Arut 2

1Naomi wa yiredoma la poan, Elimelek yizuo la poan, boraa kayema dɛna dakanrɛ te a yu'urɛ dɛna Boaz. 2Te Arut Moab bia yele Naomi yeti, Bahɛ te n keŋɛ vatɔ wa poan ha, te se'em han ta zɔ n ninbɔn'ɔn, a wan bahɛ te n dɔla a poore yi'iha sɛla te ba gɛta baha la. Te Naomi yeti, N pɔyɔa, kena. 3Te a yehe keŋɛ vatɔ la poan ha, ta dɔla kɛɛriba la poore yi'iha bɔbɔre ka sɛka, zite n yi'ihe zen'an la dela Boaz se'em n de Elimelek yizuo la va'am poan. 4Boaz me bala ze'ele Betlehem kɔ'ɔn paara va'am la poan na, po'ohɛ tontoneba la yeti, Na'ayenɛ wan kan' som bahɛ ya zuo. Te bama lebehe yeti, Ge kan' bahɛ hom me zuo. 5Ge a nya soke se'em n behere tontoneba la yeti, Pɔgɔkana wa ze'ele la bɛ na? 6Te a lebehe en yeti, Moab teŋa pɔka la n doohe la Naomi Moab teŋa na la n bala. 7Ka wa'an me na yele mam yeti, m belone ho mɛ, bahɛ te n dɔla sɛba n kɛɛre dia wa poore la yi'iha. Ka wa'an bolikain mea na la ka bɔŋa n bala wa paɛ wana ma'an ge ne lebe verɛ la poan ta vo'ohe. 8Te Boaz nya yele Arut yeti, N pɔyɔa, da le bahɛ va'am bona wa ge keŋɛ va'am sebo pon ta yi'ihe dia. Kɔ'ɔn dɔla pɔgɔhe wa n dole vaara dia wa poore. 9Kɔ'ɔn behera boraahe la n kɛ'ɛre te pɔgɔhe la dɔla se'em la, la ho yi'iha. N yele boraahe la te ba da daana hɔ. Ge ko'nyuuro han ta tara hɔ, ho paɛ boraahe wa n ankɛ ko' sebo ze'ele nyuura la, la ho nyu'. 10Te Arut dɔnbelɛ teŋa po'ohɛ en ge yeti, Mam me dela ane te ho behɛ nyɛ mam wa, mam se'em n dagɛ teŋa wa poan nɛra wa? 11Te Boaz yele en yeti, Som sebo woo te ho eŋɛ bo ho dayaama wa zan'an, lu' mam tobai mɛ. Ho sera la n ki' ge te ho bahɛ ho sɔ la ho ma la ho teŋadoma ge wa'an nɛresɛba te ho ka mina zen'an wa, paɛ mam me na. 12Na'ayenɛ wan yɔ hɔ la ho etesoŋɔ wa te ho eŋɛ wa. Ho wan nyɛ yɔ kantɛ Na'ayenɛ Israel Yenɛ, ho wa'ana sogɛ de poan wa la zen'an la zuo. 13Te Arut lebehe yeti, Tara mam bala n daana, la mam ho yameŋa wa n pon ka pa'ahɛ ho yamehe wa poan la, ho tɔgom wa bogolɛ mam suunre mɛ. 14Te la ta paɛ dia saŋa, te Boaz yi Arut yeti, Wa'ana to'e dia di. Te Arut paɛ na zin'ire la sɛba n kɛɛre dia la, te Boaz bo en ki sen'erema la basɛba, te a obe ta tegɛ ge gee. 15Te Arut ihege lɛbera a dia la yi'ihigo, te Boaz bo boraahe la n tone la nɔɔrɛ yeti, Bahɛ ya te a yi'iha yan kɛɛre zen'an la da tanhɛ ya en. 16Foore yan kɛ sɛla bobe la, nu'o nu'o bahera, te a dɔla yi'iha, ge da dige ya en. 17Bala te Arut bɔna va'am la poan yi'iha yi'iha la zanɔɔrɛ, ta va' dia la, nyɛ mui wanɛ. 18A nya zi' kule, te a ma la n nyɛ enŋa n nyɛ boom la zo'e se'em la. Ge te a dekɛ enŋa n di tegɛ ge gee ne sɛla va'amen ha la bo a ma la. 19Te a ma wa soke en yeti, Ho keŋɛ la bɛ ta yi'ihe zina? Ho tom la bɛ zina? Yenɛ kan' bahɛ boraa sɛka n behɛ nyɛ ho wa zuo. Te a yele a ma la yeti, Mam tom boraa sɛka va'amen zina la yu'urɛ dela Boaz. 20Te a ma lebehe yeti, Yenɛ kan' bahɛ a zuo. Wana n pa'alɛ te Na'ayenɛ ete som bɔ'ɔra vɔpa la ke'ema mɛ. Boraa la dela to yiredoma, a dela to sɔɔn. 21Te Arut yeti, Ka pon yele mam te n dɔla a yamehe la kena na gura te ba ta ba'ahɛ va'am la. 22Te Naomi yele a sanpɔga wa yeti, N pɔyɔa, la ane soŋa te ho dɔla a pɔgɔhe wa kena bilam, nyana hom keŋɛ va'am sebo poan te se'em ta daana hɔ yoo. 23Bala te Arut dɔla Boaz tontoneba la poore daarɛ woo yi'iha, tara tara te mui la ki kɛɛa la ta ba'ahɛ, te a yee bɔna yire la a dayaama la.

will be added

X\