Rom 15

1Tomam sɛba n sɛ' ze'ele Yesu sore dɔlɔga la poan la dela to soŋɛ sɛbadoma n nan ka sɛ' ze'ele de poan la. Ge da bahɛ ya te to behɛ la to mɛhe ma'an yele. 2Ge ton bahɛ ya te to tone ya sɛla n wan tara som la popeelom bo sɛba n dole Yesu sore la, te ba malom sɛ' ze'ele Yesu sore la poan. 3Te Krista daa ka behere la a mea ma'an yele, wo lan golehɛ se'em la, Toorɛ se'a woo n toore hom la sigere la mam zuo. 4Ge sɛla woo n golehɛ yɛta la, daa golehɛ pa'ala la tomam. Se'ere n sɔe la la dela Yenɛ gɔŋɔ la n golehɛ yɛta se'em la n soŋorɛ tɔ te to din'inha suunre gura ge tara suguru ge me kan'ana tɔ. 5Ge mam sohore Yenɛ se'em n bo'ore sugure ge kan'ana nɛreba la, wan bahɛ ya te ya tara nɔyenɛ la taaba. Ge eta wo Yesu Krista n daa ete se'em la. 6Te bala te ya zanwaabe wan lagom la nɔyenɛ pɛngɛ Yenɛ se'em n de to Daana Yesu Krista Sɔ' wa. 7Bala, to'ohe ya taaba soŋa soŋa wo Yesu Krista n to'e ya soŋa soŋa se'em la. Te ya han eŋɛ wana, nɛreba wan dekɛ pɛnka bo Yenɛ. 8Te n yele ya te Yesu Krista daa wa'ana te a tona bɔ'ɔra Yudoma la a ta'an pa'alɛ te Yenɛ wan seren eŋɛ sɛla te a yeti a eŋɛ la. Ge a me bahɛ te Yenɛ n daa biŋe a nɔɔrɛ bo tɔ sɔyaabdoma se'em la wa'an sera na. 9Ge a me bahɛ te sɛba n dagɛ Yudoma la pɛngɛ Yenɛ n tare nɛreba ninbɔn'ɔn la zuo. Wo lan golehɛ yeti, Yele ana wa zuo te mam wan zɛnkɛ hom yu'urɛ nɛra woo nɛŋan ge yoon pɛngɛ ho yu'urɛ wa. 10Le yɛ'ɛha, la yeti, Teŋhe wa, nyeene ya la Na'ayenɛ nɛreba wa. 11La le yeti, Teŋhe wa zan'an, pɛngɛ ya Na'ayenɛ. Nɛreba woo, pɛngɛ a yu'urɛ la. 12Le yɛ'ɛha Isaiah yeti, Yesse nyɛgerɛ la wan ze'ele dɛna danlehom bo nɛreba la, te teŋhe bibigera kena a zen'an na. 13Bala, mam sohore Yenɛ se'em n bahere te nɛreba din'inha sunya gura bahɛ ya te ya tara popeelom la sunma'ahom yan nam en se'em la zuo. Te bala, Yenɛ Sea paŋa la wan bahɛ te yan din'inhe sunya gura la kelom zɔ'ɔra kena ha. 14Ge n sɔɔnrɔ, mam mea mi' soŋa soŋa te ya kɔ'ɔn dɛna la nɛresondoma. Ge me kɔ'ɔn mina sɛla woo n nare ya eŋɛ la ya ta'an pa'ala taaba. 15Ge n golehɛ ya gɔŋɔ wa tɔgɔrɛ ya n pelega yɛhera yɛla a se'a te n tɛn ya te ya baŋɛ yɛ'ɛha. Se'ere n sɔe la, Yenɛ n dekɛ a paŋa bo mam la zuo, 16Mam dela Yesu Krista tontona tona bɔ'ɔra Yenɛ mɔɔla yelesoma la bɔ'ɔra sɛba n dagɛ Yudoma la. Mam tone mɛ wo malemadaana la, te sɛba n dagɛ Yudoma la wan dɛna bo'olom sebo n tegɛ Yenɛ nini te Sea la tara bɔ'ɔra en. 17Ge nananawa mam dole Yesu Krista sore la te n ŋmɛ'ɛre n nyɔn'ɔn la mam tone bɔ'ɔra Yenɛ la. 18N wan tɔgɛ la boraanɛ yelese'a te Yesu Krista eŋɛ bo mam la, la n bahɛ te sɛba n dagɛ Yudoma la nana Yenɛ. A eŋɛ wana wa doohe la tɔgom la tooma, 19la yelekerehe tooma zo'e zo'e la Yenɛ Sea la paŋa poan. Bala, mam n daa ze'ele Yerusalem teŋa yɛ'a Ilirikum teŋa poan la, n daa mɔɔlɛ Yenɛ yelesoma la woo mɛ yɛhera Yesu Krista yele zen'an woo mɛ. 20Ge yele yenɛ ma'an n boe mam zen'an. De me dela n kɔ'ɔn mɔɔlɛ Yenɛ yelesoma la bo zen'se'ehe n nan ka tabelɛ wom a. Te n han eŋɛ dena wa, la kan dɛna la n sɔe la ayema n pin'ilom sɛla tona pa'aha. 21La golehɛ yeti, Ban ka tabelɛ yele ba sɛla la, ba nini wan nyɛ la, ban ka tabelɛ yele ba se'ere la, ba wan pon bɔkɛ dɛ. 22Te wana mea zuo n sɔe te la gu' mam zo'e zo'e te n nyaŋɛ wa'an ya zen'an na la. 23Ge nananawa, mam nya ba'ahɛ n tone la teŋsena la, ge me daa pon bɔta yuuma kekeko ha te n wa'an na behɛ ya la, 24n eŋɛ n suunre te n eŋɛ dɛ la nananawa. N bote n han ta yɛ'a Spain teŋa poan, n doohe na behɛ ya. Gee te n han ta bɔna ya zen'an te ya eta mam soŋa te dabeha pɔregɛ, ya soŋa mam te n paɛ Spain teŋa poan la. 25Ge nananawa, n yɛ'a Yerusalem teŋa te n ta soŋɛ Yenɛ nɛreba la n boe bini la. 26Sɛba n de Yesu lagaŋɔ bɔna Makedonia la Greek teŋhe poan la, tɛn'ɛhɛ lagahɛ ligiri te ba soŋɛ sɛbadoma n de nahadoma ge dɛna Yenɛ nɛreba bɔna Yerusalem teŋa poan la. 27La dela ba mɛhe n tɛn'ɛhɛ dɛ bala. Ge han dɛna la yelemɛŋɛrɛ, la dela ba toonɛ te ba soŋɛ sɛba n de nahadoma bini ha la. Se'ere n sɔe la, la dela Yudoma sɛba n dole Yesu sore la n daa bahɛ te nɛreba yehe ba poan keŋɛ ta tɔgɛ Yesu yɛla bo sɛba n dagɛ Yudoma. Bala, te sɛba n dagɛ Yudoma la me yeti ba soŋɛ Yudoma la la lɔgɔseto n wan soŋɛ ba ba bɔŋa teŋa zuo. 28Bala, n han ta bahɛ toondena wa ge baŋɛ soŋa soŋa te ba to'e ligiri la waabe te ba lagahɛ bo ba la n wan doohe na behɛ ya han ta yɛ'a Spain teŋa poan. 29Ge mam mi' te n han wa'an na, ya wan kɔ'ɔn nyɛ' Yesu Krista kan' som zo'e zo'e la ya zen'an. 30Ge n sɔɔnrɔ, ton nam to Daana Yesu Krista se'em la zuo, la nɔŋɔ se'ere te Yenɛ Sea dekɛ bo to la zuo, n bene ya mɛ te ya lagom la mam n tooma la poan sohora Yenɛ bɔ'ɔra mam. 31Ge soha Yenɛ bo mam te sɛba n boe Yudea teŋa poan ge ka nam Yesu Krista la da ton mam be'em. Ge te Yenɛ nɛreba la n boe Yerusalem teŋa la n boe Yudea teŋa poan la to'e soŋorɛ se'ere te n soŋora ba la la popeelom. 32Dene poan, n han ton dena wa ba'ahɛ, ge te Yenɛ bo ɔ sore, n wan wa'an ya zen'an na la popeelom. Ge te n yehego wa poan wa wan bo mam popeelom la vo'ohogo. 33N sohore te Yenɛ se'em n bo'ore nɛreba sunma'ahom la bɔna la ya. Taarɛ.

will be added

X\