Rom 13

1Nɛra woo wom te a nana a teŋa zuodoma nɔɔrɛ. Se'ere n sɔe la, la dela Yenɛ n bahɛ ba te ba de'a zuodoma wa. 2Ge hon se'em n zagahɛ zuodoma sɛba n sɔe ya behera la nɔɔrɛ, a daana me zagahɛ la sɛla te Yenɛ eŋɛ la. Te hon se'emdaana n eŋɛ lana wa tare la namehegɔ bɔ'ɔra ho mea. 3Te sɛba n tone sɛla n de ma'an ka zote dabeem la ba zuodoma. Ge sɛba n ton tona sɛla n de be'em n zote dabeem la ba. Ho han ka bɔta te ho zɔta dabeem la nɛra se'em n de zuodaana la, ye tone ya sɛla n de ma'an. Ge bala te a wan pɛngɛ hɔ. 4Ba dela Yenɛ yameŋa tona sɛla n wan dɛna hon som. Ge ho han tone la sɛla n de be'em la dela ho zɔta dabeem la en. Se'ere n sɔe la, a kɔ'ɔn tara paŋsɛka te a wan namehɛ ho la mɛ a nu'uhen. Ba dela Yenɛ yameŋa ge te Yenɛ soŋorɛ poan, te ba namehɛ sɛbadoma n tuure. 5Bala, dena zuo, de ya sɛba n wan nana ya zuodoma nɔɔrɛ, dagɛ la Yenɛ namehegɔ la zuo, ge ya mɛhe potɛn'ya n tɛn'ɛhe bala la zuo. 6Bala zuo, la dela ya me yɔɔra ya teŋa la koberɛ. Se'ere n sɔe la, zuodoma la tone bɔ'ɔra la Yenɛ la ban tone sɛla n de ba tona la. 7Dene poan, yɔ ya ba sɛla te ya tara la ba. Te koberɛ sebo taaba te ba yeti ya tare la, ya yɔ ba. Ge me bɔ'ɔra ba na'ahegɔ, ge nana sɛla woo te ba yɛta la. 8Ge da tare ya se'em sanɛ han dagɛna ya tara nɔŋerɛ bɔ'ɔra taaba. Te hon se'em n tare nɔŋerɛ bɔ'ɔra nɛreba, hon daana n nane pa'alegɔ la. 9Nɔya bana wa dela: Da gan'anrɛ la ho tadaana pɔga bii ho tadaana sera. Da ko' nɛra. Da zun'. Da bahɛ te ho potɛn'ɛrɛ bɔna nɛra bonɔ poan. Nɔɔrɛ ana wa zan'an la n pa'ahɛ la lagom dɛna la yele deyena, Nɔŋɛ ho tadaana wo hom n nɔŋɛ ho mɛŋa se'em la. 10Hon se'em n nɔŋɛ ho tadaana, kan ton be'em bo en. Te se'em n tare nɔŋerɛ n de se'em n dole pa'alegɔ la zanwaabe. 11Bala eŋɛ ya dena wa. Se'ere n sɔe la ya mi' te de daarɛ la paɛ ya te ya ihege ya gɔɔm la poan. To faanrɛ la kɔ'ɔn pɔnra mɛ gana daanse'ere daarɛ te to daa pin'ilom nam Yesu la. 12Te la ane me wo yu'uŋɔ la pɔregɛ mɛ te beere pɔnra yelegerɛ la. Bala, bahɛ ya te to bahɛ likatooma la ge bahɛ ya te to dekɛ ya zabera lɔgɔrɔ la ton la sɛla n boe nɛɛhom poan. 13Ge bahɛ ya te to tara to mɛhe soŋa soŋa wo nɛreba n boe nɛɛhom poan ge dagɛ lika poan la. Ge da bahɛ ya te kɔ'ɔn dɛna daamnyuureba eta yelese'a wo te daamnyuureba eta la. Bii to dɛna yalomdoma eta yelese'a te yalomdoma tona la. To me da le zabera bii nyuuna. 14Dekɛ ya Yesu Krista zaberɛ lɔgɔrɔ la gu'ura ya. Da dekɛ ya ya mɛhe dɔla ya iŋganɛ la ge nana denɛ n bote se'em la.

will be added

X\