Rom 10

1Bala, n sɔɔnrɔ, mam tɛn'ɛhe n potɛn'ɛrɛ poan ge sohora Yenɛ te a wan fan' n mɛŋa buuri Israeldoma wa bahɛ. 2Ge mam ta'an pa' ba poore te ba kɔ'ɔn bɔta te ba soha Yenɛ mɛ. Ge ba ka bɔkɛ sɔrɔɔ seko te ba dɔla soha Yenɛ la. 3Se'ere n sɔe la, ba ka mi' sɔrɔɔ seko te Yenɛ dekera nɛreba eta tontɔɔ nɛreba a nɛŋan. Ge te bama me zegera ba mɛhe n wan eŋɛ se'em ta'an dɛna tontɔɔ nɛreba Yenɛ nɛŋan. Bala te ba zagahɛ Yenɛ n ete se'em dekera nɛreba te ba dɛna tontɔɔ a nɛŋan. 4Krista wa'ana bahɛ te pa'alegɔ la ka le tara paŋa. Bala, se'em n nam en, Yenɛ yi'ire en la tontɔɔ nɛra. 5Ge Moses n daa golehɛ yɛhera nɛreba n wan de'a tontɔɔdoma Yenɛ nɛŋa wo ba han dɔla pa'alegɔ la, a daa yeti, Nɛra se'em woo n nane wan vɔna aŋa n bote se'em la. 6Ge Yenɛ gɔŋɔ la tɔgɔre Yenɛ n dekere nɛreba yi'ira tontɔɔ yɛhera la ban nam en se'em la te, Da soke ho mea te ane n wan zom ha? De vɔnrɛ dela ane n wan tare Yesu Krista sige na. 7Bii ho le soke ho mea te, Ane wan sige teŋa teŋa ha? De vɔnrɛ dela ane n wan bahɛ te Yesu Krista vo'e. 8Ge gɔŋɔ la n yele se'em n wana, Yelehom la kɔ'ɔn lɛm mɛ la ya, bo boe la ya nɔɔrɛn, la ya sunya poan. Tomam mɔɔlɛ yelehom sebo te nɛreba nam Yenɛ n wana. 9Ge te ya han yele la ya nɔɔrɛ wa te, Yesu n de to Daana ge me nam ya sunya wa poan te Yenɛ n daa bahɛ en te a vo'e a kum la poan, ya wan nyɛ' faanrɛ. 10Te Yenɛ dekere tɔ yi'ira tontɔɔdoma a nɛŋan la ton nam to sunya poan se'em. Ge me faanra tɔ bahɛ la yele la, te to tɔgɛ la. 11Ge gɔŋɔ la yeti, Se'em n nam Yenɛ, Yenɛ kan zagahɛ en. 12Te wana wa yele bo la nɛra woo. Se'ere n sɔe la, Yudoma la sɛba n dagɛ Yudoma lagom de'a la boyena Na'ayenɛ nɛŋan. Na'ayenɛ dela nɛra woo daana. Ge eta som bɔ'ɔra se'em woo n sokerɛ en. 13Wo gɔŋɔ la n yele se'em te, Se'em woo n dole Na'ayenɛ yu'urɛ la wan nyɛ faanrɛ. 14Ge ban wan eŋɛ la wane ta'an sɔkera en, ba han ka nam en? Ge ba wan eŋɛ la wane le ta'an nam en, ba han ka wom yelesoma la? Ge ba wan eŋɛ la wane le ta'an wom yelesoma la ba han ka mɔɔlɛ dɛ bo ba. 15Ge ban wan eŋɛ la wane ta'an mɔɔlɛ yelesoma la, ba han ka tom tontoneba la te ba yehe? Wo gɔŋɔ la n yele se'em yeti, La dela yelesonɛ te tontoneba tare yelesoma la kena na mɔɔla. 16Ge dagɛ nɛreba woo n nane yelesoma la. Ge Isaiah daa pon yele dena wa mɛ te, Ane n sakɛ bo to yelehom wa? 17Bala, yelehom la dela Yesu Krista yele, ge te nɛreba han ta mɔɔlɛ a nɛreba wan wom ge sakɛ dɛ. 18Ge mam yele ya, te la kɔ'ɔn dɛna la yelemɛŋɛrɛ te ba wom yetɔgom wa mɛ. La de sera te ba wom dɛ wo gɔŋɔ la n golehɛ se'em te, Yetɔgom paɛ teŋa wa logerɛ woo poan mɛ. 19Ge n le yele yɛ'ɛha te Israeldoma pon mina dɛ mɛ. Bene zuo? Yenɛ bahɛ a nɔtɔgɔha Moses golehɛ yeti, N wan bahɛ te ba nini tɛnta la sɛba te ba ka nam ba. N wan dekɛ teŋsɛka en ka tare bɔkerɛ, te ka nyiihe ba suunre. 20Le yɛ'ɛha, Yenɛ nɔtɔgɔha Isaiah daa tɔgɛ yetɔgɔsomɔ yeti, Nɛreba n daa ka eere mam, nyɛ' mam, ge mam pa'alɛ n mea bo nɛresɛba n ka sokerɛ mam yele. 21Ge Israeldoma yele, a daa yeti, Daarɛ woo mam tɛɛn n nu'uhe la bala gura te n to'e nɛresɛba sunya n kaanbɛ, ge te ba dɛna toonbe'erodoma.

will be added

X\