Rom 12

1Bala, n sɔɔnrɔ, Yenɛ n kɔ'ɔn tara ninbɔn'ɔn bo to la zuo, n yeti ya dena wa la ninmɔ'ɔrɛ wa. Te ya dekera la ya mɛhe bɔ'ɔra Yenɛ wo ya koora la ya mɛhe bɔ'ɔra en la ge kelom vɔna. Te sɔrɔɔ seko te ya wan po'oha Yenɛ ma'an n bala. Ge la ya kɔ'ɔn me tona a tooma te a suunre eta nyɛlom. 2Ge da dekɛ ya ya mɛhe eta yelese'a te teŋa wa zuo woo eta la. Ge ton bahɛ ya te Yenɛ tee ya suunre te a ta'an nyɛ' potɛn'ɛrɛ paalega. Te bala te ya nya wan mina sɛla te Yenɛ bɔta, wo yelese'a n ane soŋa ge eta Yenɛ suunre nyɛlom. 3Ge Yenɛ bo'olom sebo n ka lebehe yɔɔra la te a kɔ'ɔn dekɛ bɔ'ɔ la zuo, n yele ya dena wa. Te ya mina mina da behɛ a mea tɛn'ɛhɛ, te enŋa ba de'a la nɛrekantɛ gana zan'an ge me dagana. Ge a daana ton tɛn'ɛha te sɛla n de ma'an ge magaha a yɛla yɛhera la Yenɛ n bahɛ en te a nam en se'em. 4To mi' te nɛra iŋa wa tare la lɔgɔrɔ yema yema te lɔgɔtona wa me tooma boe la yema yema. 5Te bala mea n bala, bii la te pon dena yema yema wa, to lagom taaba de'a boyena la Yesu Krista. 6Yenɛ daa eŋɛ som bo nɛra woo a tone a toonɛ. Bala, la sontii nɛra woo tona bala. Te tooma la han de'a la to mɔɔlɛ Yenɛ yelesoma, la dela to mɔɔlɛ dɛ yɛhera la to n nam Yenɛ se'em. 7La han le de'a la to soŋora sɛba n dole Yesu sore la, la la dela to soŋora ba. La han le de'a la to pa'ala ba, la dela to pa'ala ba. 8La han de'a la to kan'ana ba, la dela to kan'ana ba. Te hon se'em n tare sɛla te ho tara soŋora la nɛreba, la dela ho eta dɛ la ho suunre zan'an. Ho me se'em de zuodaana, la dela ho tona sɛla n de ho tona. Te se'em n tare nɛreba ninbɔn'ɔn me, la dela a eta dɛ la popeelom. 9Ge mini ya la ya seren nɔŋɛ ya taaba. Ge da le nɔŋɛ sɛla n de be'em ge ton gorɛ ya sɛla n de som. 10Nɔŋerɛ ya taaba wo la dela sɔɔnrɔ nɔŋɛ taaba se'em la. Ge me kɔ'ɔn bo'ore ya taaba na'ahegɔ. 11Tone ya kpe'eŋkpe'eŋo ge da tare ya zinyangarɛ kɔ'ɔn dole ya to Daana Yesu, la ya sunya zan'an ma'an. 12Bahɛ ya te sɛla te ya gura la bahɛ ya te ya tara popeelom. Tare ya suguru ya daaŋɔ poan ge me kɔ'ɔn sohore ya Yenɛ daarɛ woo. 13Bo'ore ya sɛba la yamam n lagom dɔla Yesu sore la sɛla te ba bɔta. Ge de ne ya sɛba n wan tɔ'ɔha saama ya yiya poan soŋa soŋa. 14Ge sohore ya Yenɛ te a eŋɛ som bo sɛbadoma n namehere ya la ge da kan'an kan'be'ero bɔ'ɔra ba. 15Tare ya popeelom la sɛba n tare popeelom. Ge me kɛla la sɛba n kele. 16Ete ya nɛra woo boyena. Ge da zɛnkere ya mɛhe saazuo, Ge ton sirihe ya ya mɛhe tona bɔ'ɔra nɛreba. Da dekɛ ya ya mɛhe tɛn'ɛha te yamam dela yamdoma. 17Ge nɛra han eŋɛ sɛla n de be'em bo ya, eŋɛ ya sɛla n de som bo en. Kpeŋe ya mɛhe la ya eta sɛla te nɛreba behera la te la dela ma'an. 18Ge han de'a la yamam tɔka, eŋɛ ya sɛla te ya wan ta'an eŋɛ la ya tare ya sunma'ahom la nɛra woo. 19N zɔdoma, da legehere ya be'em bɔ'ɔra sɛba n tone ya be'em. Ge ton bahɛ ya te Na'ayenɛ ihege suunre la ba. Te Yenɛ gɔŋɔ la golehɛ yeti, Mam n de lɛta n wan lerege. Na'ayenɛ n yele. 20Bala la, Ho diŋdaana kom han dona, bo en dia te a di. Ko'nyuuro han tara en, bo en ko'om te a nyu. Se'ere n sɔe la, ho vaare la bugumsaana la bugum pagela a zuo. 21Da bahɛ ya te be'em nyaŋɛ ya sɔna ya behera. Ge ton tone ya sɛla n ane soŋa la ya nyaŋɛ sɛla n de be'em.

will be added

X\