Rom 5

1Depooren, to nya dela tontɔɔ nɛreba Yenɛ nɛŋan dɔla la tomam nam Yenɛ la. Bala te to tara sunma'ahom la Yenɛ doohe to Daana Yesu Krista poan. 2Ton nam Yesu Krista la zuo te Yenɛ eta som bɔ'ɔra tɔ. Dene n bala te to nyɛta wa. Bala to tare popeelom. Se'ere n sɔe la to tare potɛn'ɛrɛ te to wan lagom to'e Yenɛ pɛnka la. 3Ge me tara popeelom to namehegɔ wa poan. Se'ere n sɔe la, to mi' te to han nyɛ' namehegɔ, bala to wan zamehɛ ŋmibega soŋa soŋa. 4To ŋmibega la zuo te Yenɛ tɔgɔra sɛla n ane soŋa yɛhera to yele. Ge ton tɔgɔrɛ yelesoma yɛhera to yele la bahere te to din'inhe suunre gura. 5Ge to han din'inhe suunre wana, Yenɛ kan valegɛ tɔ. Se'ere n sɔe la, Yenɛ pon dekɛ a nɔŋerɛ la bo to yɛhera la a Sea la te a dekɛ bo to la. 6Ge ton daa kelom kan ta'an loe yele yele bo to mɛhe la. Yesu Krista daa ki bo to te a soŋɛ tomam toonbe'erodoma wa mɛ. A ki' la daanse'ere daarɛ te Yenɛ bɔta n te a ki la. 7La kpe'em ya te nɛra ki bo tontɔɔ nɛra. Ge la wan de'a la daanse'ere nɛra wan ki bo la nɛresoŋɔ. 8Yenɛ pa'alɛ tɔ, en nɔŋɛ tɔ se'em. A pa'alɛ tɔ a nɔŋerɛ wa la ton nan kelom dɛna yelebe'erodoma te Yesu Krista ki bo to. 9Yesu kum la zuo te nananawa te to nya dɛna tontɔɔ nɛreba Yenɛ nɛŋan. Te dena wa han dɛna bala, yelese'ere ka boe wan gu' Yesu te a kan fan' tɔ bahɛ, Yenɛ han ta eŋɛ suunre gankera tɔ. 10To daa dela Yenɛ diŋdoma. Ge a bia Yesu kum la zuo, te to dɛna a zɔdoma wa. Ton nya dela Yenɛ zɔdoma. Yesu wan fan' to bahɛ la n vɔe wa zuo. 11La dagɛ la zanwaabe n bala. To le tara popeelom la Yenɛ yɛhera la to Daana Yesu Krista, se'em bahɛ te to tare be'em duuhego la zuo. 12Tɔ. Nɛra ayema zuo te be'em wa'an teŋa wa zuo na. Te nɛra wa be'em la n tare kum na. Te dena wa zuo te kum bɔna teŋa wa zuo woo. Se'ere n sɔe la nɛra woo dela be'emdaana. 13Ge be'em daa pon bɔna teŋa wa zuo te Yenɛ nan ka bo pa'alegɔ la. Ge zen'an te pa'alegɔ la ka bɔna, ba kan nyɛ be'em. 14Ge kum daa boe nɛresɛba n daa boe saŋsɛka te Adam yuun bɔna la tara tara la Moses saŋa la mɛ. Kum mea yuun boe nɛresɛba n yuun ka tom be'em wo Adam n yuun tom se'em, yɛhera la n yuun zagahɛ Yenɛ nɔɔrɛ la. Ge Adam yuun ane mɛ wo nɛra se'em n daa yeti a wa'an teŋa wa zuo na la n yuun ane se'em la. 15Ge bama bayi' la dagɛ boyena. Se'ere n sɔe la, Yenɛ zaŋa bo'olom la ka ane wo Adam yelebe'ero la. Ge la me de yelemɛŋɛrɛ te Adam yelebe'ero zuo te nɛreba kiira wa. Ge Yenɛ n zo'ohogɔ la zo'e gaŋɛ mɛ, te bala mea me n de a zaŋa bo'olom la. A dekɛ bo'olom bona wa bo la nɛreba kekeko yɛhera la boraa kayema som la zuo te Yenɛ dekɛ bo to. Boraa wa dela Yesu Krista. 16Bala Yenɛ bo'olom la boe la boyema, la Adam n tom be'em se'em la. Ge Adam daa ka tare boorɔ la en tom be'em la. Nɛreba kekeko n daa tom be'em la. Yenɛ n daa eŋɛ som bo ba la zuo n bahɛ ba te ba tara boorɔ. 17Ge la de yelemɛŋɛrɛ te nɛra ayema la be'em zuo n bahɛ te kum bɔna wa. Ge nɛra ayema wa, Yesu Krista wa n eŋɛ se'em wa kanregɛ gaŋɛ mɛ. Te sɛba woo te Yenɛ zo'ohɛ ba la a bo'olom te ba dɛna tontɔɔ nɛreba a nɛŋan la, wan bɔna bɔŋsoŋa Yesu Krista yu'urɛ poan. 18Bala zuo nɛra yene be'em n bahɛ te nɛra woo nyɛta namehegɔ la, bala mea te nɛra woo me nyɛta faanrɛ yɛhera la nɛra yene toonsoma la zuo. 19Bala zuo nɛra yene n zagahɛ Yenɛ nɔɔrɛ la zuo te nɛreba dɛna be'emdoma, bala mea te Yenɛ yi' nɛreba tontɔɔdoma yɛhera la nɛra yene Yesu Krista wa, n ka zagahɛ Yenɛ nɔɔrɛ la zuo. 20Pa'alegɔ la wa'ana te la bahɛ te be'em malom pa'aha. Ge be'em malom pa'aha la, bala te Yenɛ zo'ohogɔ la me malom pa'aha. 21Bala, be'em n tare kum na la, bala mea te Yenɛ zo'ohogɔ la bahɛ tomam te to tara vom sebo n ka tare ba'ahegɔ enŋa Yenɛ zen'en la to Daana Yesu Krista zuo.

will be added

X\