Solomon Gɔŋɔ 3

1Mam soŋɔ zuo yu'uŋɔ woo, mam tɛn'ɛhere la se'em te mam sea kɛn' wa yele ge ka nyɛta en. 2N wan ihege nananawa keŋɛ ta ɛ se'em te mam sea kɛn' wa teŋa poan. N wan ɛ en sɔya la zuto, la sɔnhega zen'enhe woo poan. Mam ɛ en la bala ge n ka nyɛ en. 3Sɛba n gure teŋa la n ta kaara teŋa la beha la, ba nyɛ mam mɛ te mam soke ba yeti, Ya nyɛ se'em te mam sea kɛn' la? 4Mam tole mɛ fiin wa, ge nyɛ en gin' en kaŋkaŋe ka sakɛ te a keŋɛ, ge tare en wa'ana n sɔ yire na, kɛn' n mɛŋa ma bɔ'en. 5Yerusalem pɔyɔɔhe wa, mam pɔte la walehe la ɛɛnrɔ wa te ya da sa'ɛ bii ya nɛɛ nɔŋerɛ. Gura te de saŋa ta paɛ. 6Bene n bala ze'ele pɔgɔtia ha ihegera na wo zun'uhe n gulugere wa? Boloŋom a mɛŋa la kaam n tare nyuŋo soŋɔ, ge puke a mɛŋa la leebedoma pɔɔra wa? 7Behɛ, Solomon n bala te ba ziira en a na'am koka zuo te pɛɛntɛɛnreba pihiyoobe n de Israel panhedoma kɔgɔra en la. 8Ba zan'an zanle la ba so'ahe, te ba pɛɛma ka luta teŋa. Ba woo maahom la ba so'ahe gura sɛla n wan eŋɛ yu'uŋɔ. 9Naba Solomon mɛŋa n maalɛ a na'am ziihiga la. A dekɛ la Lebanon teŋa dɔɔrɔ maalɛ, 10te ka dɔɔsaala la dɛna sanlenpeelega te ka yeŋa dɛna sanlema, te ka zin'ihere la dɛna piihe kɔnberɔ mɔlɔgɔ, te Yerusalem pugunto golɛ ka poan la gana soma te ka soŋa ka tara makerɛ. 11Zion pɔyɔɔhe wa, yehe ya na behɛ Naba Solomon n vuge muŋa sɛka wa, muŋa sɛka te a ma dekɛ vuge n a pɔgɔdire daarɛ la n de a suunre nyeeŋɔ daarɛ wa n gane dabeha woo wa.

will be added

X\