Rom 3

1Bala la Yudoma nyane sɛba n dagɛ Yudoma la mɛ? Bii ŋmaa n tare vɔnrɛ? 2La de sera. Yia poan Yenɛ daa dekɛ a yɛla la bo la Yudoma te ba eta. 3Yudoma la basɛba daa han dagana la birikindoma, bala la wan bahɛ te Yenɛ kan eŋɛ n biŋe a nɔɔrɛ te a eŋɛ se'em la? 4Aai, la kan dene bala. Ge nɛra woo n pon ka tɔgɔra yelemɛŋɛrɛ wa, Yenɛ kɔ'ɔn de'a la yelemɛŋɛrɛdaana wo lan golehɛ se'em la, Ho yetɔgom dela ma'an. Ho han gankɛ mam te mam tue mɛ, la dela ma'an. 5Ge nɛra se'em han ta yeti te a han tom be'em a pa'alɛ te Yenɛ tona la sɛla n de ma'an? To wan yeti bo? To wan ta'an yeti Yenɛ ka ton soŋa a han bahɛ te a daana nyɛ' namehegɔ? 6Aai, la kan ta'an eŋɛ. A han ta'an eŋɛ bala, Yenɛ kan ta'an gankɛ teŋa wa nɛreba waabe. 7Ge magahɛ wo, mam han ton la be'em. Ya tɛn'ɛhɛ te bala wan soŋɛ Yenɛ pɛnka. Se'ere n sɔe la bala te nɛreba wan nyɛ' baŋɛ soŋa soŋa te Yenɛ tone la sɛla n de ma'an? La han de'a la bala. La wan eŋɛ la wane, te n wan nyɛ' namehegɔ ge de'a yelebe'ero daana wa? 8Bala, nɛreba basɛba yeti mam yele nɛreba yeti, Te tom be'em te bala n tare pɛnka bo Yenɛ. Bala la, Yenɛ wan gankɛ ba, wo lan nare te a gankɛ ba se'em la. 9Bala, tomam la nyane sɛba n dagɛ Yudoma la mɛ? Aai. Mam pon diŋɛ pa'alɛ te Yudoma la sɛba n dagɛ Yudoma la zanwaabe boe la be'em poan. 10Wo lan golehɛ yele se'em la, Se'em ka boe dɛna tontɔɔ nɛra, la ayena me. 11Se'em me ka boe tara bɔkɛ, se'em ka boe ba poan ɛɛra Yenɛ. 12Ba zan'an bire la poore, ba zan'an ganlom mɛ. Se'em ka boe poan tona som, ayena me ka boe. 13Ba konkɔya dela yɔɔrɔ, te ba zɛlehe ana malemale. Ba nɔgbama tare la zaŋkaŋa yabega ma'an. 14Ba nɔya perɛ mɛ la pɔtɛ la yabega. 15Ba kanbele me koora ge pɔgɔlona nɛreba. 16Ba sɔrɔtɔ zan'an dela sagaŋɔ la fabelegɔ. 17Ba ka mi sunma'ahom sore la. 18Yenɛ zɔɔlom ka boe ba ninin. 19Ge le yɛ'ɛha to mi' te sɛla woo te pa'alegɔ la yɛta nɛreba te ba eta la, enŋɛ bo la nɛresɛba n dole a la ma'an. Bala zuo, Yenɛ wan gankɛ teŋa wa waabe nɛreba ge nɛnɛra kan ta'an yeti sɛla. 20Ge nɛra han dɔla pa'alegɔ la, bala la ka bahɛ te a de'a yelemɛŋɛrɛ nɛra Yenɛ nɛŋa. Se'ere n sɔe la, pa'alegɔ la bahere te nɛra woo baŋera te a dela be'emdaana. 21Nananawa, Yenɛ pa'alɛ sore te nɛreba de'a yelemɛŋɛrɛ nɛra. Sore dena wa me ka tare se'ere eta la pa'alegɔ la te Pa'alegɔ la Nɔtɔgɔheba n pon tɔgɛ de yele la. 22Yenɛ ze'ete nɛreba ma'an. Doohe la ban nam Yesu Krista la, Yenɛ ete la bala mea bɔ'ɔra buuri woo n nam Yesu Krista. Sɔya la ka boe yema yema. 23Se'ere n sɔe la, nɛra woo ton la be'em, ge ka paara Yenɛ zen'en. 24Ge, Yenɛ n eŋɛ som bo nɛreba yoo la zuo, te a bahɛ ba yelebe'ero bo ba te ba de'a yelemɛŋɛrɛ nɛreba, yɛhera la ban nam Yesu Krista la zuo. 25Yenɛ daa loe Yesu te a ki' mɛ te a kum la poan n wan nyaŋɛ bahɛ nɛreba yelebe'ero bo ba wo ba han nam en. Yenɛ daa eŋɛ wana, te a pa'alɛ te a dela tontɔɔdaana. Ge yuuma n tole ha, Yenɛ daa tare la suguru ge daa ka namehɛ nɛreba ba yelebe'ero zuo. 26Ge nananawa, a ete suunre la nɛreba yelebe'ero te a pa'alɛ te a dela tontɔɔdaana. Sore dena te Yenɛ pa'alɛ te enŋa mɛŋa dela tontɔɔdaana, ge me wan eŋɛ sɛba woo n nam Yesu tontɔɔdoma. 27Bala, sɛla ka boe te to wan ta'an ŋmɛ' nyɔn'ɔn la dɛ. Se'ere n sɔe la la dagɛ la ton dole pa'alegɔ la zuo te to wan dɛna tontɔɔ nɛreba Yenɛ zen'an. Ge la dela ton nam Yesu la zuo te to wan dɛna tontɔɔ nɛreba Yenɛ nɛŋa. 28Bala, ton nyɛ' sɛla dena poan wa, la dagɛ la hom dole pa'alegɔ la, n wan bahɛ te Yenɛ yi' ho tontɔɔ nɛra. Ge la dela hom nam Yesu la zuo te Yenɛ wan yi' ho tontɔɔ nɛra. 29Yenɛ kɔ'ɔn bɔna la Yudoma zen'an ma'an ge a ka boe la sɛba n dagɛ Yudoma zen'an? Aai, Yenɛ me boe sɛba n dagɛ Yudoma zen'an. 30Yenɛ dela ayena. A dekere Yudoma te ba dɛna tontɔɔ nɛreba la ban nam Yesu la zuo, ge me dekera sɛba n dagɛ Yudoma me te ba dɛna tontɔɔ nɛreba la ba me nam Yesu la zuo. 31Wana ka pa'alɛ te ton nam Yesu la zuo, to da dɔla pa'alegɔ la. La dela te ton dɔla kɔ.

will be added

X\