Rom 11

1Ge mam yele ya te Yenɛ ka zagahɛ a mea nɛreba Israeldoma. Aai. Mam mea dela Israel nɛra ge me dɛna Benyaminbiihe. Te n sɔyaaba me da la Abraham. 2Ge Yenɛ ka zagahɛ a nɛreba sɛba te a daa loe yia la. Ge ya mɛhe mi' zen'an bɔba te Yenɛ gɔŋɔ la yɛta te nɔtɔgɔha Eliya daa tɔgɛ la ninmɔ'ɔrɛ bo Yenɛ yɛhera la Israeldoma yele te, 3To Daana, ba ko' ho nɔtɔgɔheba la zan'an mɛ ge wɔnrɛ ho kaanbegɔ zen'enhen la. Mam ma'an n gee, te ba zegera te ba ko' mam me. 4Ge Yenɛ daa lebehe Eliya yeti, Ge la bala zan'an, mam tare nɛreba tuha ayopɔe Israel teŋa wa poan n ka na'ahe Baal. 5Bala mea, nananawa te Yenɛ n loe sɛba n fiin wa yee a som zuo. 6Ge Yenɛ n kɔ'ɔn eta som bɔ'ɔra ba la zuo, te a loe ba la. Ge la dagɛ la ban tom toonse'a la zuo. Se'ere n sɔe la, Yenɛ han loore ne nɛreba la ban ete sɛla la zuo, la ye kan dene sera te Yenɛ kɔ'ɔn eta la som bɔ'ɔra nɛreba. 7Te bene nya sɔe te Israeldoma daa ka nyɛ' sɛla te ba bɔta la? La dela ba fiin wa, sɛba te Yenɛ daa loe n daa nyɛ' sɛla te ba daa bɔta la. Ge te basɛba n daa yee la toba daa le' mɛ te ba ka wom Yenɛ yi'a la. 8Wo gɔŋɔ la n golehɛ se'em la, Ge tara tara la zina wa Yenɛ ka bo ba potɛn'ɛrɛ se'ere n bɔkere yɛla, bii nini se'e n nyɛte bii tobese'a n wone. 9Ge Naba David daa yele ba yeti, Bahɛ te ba mɛhe dia zen'en lebege bɛnregɔ, te ba soka zen'an dɛna bɛnregɔ bo ba. 10Bahɛ te ba nini nyanlegɛ te ba da nyɛta, te ba sɛɛhe damɛ te ba gɛnta. 11Bala, mam yele ya te ba n daa tom be'em bala la, la daa bahɛ te ba sagom ba mɛ? Aai. Yudoma la n ton be'em la zuo n sɔe te sɛba n dagɛ Yudoma la me nyɛ' faanrɛ, te Israeldoma la nyuuna la ba. 12Te Yudoma la toonbe'ero la zuo te Yenɛ daa eŋɛ yelese'a n ane soŋa bo sɛba n dagɛ Yudoma la. Yudoma la han tona sɛla n de ma'an, Yenɛ wan eŋɛ som bo teŋa wa nɛreba gane bala pa'ahɛ. 13Ge nananawa, n nya tɔgɔre bɔ'ɔra la yamam sɛba n dagɛ Yudoma wa, te toonse'ere te n tona bɔ'ɔra ya wa dela ninmɔ'ɔrɛ toonɛ. 14Te daanse'ere n ta'an bahɛ te n mea buuri Yudoma wa nyuuna te ba poan basɛba wan nyɛ' faanrɛ. 15Te Yenɛ n daa zagahɛ ba la, sɛba n daa dagɛ Yudoma la daa nyɛ' sore dɛna zɔtɔ la Yenɛ. Nananawa Yenɛ han wan to'e ba, la wan ane wo kum n le lebe vɔna la. 16Bala, ho han gɛn'ɛn boroboro dideema bo Yenɛ, boroboro la zanwaabe ye kɔ'ɔn de'a toolom bo Yenɛ. Ge te ho han me yeti tia wa nyɛga dela Yenɛ denɛ, tia la zan'an kɔ'ɔn de'a la a denɛ. 17To mi' te nɛra han ŋma' tia yila ge tare na toŋe la ayema yile, yile se'ere te a tare na toŋe la wan zo'e. La han dɛna te tia yila n boe va'ame te nɛra ŋma' bahɛ ge te tia yile n boe mɔɔ ha te nɛra tare na toŋe la tia la te la wan zo'e ge vɔna te ba tare nyɛga ayena la zuo. 18Bala, yamam me da pa'ala ya mɛhe la nɛresɛba te Yenɛ yelege bahɛ wo ba ŋma' la tia yila bahɛ la. Bala, ya kan ta'an pa'ala ya mɛhe. Se'ere n sɔe la, ya ane me wo tia yile la. Dagɛ yamam n wan bahɛ te nyɛga la vɔna ge la ton de'a la nyɛga la n wan bahɛ te yamam vɔna. 19Ge ya wan yeti, Ɛɛn, la ane wo ba ŋma' la yila la bahɛ te fole bɔna bo yilese'ere n boe mɔɔ ha la. 20Ge ya han yele wana la de sera. Se'ere n sɔe te Yenɛ daa zagahɛ Yudoma wo ba ŋma' tia yile la daa dela ba daa ka nam Yenɛ. Ge te yamam me sɔe bɔna bini la yan nam Yenɛ la zuo. Ge da bahɛ ya te ya dekɛ wana wa pa'ala la ya mɛhe. Ge ton bahɛ ya te dabeem tara ya. 21Te Yenɛ daa han ka bahɛ Yudoma n boe kena ha wo tia yila n zo'ore se'em la ya tɛn'ɛhe te a wan ton bahɛ la yamam ya han ka nam en? 22Bala, behɛ ya Yenɛ n ete som ge me gankera la sunsunyiim se'em. Te Yenɛ ete sunsunyiim gankera la sɛbadoma n tone be'em. Ge me ete som bɔ'ɔra yamam wo ya han kɔ'ɔn eta sɛla n wan bahɛ te a bɔta a eta som me bɔ'ɔra ya. Ge ya han ka eta bala, a me wan zagahɛ ya bahɛ. 23Ge Yudoma la han nya lebena nam Yenɛ, a wan le to'e ba. Se'ere n sɔe la, Yenɛ ta'an eŋɛ la. 24Ge yamam sɛba n dagɛ Yudoma wa ane wo tisɛka n yehe mɔɔ ha la yile te ba ŋma' na toŋe la tisɛka te ba kɔɔra behera soŋa soŋa la. Ge Yudoma la ane me wo tisɛka te ba kɔɔra behera soŋa soŋa la. Te dena wa ka kpe'em bo Yenɛ te a le dekɛ yila te ba ŋma' bahɛ la le toŋe tisɛka poan te ba ŋma' ba la. 25N sɔɔnrɔ, n bote ya baŋɛ la yelemɛŋɛrɛ se'ere te ya nan ka tabelɛ wom. De wan soŋɛ ya te ya kan tɛn'ɛha yan de yamdoma se'em. Yelemɛŋɛrɛ la me dela dena wa: Israeldoma wan zagahɛ te ba kan nam Yenɛ ka yeti la de'a la bala wuuha. Ge la yenzuo yuura mɛ tara tara la se'em ma'an te sɛba n dagɛ Yudoma kekeko la dekɛ ba mɛhe lɛm Yenɛ. 26Ge Israeldoma waabe n yeti ba nyɛ' faanrɛ se'em n wana: wo gɔŋɔ la n golehɛ se'em la, Faanra la wan yehe la Zion teŋa wa na. Yakob yaahe la woo wan yehe ba mɛhe be'em poan. 27Nɔɔrɛ se'ere te biŋera la ba n wana, n han yehe yelebe'ero wa ba zen'an bahɛ. 28Ge Yudoma la n zagahɛ yelesoma la zuo, te ba de'a Yenɛ diŋdoma wa. Te dena wa ton sɔe soŋɛ la yamam sɛba n dagɛ Yudoma wa. Ge Yenɛ n daa loe ba sɔyaabdoma la zuo te a me loe ba ge nɔŋɛ ba. 29Se'ere n sɔe la, Yenɛ ka teere a potɛn'ɛrɛ yɛhera la nɛresɛba te a loe ge eta som bɔ'ɔra ba la. 30Ge han dɛna la yamam n daa zagahɛ Yenɛ yia mɛ, nananawa Yenɛ zɔ ya ninbɔn'ɔn, ba zagahɛ ka nana en la zuo. 31Dene mea n bala, te Yudoma la n zagahɛ ka nana Yenɛ wa, a wan tare ninbɔn'ɔn bo ba, la n tare ninbɔn'ɔn bo yamam la zuo. 32Dene poan, Yenɛ daa eŋɛ nɛra woo te a ana wo a boe la paka deo poan la, ban zagahɛ ka nane en la zuo. Yenɛ daa eŋɛ dena wa te a ta'an pa'alɛ la enŋa n tare ninbɔn'ɔn bo ba waabe se'em. 33Yenɛ kɔ'ɔn ete la som bɔ'ɔra nɛreba. A me le kɔ'ɔn dɛna la yamdaana ge me tara potɛn'sonɛ. Bala, ane n wan ta'an baŋɛ Yenɛ potɛn'ɛrɛ? Ane n wan ta'an bɔkɛ Yenɛ n tɛn'ɛhere se'em? 34Ane n mi' to Daana Na'ayenɛ potɛn'ɛrɛ n de se'em? Ane n wan ta'an kan'an en? 35Ane n tabelɛ bo en te a wan lerege en? 36Se'ere n sɔe la Yenɛ n daa naam sɛla woo. Te sɛla woo n boe wa dela enŋa zuo te la bɔna ge me le de'a a denɛ. Bala, pɛngere ya Yenɛ daarɛ woo. Taarɛ.

will be added

X\