Arut 3

1Te Arut dayaama wa yele en yeti, N pɔyɔa, mam bote n te'ele ho mɛ, te la ana ho soŋa. 2Behɛ, to yiren wa nɛra n bala dɛna Boaz, se'em yamehe te ho ne dɔla kena yi'iha dia la. A me yeti a yeele la a dia, a dia tɔa zen'an la zina yu'uŋɔ wa. 3Bala sɔ iŋa, son kaam, yɛ ho lɔgɔsonɔ. Keŋɛ a dia tɔa zen'an la. Ho han ta paɛ, da nɛɛ ho mɛŋa. Gura te a ta di ge nyu' ba'ahɛ. 4A han ta yɛ'a gan'aregɔ, ho behɛ n wan gan'arɛ zen'an. Te a han ta ginha, ho keŋɛ ta pilige a fugɔbega la, a na'mai bɔba, gan'arɛ bilam. Ho han eŋɛ bala, a wan pa'alɛ hɔ hom wan eŋɛ se'em. 5Te Arut yele a ma la yeti, N wan eŋɛ sɛla woo te ho pa'alɛ mam la. 6Bala te Arut maahom keŋɛ Boaz dia tɔa zen'an wa, ta paɛ doohe a ma la n pa'alɛ en se'em la. 7Boaz n ta di ge nyu' ba'ahɛ te a poorɛ pee la, a keŋɛ mɛ ta gan'arɛ lɛm la a mui la te ba tɔ yeele kuge biŋe la ginha. Arut me eŋɛ baanlam wa'ana pilige a fuo la na'mai bɔba la me gan'arɛ. 8Te yu'uŋsunsua bɔba, te Boaz ta yeti a malom ŋmɛregerɛ. A behɛ te pɔka n bala gan'an a na'mai. 9Te a soke yeti, Ane n bala? Te a lebehe yeti, Mam ho yameŋa Arut. Bahɛ te ho fuo la lagom pile mam na. Se'ere n sɔe la, hom de yiren wa nɛra, sona te ho di mam. 10Te Boaz yele en yeti, N pɔyɔa, Na'ayenɛ wan kan' bahɛ ho zuo, la hom n dekɛ ho mɛŋa bo se'em wa. Ho toondena wa le gana ho yia toonɛ la, la hom n ka behɛ bodibila n de ho tadaana dɛna naha bii bontata loe wa. 11Bala, n pɔyɔa, da fabela. Mam nɛreba zan'an mi' te ho dela pɔka n tare zuo. N wan eŋɛ hom sokere sɛla woo wa bo ho. 12Lan de se'em la, mam seren dela yire poan la ya sona te n di ho. Ge nɛra kayema me boe, lɛm gana mam. 13Bala, bahɛ te beere yelegɛ, te la han dɛna a wan di ho, bahɛ te a di ho. A han kan di ho, mam pɔ' la Na'ayenɛ wa, te mam wan di ho. Gan'arɛ ka'lam te beere yelegɛ. 14Te Arut gan'arɛ a na'ma teŋa la bala, te la ta pɔnra yelegerɛ. Se'em ma'an te ho kan nyɛ nɛra baŋɛ la, te Arut ihege. Se'ere n sɔe la Boaz yele en yeti, La ka nare ba baŋɛ te ho zaan wa'an la mam dia tɔa zen'an wa na gan'arɛ. 15Ge a nya yele en yeti, Kɔ'ɛ ho fuo wa koyema lo' ko nu'uhe. Te Arut eŋɛ bala. Te a tonbegɛ dia la wo laahe seyoobe eŋɛ bini, dekɛ tu' Arut te a yɛ'a, ge te enŋa me lebe teŋa poan na. 16Te Arut n paɛ yire, te a dayaama soke en yeti, N pɔyɔa, sɛla woo keŋɛ la wane la hɔ? Te a me pa'alɛ en boraa la n eŋɛ sɛla woo la. 17A yeti, Enŋa n bo mam dia laahe seyoobe wa, ge yeti, la ka ane soŋa te ho lebe ho ma la zen'an la nu'beela. 18Te a dayaama la lebehe en yeti, Da kanbela n pɔyɔa. Ho wan nyɛ yele la n wan eŋɛ se'em. Boraa la kan vo'ohe, a han ka tom yele wa ba'ahɛ zina.

will be added

X\