Arut 1

1Saŋsɛka poan te kema nan behera teŋa la, te kom sige, te boraa kayema n de Betlehem teŋa n boe Yuda teŋa sɔ'ɔlom poan la nɛra, nɔgɛ la a pɔga la a dayɔɔhe seyi' keŋɛ Moab teŋa poan. 2Boraa wa dela Eprata yizuo la n boe Betlehem teŋa la nɛra, te a yu'urɛ dɛna Elimelek, te a pɔga la yu'urɛ dɛna Naomi, te a dayɔɔhe seyi' la me yu'ura dɛna Malon la Kilion, nɔgɛ keŋɛ Moab teŋa poan. 3Te Naomi sera Elimelek wa ta ki, ge bahɛ en la a dayɔɔhe seyi' la. 4Te bodibinto wa zo'e na di Moab teŋa pugunto. Pugula la kayema yu'urɛ dɛna la Orpah, te kayema me yu'urɛ dɛna Arut. Ban bɔna Moab teŋa yuum pia, 5te Malon la Kilion me ki, te la dɛna Naomi. A sera la me a dayɔɔhe bayi' ka boe. 6Te Naomi ihege la a sanpɔgɔba wa yehe Moab teŋa la poan lɛbera kula. Se'ere n sɔe la, a wom te Na'ayenɛ zɔ a nɛreba la ninbɔn'ɔn mɛ ge bo ba dia. 7Te Naomi la a sanpɔgɔba bayi' wa ihege ban kɛn'ɛre teŋsɛka poan la, yehe yɛ'a te ba lebe Yuda teŋa poan na. 8Ge a yele a sanpɔgɔba wa yeti, Lebe ya paɛ ya ya madoma. Na'ayenɛ wan eŋɛ som bo ya, wo yamam n eŋɛ som sebo taaba bo mam nɛreba wa n gan' teŋa wa la mam mɛŋa se'em wa. 9Na'ayenɛ bahɛ te ya zan'an nyɛ se'ere soma ele te ba beha ya soŋa. Naomi n tɔgɛ wana ba'ahɛ la, a keehe ba mɛ te ba bayi' la taɛ kaahega. 10Te a sanpɔgɔba wa yele en yeti, Aai, tomam wan doohe la hɔ lebe ho nɛreba zen'an. 11Ge Naomi me yeti, Aai, n pɔyɔɔhe wa, lebe ya. Ya yeti ya doohe mam ta eŋɛ la bene? Mam ze wa, n wan le ta'an dɔgɛ me yoi? N wan ta dɔgɛ bodibinto te to zo'e na di ya? 12N pɔyɔɔhe wa, lebe ya kule ya, lebe ya. Mam ba' korogɛ mɛ, n kan le ta'an ele sera yɛta la n dɔgɛ. Mam han pon tare ne potɛn'ɛrɛ bala, pon nyɛ sera zina zina wa, dɔgɛ bodibinto zina wa, 13yamam wan nyaŋɛ zin'an bala gura te to zo'e? Yamam wan nyaŋɛ ŋmibe zin'an kan ele? N pɔyɔɔhe wa, la kan eŋɛ bala la dela too bo mam gana yamam. Se'ere n sɔe la, Na'ayenɛ n zaberɛ la mam. 14Te a sanpɔgɔba bayi' la le taɛ la kaahega. Te Orpah la keehe a dayaama la, ge te Arut kɔ'ɔn tabɛ kaŋkaŋe. 15Te Naomi yele en yeti, Behɛ, ho tadaana la n bala n lebere a nɛreba la a baga zen'an la. Doohe a poore. 16Te Arut zagahɛ ge yeti, N ma, da pɛnregɛ mam te n bahɛ hɔ, bii n da doohe ho. Hom n ye' zen'an la, mam ye' la bilam. Hom n gan'ate zen'an la, mam gan'ate la bilam. Ho nɛreba dela mam nɛreba n bala. Ho Yenɛ dela mam Yenɛ. 17Hom n wan ki zen'an la, mam kiiri la bilam. Ba wan pin' mam la bilam mea. Mam han dekɛ ho bahɛ, Na'ayenɛ namehɛ mam paɛ paɛ, la han dagana la kum ma'an n wan yelege mam la hom. 18Naomi n baŋɛ te Arut lo' la a suunre zan'an te a doohe en la, a ka le yele en se'ere. 19Te ba bayi' la yehe kena kena wa paɛ Betlehem teŋa na. Ban wa'ana paɛ Betlehem la, teŋa la nɛreba kɔ' la sai zɔta na, bama zuo. Te pɔgɔhe yɛta yeti, Naomi n wana wa? 20Te Naomi lebehe ba yeti, Da le yi'ire ya mam Naomi. Yi'ire ya mam Mara. Se'ere n sɔe la, Gaŋɛ Zan'an Yenɛ la dekɛ la too kpa'aherɛ feebe mam. 21Mam daa tare mɛ keŋɛ, te Na'ayenɛ bahɛ te mam lebe nu'beele na. Na'ayenɛ wa tom mam la toonɛ, Gaŋɛ Zan'an Yenɛ wa n eŋɛ mam se'em wa, bene te ya wan le yi'ira mam Naomi? 22Naomi n ze'ele Moab teŋa poan lebe a teŋa la, te a sanpɔga Arut se'em n de Moab teŋa pugula la lagom doohe en. Ba paɛ Betlehem teŋa poan la la mui kɛ'a saŋa poan.

will be added

X\