Rom 8

1Dene poan, sagaŋɔ ka boe bɔ'ɔra sɛba n boe la Yesu Krista la. 2Se'ere n sɔe la, Sea la n bahɛ te to bɔna la Yesu Krista la n fan' tɔ pa'alegɔ la n tare be'em la kum kena na la poan bahɛ. 3Pa'alegɔ la n daa kan ta'an eŋɛ se'ere doohe la saaleba n de tɔrɔgɔdoma la zuo, Yenɛ nyaŋɛ eŋɛ dɛ. Yenɛ daa sagom be'em doohe la n bahɛ te a mɛŋa Dayɔa la daa dekɛ asaala iŋa wa'ana dɛna be'em bo'olom. 4Ge Yenɛ daa eŋɛ wana te tomam sɛba n dole a Sea la n bote se'em la ge dagɛ la to mɛhe n bote se'em la, wan dɛna tontɔɔ nɛreba wo pa'alegɔ la n bote se'em la. 5Ge nɛresɛba n boe ba iŋganɛ n bote se'em la, ba potɛn'ɛra la dole la ba iŋganɛ la n bote se'em la. Ge nɛresɛba me n boe wo Sea la n bote se'em la, bamadoma me potɛn'ɛra tɛn'ɛhɛ la sɛla te Sea la bɔta la. 6Te hon se'em n boe bɔŋsɛka taaba te ho mea potɛn'ɛrɛ bɔta la, tare la kum kena na. Ge hon me se'em potɛn'ɛrɛ n tɛn'ɛhe sɛla te Sea la bɔta la, me tare la vom la sunma'ahom kena na. 7Bala, hon se'em n boe bɔŋsɛka taaba te ho mɛŋa potɛn'ɛrɛ bɔta dela Yenɛ diŋdaana. Se'ere n sɔe la, a daana ka nane Yenɛ pa'alegɔ la, ge me pon ka nyaŋɛ nana a. 8Te nɛresɛba n nane sɛla te ba mɛhe potɛn'ɛra bɔta, kan ta'an eta sɛla te Yenɛ bɔta. 9Ge Yenɛ Sea la han seren bɔna la ho mɛ ho kan ta'an bɔna bɔŋsɛka taaba te ho mea potɛn'ɛrɛ bɔta ge ho wan ton bɔna la bɔŋsɛka taaba te Sea la bɔta. Bala, hon se'em n ka dole Sea n bote se'em la, Yesu Krista ye ka boe la hɔ. 10Ge Yesu Krista han bɔna la hɔ, Sea la n bo'ore ho vom yehe la hon naa la Yenɛ la zuo. La iŋganɛ wa n pon wan ki be'em zuo wa. 11Ge Sea la n daa vo'e Yesu la, bala mea te se'em n daa bahɛ te Krista vo'e la wan bo ya iŋganɛ wa vom n ka tare ba'ahegɔ Yenɛ zen'en, doohe la Sea la n boe ya poan la. 12Dene poan, n sɔɔnrɔ, la dela to bɔna wo Sea n la bote to bɔna se'em la, ge dagɛ to bɔna to iŋganɛ n bote se'em la. 13Ge ho han bɔna bɔŋsɛka taaba te ho mea bɔta, ho wan ki'. Ge ho han bɔna bɔŋsɛka taaba te Sea la bɔta la, ho wan vɔna ge te ho ka le malom tona be'em. 14Te nɛresɛba n boe bɔŋsɛka taaba te Yenɛ Sea bɔta la, bama n de Yenɛ kɔma. 15Sea la daa ka yeti a bahɛ te to zɔta dabeem wo yamehe n zote dabeem se'em la. Ge a Sea la ton yeti a bahɛ to mɛ te to de'a la Yenɛ kɔma ge te Sea la paŋa poan, te to wan yi'ira Yenɛ te, to Sɔ'. 16Ge te Sea la la to mɛhe sɛɛhe la lagom yɛta mɛ te to dela Yenɛ kɔma. 17Tomam n de Yenɛ kɔma wa, to wan to'e kan'somɔ sebo te a tara bɔ'ɔra a nɛreba la. Ge te to wan lagom la Krista to'e sɛla te Yenɛ dekɛ biŋe bo en. Te to han namehɛ wo Krista n daa namehɛ se'em la, to me wa lagom nyɛ' pɛnka wo Yesu n daa nyɛ' pɛnka se'em la. 18Ge mam mi' te la ka nare te to makɛ zina namehegɔ la, la pɛnka la te to wan nyɛ' Yenɛ zen'en la. 19Ge teŋparɛ wa zan'an kɔ'ɔn ma'ɛn la ba mea gura te Yenɛ bahɛ te ba nyɛ' a kɔma la. 20Bala, Yenɛ daa gankɛ sɛla woo te a maalɛ la ge daa nyɛ' te ba ka tara boorɔ. La daa dagɛ la sɛla te a maalɛ la n bote dɛ bala, ge Yenɛ n eŋɛ dɛ bala. Ge bala mea zan'an, Yenɛ kelom tara potɛn'ɛrɛ mɛ gura 21te daarɛ deyema la a wan fan' sɛla woo te a maalɛ la bahɛ, te ba kan malom bahɛ yoo, ge a wan ton yi' ba a kɔma te ba nyɛ' a vo'ohogo. 22To mi' te wonse'ere ha la, tara tara la zina, sɛla woo te Yenɛ maalɛ la kɔ'ɔn kaaha wo pɔka n virigere la. 23Ge tomam sɛba n tare Sea la dideena la kaaha la bala gura te a ta bahɛ tɔ te to de'a a kɔma ge ka le malom nyɛ' namehegɔ. 24Ge ton daa din'inhe suunre gura la zuo te Yenɛ fan' tɔ bahɛ wa. Ge to han diŋɛ nyɛ' sɛla te to gura la, la le dagana la sɛla te to din'inha suunre gura, ane me n din'inhere suunre gura sɛla te a pon diŋɛ nyɛ'? 25Ge to han din'inhe suunre gura sɛla te to nan ka nyɛ', to gure dɛ mɛ la sundin'inhegɔ. 26Bala mea, te Sea la kena na soŋora tɔ wo ton kan ta'an soŋɛ to mɛhe la. Te to ka mi' ton wan sohɛ Yenɛ se'em. Bala te Sea la soha Yenɛ bɔ'ɔra tɔ la yetɔgom sebo te nɛra kan ta'an bɔkɛ bɔ. 27Ge Yenɛ, se'em n mi' to sunya n ane se'em la mi' a Sea la n tɛn'ɛhe se'em mɛ. Se'ere n sɔe la, a Sea la n de se'em n sɔe sohora bɔ'ɔra Yenɛ nɛreba la dɔla la Yenɛ sunboolom n de se'em. 28Ge to mi' sɛla woo poan, Yenɛ ete som bɔ'ɔra nɛresɛba n nɔŋɛ en, sɛba te a yi' ba wo enŋa mea n bote dɛ se'em la. 29Yenɛ yelege sɛba te a pon te'ele yi' me la bayema, te ba ana wo a dayɔa Yesu la. Te bala te a dayɔa la wan dɛna keema bo sɔɔnrɔ kekeko. 30Dene poan, sɛba te Yenɛ loe la te a yi', sɛba te a yi' la, a dekɛ ba yi' la tontɔɔ nɛreba, ge me bo ba a paŋa. 31Ton wom wana waabe wa to wan ta'an yeti bo? Te Yenɛ han bɔna tomam pooren, ane n wan ta'an ihege zaberɛ la tɔ? 32Ge Yenɛ daa ka gu' a dayɔa la te a da wa'ana. Ge a daa ton bahɛ te a dayɔa wa'ana ki' bo la tomam zanwaabe. Te Yenɛ han bo to a dayɔa la, a me wan bo to sɛla woo te to bɔta zaŋa. 33Bala, ane n wan ta'an zɛrɛgɛ nɛresɛba te Yenɛ loe la? Yenɛ mea yele ya te ba tare boorɔ. 34Bii, se'em boe wan ta'an gankɛ ba? Nɛra ka boe wan ta'an gankɛ ba. Yesu Krista, n daa de se'em n ki' ge vo'e a kum poan ge nya zin'an Yenɛ zuɔ nu'o. Enŋa n de se'em n sohe Yenɛ bɔ'ɔra tɔ. 35Dene poan, sɛla boe wan ta'an bahɛ te Krista kan nɔŋɛ tɔ? La wan de'a daaŋɔ bii sunsagaŋɔ bii namehegɔ bii kom, bii nɔŋɔ, bii nyɔnpɔnhega bii kum n wan ta'an bahɛ te a kan nɔŋɛ tɔ? 36Ba daa golehɛ te, Hom zuo te tomam koora to mɛhe daarɛ woo, nya ana wo piihe te ba tara yɛ'a te ba ta kɔrom la. 37Ge sɛla woo n eŋɛ tɔ, se'emdaana n nɔŋɛ tɔ la n bo'ore to paŋa te to nyaŋera dɛ. 38Ge mam mi' soŋa soŋa te sɛsɛla ka boe wan ta'an bahɛ te Yesu kan nɔŋɛ tɔ. La kan de'a kum bii vom, bii Yenɛ soŋoreba bii sɛba n de zuodoma saazuo ha, bii zina wa bii sɛla n wan wa'an pooren na la, bii paŋadoma, 39bii saazuo bii teŋa teŋa ha. Sɛsɛla ka boe teŋa wa zuo wan ta'an bahɛ te Yenɛ kan nɔŋɛ tɔ to Daana Yesu Krista zuo.

will be added

X\