe ya geele n samanɛ wa n beŋe kae wa, te ko nyuŋo wa yeregɛ zen'an woo. N zaba, kɛn' ho samanɛ wa te ba beŋe de kae wa poan na di ka wɔla soma wa.

will be added

X\