Rom 4

1To wan ta'an yeti to sɔyaaba Abraham yuun eŋɛ a mea yɛla la wane? 2La han dene la Abraham tooma zuo te Yenɛ yuun dekɛ en te a de'a tontɔɔ nɛra, a ta'an ŋmɛ' ne a nyɔn'ɔn la dɛ nɛresaala zen'en. Ge dagɛ Yenɛ zen'en. 3La golehɛ yeti, Abraham nam Yenɛ te Yenɛ yi' en tontɔɔ nɛra. 4Nɛra han tom ba ne yɔ' en mɛ, a yɔɔrɛ la dagɛ bo'olom, ge la dela sɛla te a tom to'e. 5Se'em te Yenɛ bɔ'ɔra boorɔ dela se'em n ka delom a mɛŋa tooma ge nam la Yenɛ ge mina te Yenɛ ma'an n bo'ore toonfɛn'ɛhadoma boorɔ. 6David daa tɔgɔre la yele ana mea yɛta yeti, popeelom boe la sɛba te Yenɛ yi' ba tontɔɔdoma ge dagɛ la tooma zuo. 7A daa yeti, Popeelom boe mɛ la sɛba te Yenɛ bahɛ ba be'em bo ba sɛba te ba pin' ba be'em bahɛ la. 8Popeelom boe mɛ la sɛba te Na'ayenɛ bahɛ ba tobekperega be'em woo bo ba te ka bɔta pan'ahegɔ. 9Popeelom bona taaba dela sɛba n ŋma' ba boraanɛ ma'an. La sɛbadoma me n ka ŋma'. Bala, tomam yeti, Abraham nam la Yenɛ, te Yenɛ yi' en tontɔɔ nɛra. 10Ge Yenɛ yi' Abraham la tontɔɔ nɛra te Abraham nan ka ŋma'. 11Ge Yenɛ yuun yi' en la tontɔɔ nɛra ge te Abraham nya baŋɛ ŋma'. A yuun to'e ŋmaa danlehom wa te la pa'ale te en nam Yenɛ la zuo te Yenɛ yi' en tontɔɔ nɛra. Bala Abraham dela sɔyaaba bo sɛba woo n nam Yenɛ la. Te Yenɛ to'e ba la ban pon ka ŋma' te ba dɛna tontɔɔdoma. 12Abraham kelom dɛna la sɔyaaba bo sɛba ŋma' la me. Dagɛ la ban ŋma' la zuo te a de'a ba sɔyaaba ma'an. Ge la dela ba nam Yenɛ wo Abraham n nam Yenɛ la, ge nya baŋɛ ŋma' la zuo te a de'a ba sɔyaaba. 13La dagɛ la pa'alegɔ dɔlɔga zuo te Yenɛ yuun biŋe a nɔɔrɛ bo Abraham la a yaahe te teŋa wa zan'an wan dɛna ba denɛ. Dagɛ la Abraham dole la pa'alegɔ la zuo. Ge la dela n nam Yenɛ te a yi' en tontɔɔ nɛra. Bala zuo te a biŋe a nɔɔrɛ la bo en. 14Ge Yenɛ han biŋera a nɔɔrɛ la bɔ'ɔra la sɛbadoma n dole pa'alegɔ la ma'an la, nɛresaala n nam Yenɛ se'em la ye dela yoo. Ge te Yenɛ me n biŋe a nɔɔrɛ la me kan tara vɔnrɛ. 15Pa'alegɔ la tare la sunsunyiim kena na. Pa'alegɔ han ka bɔna ganleŋɔ ka boe. 16Bala, Yenɛ yuun biŋe a nɔɔrɛ la yɛhera la Abraham n yuun nam en la zuo. Te dena wa poan te Yenɛ nɔɔrɛ la te a biŋe la wan pa'alɛ soŋa soŋa te la dela bo'olom te a eŋɛ biŋe bo Abraham yaahe woo. Ge dagɛ la sɛba ma'an n dole pa'alegɔ la. Ge, a lagom bo la sɛba woo n nam Yenɛ wo Abraham n nam se'em la. Te Abraham n de to waabe sɔyaaba. 17Wo Yenɛ gɔŋɔ la n yele se'em la, la yeti, Mam eŋɛ hɔ te ho dɛna la tenhen zo'e zo'e sɔ. Bala, Yenɛ nɔbiŋere wa dela sɛla n de ma'an Yenɛ nɛŋan. Yenɛ dene mea n bahera te nɛreba ihegera ba kum poan. Ge me bahera te sɛla te to nan ka tabelɛ nyɛ' to nini teŋa wa zuo wa bɔna. 18Ge Abraham nam Yenɛ mɛ ge din'inhe suunre gura te a pɔga ta dɔgɛ. La wa kpe'em te nɛra sakɛ te yele ana wa wan eŋɛ. Bala n sɔe te Abraham dɛna nɛra woo sɔyaaba teŋa wa zuo. Wo lan golehɛ se'em la, Ho buuri yeti ba ta zo'e la bala wo ŋmarebibihe la. 19Abraham ta dɛna la yuunkɔbega, ge a yuun ka yeti enŋa diŋɛ korogɛ la te a iŋa zɛnkɛ la, a kan le nam Yenɛ. Bii a yeti a pɔga Sarah en diŋɛ korogɛ kan le nyaŋɛ dɔgɛ kɔma la a kan nam Yenɛ. 20Abraham daa ka zagahɛ te a nam Yenɛ bii a tɛn'ɛha boyi' boyi' la Yenɛ n biŋe a nɔɔrɛ bo en la. A daa malom nam Yenɛ mɛ soŋa soŋa ge pɛngɛ en. 21A daa sakɛ a suunren mɛ soŋa soŋa te Yenɛ wan seren eŋɛ yelese'a te a biŋe a nɔɔrɛ te a wan eŋɛ la. 22Bala, Abraham n nam Yenɛ la zuo, te Yenɛ yi' en tontɔɔ nɛra. 23Yelehom bona wa ka golehɛ bo la Abraham ma'an, 24ge la golehɛ bo tomam sɛba mɛ te ba to'e to te to dɛna tontɔɔdoma, tomam sɛba n nam Yenɛ se'em n vo'e to Daana Yesu kum poan la. 25Ge tomam n tom be'em la zuo, te Yenɛ bahɛ te ba ko' Yesu. Ge a bahɛ te a vo'e a kum la poan mɛ. Wana zuo te Yesu wan eŋɛ tɔ tontɔɔdoma Yenɛ nɛŋan.

will be added

X\