Rom 2

1N zɔdoma wa, sore ka boe bo ya te ya gankɛ ya tadaana. Se'ere n sɔe la yamam mɛhe n ete la bala. Ge nya yeti ya eŋɛ la wane gankɛ ayema. Ya han eŋɛ bala, ya sagom ne la ya mɛhe. 2To zanwaabe mi' te Yenɛ han sagom nɛresɛba n ete bala la, a tare yelemɛŋɛrɛ. 3Ge n zɔ', nɛreba han eŋɛ sɛla te hon sagom ba ge le eŋɛ dene mea, ho tɛn'ɛhe te ho wan nyaŋɛ le'ehɛ Yenɛ sagaŋɔ la? 4Ya bire poya bahɛ Yenɛ nɛresoŋɔ la, la n din'inhe suunre ge me ka eta sunsunya tɔtɔ tɔtɔ la. Ge, Yenɛ tare la som, zegera te a bahɛ te ya tee ya potɛn'ya ya yelebe'ero poan. 5Ge ya toba n kpa' te ya sunya kanbɛ te ya ka kɛleha yele yele la zuo, ya wan ta nyɛ' namehegɔ gaŋɛ. Namehegɔ daarɛ la te Yenɛ wan pa'alɛ a sunsunyiim ge gankɛ yelemɛŋɛrɛ gankerɛ la. 6Te Yenɛ wan yɔ' nɛra woo te la zona la n tom se'em la. 7Nɛreba basɛba kɔ'ɔn eta la som bɔ'ɔra nɛreba ge ɛɛra pɛnka la na'ahegɔ, la vom sebo n ka tare ba'ahegɔ Yenɛ zen'en enŋa Yenɛ zuo. Bamadoma te Yenɛ wan dekɛ vom la bo ba. 8Le yɛ'ɛha nɛreba basɛba me dela ponya'andoma ge zagahɛ sɛla n de sera, ge dɔla la sɛla n de be'em. Bamadoma me Yenɛ wan eŋɛ suunre sagom ba. 9Ge nɛresɛba woo n tone be'em la wan nyɛ' namehegɔ la daaŋɔ. La me wan pin'ilom la Yudoma zen'an yia ge nya paɛ sɛba n dagɛ Yudoma zen'an me. 10Ge Yenɛ wan dekɛ a pɛnka la a na'ahegɔ la iŋma'ahom bo sɛba woo n eta soŋa la. La me wan le pin'ilom la Yudoma zen'enhe yia ge nya bo sɛba n dagɛ Yudoma la me. 11Bala Yenɛ gankerɛ nɛra woo la boyena. 12Nɛresɛba n ka tare pa'alegɔ la, han ton be'em, Yenɛ kan gankɛ ba la pa'alegɔ la. Ge nɛresɛba n tare pa'alegɔ la, han ton be'em, Yenɛ wan dekɛ pa'alegɔ gankɛ ba. 13Dagɛ se'em wone pa'alegɔ la ma'an n bahɛ te ho de'a yelemɛŋɛrɛdaana ge la dela hon ete sɛla te pa'alegɔ la bɔta la, eŋɛ bahɛ te ho de'a yelemɛŋɛrɛ nɛra Yenɛ zen'en. 14Ge sɛba n dagɛ Yudoma la n daa ka lagom tara pa'alegɔ la, ge ba mɛhe potɛn'ya te ba ne ta eŋɛ pa'alegɔ la n pa'alɛ te ba eta se'em la, ba eŋɛ pa'alegɔ bo ba mɛhe. 15Ge te ba etegɔ poan pa'alɛ te ba mi' sɛla te pa'alegɔ la bɔta. Ba potɛn'ya me pa'alɛ te lana wa dela sera wo ba mɛhe potɛn'ya n ne ta yele ba te ba tue ya bii ba ka tue. 16Yenɛ gankerɛ daarɛ han ta paɛ, yelesoma la te n tɔgɔra la yete la ana la bala. Yenɛ wan bahɛ te Yesu Krista n gankɛ yelese'a woo n boe nɛreba potɛn'ya poan. 17Ge lebena, yamam sɛba han de Yudoma la kɔ'ɔn dekɛ ya mɛhe bo pa'alegɔ la, ge ŋmɛ'ɛra ya nyɔn'ɔnrɔ te Yenɛ bote la yamam ma'an ge nɛra ka le pa'ahɛ yɛ'ɛha, 18ya han mi' pa'alegɔ la zuo, ge mi' Yenɛ n bote ya eŋɛ se'em la, ge tɛn'ɛhɛ ya potɛn'ya soŋa soŋa te yamam ba mina pa'alegɔ la mɛ, 19ya han wan ta'an pa'alɛ se'em n de fɔa ge me le de'a sɛba n de nɛɛhom bo sɛba n boe lika la, 20ya han kan'an na gɔɔnɔ ge me pa'ala bonbilipaalehe ya n dekɛ pa'alegɔ la mina yelemɛŋɛrɛ la zuo, 21ya se'em n pa'alɛ ya taaba la, bene te ya ka pa'ala ya mɛhe? Ya yeti ba da zuunra, yamam mɛhe ka zuunre? 22Ya yeti ba da gan'ara la ba tadaana pɔga bii sera, ge ya gan' la ho tadaana pɔga? Yamam yeti ya kihi baga, ya ka faanrɛ baga lɔgɔrɔ? 23Ya ŋmɛ'ɛre nyɔn'ɔn la yan tare pa'alegɔ la ge ka na'aha Yenɛ te ya ka nana a pa'alegɔ la! 24Ge la golehɛ ti yamam zuo, daarɛ woo teŋa kayema kɛhega mam yu'urɛ. 25Ge ya han dɔla pa'alegɔ la ya ŋmaa la tare vɔnrɛ, ge ya han ka dɔla pa'alegɔ la ya ŋmaa la ka tare vɔnrɛ. 26Ge nɛrese'em han ka ŋmaa ge dɔla tuntɔɔ pa'alegɔ la, Yenɛ behere en wo a ŋmaa me n bala. 27Bala, se'em n ka ŋma' la ge dɔla pa'alegɔ la wan gankɛ yamam sɛba te ba ŋma' la ge me mina pa'alegɔ la ge ka dɔla pa'alegɔ la. 28Bala mea zan'an, dagɛ la nɛra se'em n yenzuo ŋmaa n de Yuda nɛra. Ge, se'emdaana n seren de Yuda nɛra a suunre poan, enŋa n de Yuda nɛra. 29Wana vɔnrɛ dela a daana suunre kɔ'ɔn de'a la Yenɛ denɛ ma'an. Dena wa me dela Yenɛ Sea n ete de bala, ge dagɛ pa'alegɔ te ba golehɛ la n ete dɛ. Bala, nɛra se'emdaana n dekɛ a suunre te ka kɔ'ɔn de'a la Yenɛ denɛ ma'an la, to'ohe a pɛnka la Yenɛ zen'an ge dagɛ la nɛresaaleba zen'enhen.

will be added

X\