Arut 4

1Boaz n wa'ana paɛ teŋa poan nayaŋa la nɔɔrɛn na zin'ire la, te boraa sɛka n de ba yire poan te Boaz tɔgɛ ka yele te kaŋa n sone la. En bala yɛ'a tɔla, te Boaz yi ka yeti, Hom, wa'ana. Te ka paɛ na zin'ire. 2Te Boaz yi teŋa la poan kema pia na, yele ba yeti, Sɔnhega n boe. Te bama me zin'ire. 3Te a yele boraa kana la yeti, Naomi n ze'ele Moab teŋa lebe na la, a dekɛ la to sɔɔn Elimelek samanɛ te a tehɛ. 4Bala te mam tɛn'ɛhɛ yeti, N wan yele ho, te ho han wan yɔ ge to'e zen'an la, ho ze'ele nɛresɛba n zin' wa nɛŋan yɔ ge to'e zen'an la. Ho han kan le eŋɛ bala, yele mam te n behɛ mam n wan eŋɛ se'em. Se'ere n sɔe la, se'em ka boe dɛna yiren wa nɛra sona te a to'e zen'an la. Han dagana hom, nya tagela mam. Te boraa la me lebehe yeti, N wan yɔ ge to'e de. 5Te Boaz yele en yeti, Yi mina te daanse'ere daarɛ te ho yɛ'a te ho ta to'e samanɛ la Naomi zen'an la, ho wan di Arut la n de Moab teŋa pɔka te a sera ki la, te ke'ema la yu'urɛ la bɔna a samanɛ la poan, da saalom. 6Boaz n tɔgɛ wana ba'ahɛ la, te boraa la yeti, Aai, mam han yeti n to'e samanɛ la, n wan sagom n mɛŋa. Bala hom tee dekɛ n na'arɛ, yɔ ge to'e, ge mam kan nyaŋɛ. 7Bala ma'an ha la, ho han yeti ho yɔ to'e sɛla bahɛ bii ho tee sɛla ze'ele ho na'arɛ, se'em n yeti a tom toonɛ la n pirege tagatɛ tee bo se'em te a galehɛ la. Lan daa ane se'em Israel teŋa poan n bala. 8Bala, boraa kana la n yele Boaz yeti, Soe mam na'arɛ yɔ to'e tara la, a pirege la a tagatɛ bo Boaz. 9Boaz nya yele kema la nɛresɛba woo n boe bini la yeti, Zina, yamam n de seradoma zina te mam n da' sɛla woo n de Elimelek la Kilion la Malon denɛ, Naomi zen'an. 10N me to'e Malon pɔga Arut la n de Moab teŋa pɔka la, te a dɛna n pɔga. Te la de'a a sera la n ki la yu'urɛ da saalom a sɔ'ɔlom wa poan, ge me kelom pota a sɔɔnrɔ la zen'an, la a mɛŋa yire poan. Yamam n de seradoma zina wa. 11Te kema la sɛba woo n zin' zanɔɔren la zan'an yeti, Ɛɛn tomam n de seradoma. Na'ayenɛ bahɛ te pɔka wa n ye paara ho na wa, la eŋɛ wo n yuun eŋɛ Arakel la Lea se'em te ba yuun bahɛ te Israel buuri wi'ɛ se'em la. A bahɛ te ho kɔma zo'e Eprata teŋa poan, ho kanregɛ Betlehem teŋa poan. 12Na'ayenɛ bahɛ te kɔmsɛba n wan doohe pugula wa poan na la, bahɛ te ho yire ana wo Perez, se'em te Tamar yuun dɔgɛ bo Yuda la yire n yuun ane se'em la. 13Te Boaz nya di Arut, te ba baŋɛ taaba, te Na'ayenɛ bahɛ te a nyɔkɛ poorɛ, ta dɔgɛ bodibila. 14Te teŋa la pɔgɔhe yele Naomi yeti, Pɛnka dela Na'ayenɛ denɛ, la enŋa n ka bahɛ ho yoo, ge bo ho yimɛta wa. Ka yu'urɛ wan porɛ Israel teŋa wa poan. 15Bia wa wan malom kan'ahɛ ho vom, ge bo ho popeelom ho korogerɛ wa poan. Se'ere n sɔe la ho sanpɔga wa n nɔŋɛ ho la, n dɔgɛ en, ka gane hom dɔgɛ ne dayɔɔhe seyopɔe te se nɔŋɛ ne ho se'em la. 16Te Naomi nyɔkɛ bia la gan'arɛ a na'ma zuo, dɛna ka yɔɔla. 17Te teŋa la poan pɔgɔhe segɛ bia la yu'urɛ yeti, Naomi dɔgɛ ya. Bia la yu'urɛ dela Obed. Obed dela Yesse sɔ, Yesse dela David sɔ. 18Perez yizuo tuunhom n wana: Perez n dɔgɛ Hezron, 19te Hezron dɔgɛ Aram, te Aram dɔgɛ Aminadab, 20te Aminadab dɔgɛ Nason, te Nason dɔgɛ Salmon, 21te Salmon dɔgɛ Boaz, te Boaz dɔgɛ Obed, 22te Obed dɔgɛ Yesse, te Yesse dɔgɛ David.

will be added

X\