Rom 1

1Mam Paul se'em n de Yesu Krista yameŋa te Yenɛ loe mam te n de'a Yesu tontoneba mɔɔla a yelesoma la. 2Yelesoma la te Yenɛ n daa biŋe a nɔɔrɛ la n wana: wonse'ere ha la a daa bahɛ te a nɔtɔgɔheba la tɔgɛ yelesoma la ge golehɛ eŋɛ a gɔŋɔ la poan. 3La dela a dayɔa, wo n de saala la, ba daa dɔgɛ en te a de'a la David yaaŋa. 4Ge le lɛbera Yenɛ bɔba me, Yenɛ daa vo'e en a kum la poan te a pa'alɛ a paŋa te a de'a a dayɔa, to Daana Yesu Krista. 5La dela Yesu zuo te Yenɛ zo'ohe tɔ ge bahɛ te to de'a Yesu tontoneba. A daa eŋɛ dena wa te to bahɛ te teŋa wa woo nɛreba sakɛ bo en ge nana en. 6Yamam Arom teŋa nɛreba me lagom pa'ahɛ sɛba woo te bayi' te ba de'a Yesu Krista nɛreba la poan mɛ. 7N golehere bɔ'ɔra yamam Arom teŋa nɛreba, sɛba te Yenɛ nɔŋɛ ge loe ya te ya de'a a mea nɛreba la. To Sɔ' Yenɛ la to Daana Yesu Krista wan soŋɛ ya ge bo ya sunma'ahom. 8Bala, yia poan, n dekɛ la Yesu Krista yu'urɛ poan po'ohɛ Yenɛ bo ya waabe. Se'ere n sɔe la, teŋa wa zuo woo nɛreba tɔgɔre yan nane Yesu Krista se'em. 9Yenɛ se'em te mam tona bɔ'ɔra en la n suunre zan'an la tɔgɔre yelesoma a dayɔa yele la, n mi' te mam tɛnre ya yele 10daarɛ woo n po'ohegɔ poan. Nananawa, n po'ohere ge sohora Yenɛ te a han bo ɔ sore, n wan wa'ana behɛ ya. 11Mam bote n nyɛ' ya mɛ se'ere zuo n sɔe la n ta'an tɔgɛ ne bo ya. Te ya nyɛ' Yenɛ Sea som la zen'en la ya malom nyɛ' paŋa ya sakerɛ la poan. 12Ge mam yeti sɛla wa vɔnrɛ dela ya wan nyɛ' paŋa pa'ahɛ ya sakerɛ la poan yɛhera la mam nam se'em. Ge te mam mɛŋa me wan nyɛ' paŋa pa'ahɛ n sakerɛ la poan yɛhera la yamam me n nam se'em la. 13Dene poan, n sɔɔnrɔ, mini ya te n ne zegera te n wa'ana behɛ ya ge n zege koŋɛ mɛ. N bote ne te n nyaŋɛ la nɛresɛba n nan yeti ba dekɛ ba mɛhe bo Yesu ya zen'en wo mam nyaŋɛ nɛreba teŋhe sese'ehe te ba nam Krista se'em la, 14Bala, mam tare la toonɛ te n tom bo nɛra woo, yamam sɛba n tɔgɔrɛ Greek bii yamam sɛba n ka tɔgɔrɛ Greek bii yamam sɛba n ta'an kan'anla, la yamam sɛba n ka ta'an kan'anla la. 15N kɔ'ɔn mɔ'ɛ la nini te n wa'an Arom teŋa poan na wa mɔɔlɛ Yenɛ Yelesoma la bo nɛra woo. 16Ge mam ka tare vi' la Yenɛ yelesoma la poan. Se'ere n sɔe la, la dela Yenɛ paŋa poan te a faanra sɛba woo n nam Yesu la bahera. Yudoma zen'enhen yia nya le ta' sɛba n dagɛ Yudoma me zen'enhen pa'ahɛ. 17Se'ere n sɔe la la dela nɛresɛba n wom a yelesoma la gee nam Krista te Yenɛ eŋɛ ba yelemɛŋɛrɛdoma. Wo la pon golehɛ Yenɛ gɔŋɔ poan yele se'em la. La yeti, Se'emdaana sakerɛ n bahɛ te a de'a yelemɛŋɛrɛdaana wan tara vom. 18Ge Yenɛ n boe saazuo ha wan bahɛ te be'emdoma sɛba n gu'ure te nɛra ka mina yelemɛŋɛrɛ la wan nyɛ' namehegɔ. 19Se'ere n sɔe la Yenɛ mea n bahɛ te nɛrebɛ'ɛhe wa bɔkɛ soŋa soŋa Yenɛ Yɛla la n an se'em. 20Ge se'em ma'an te Yenɛ n daa maalɛ teŋa la ta paɛ zina beere wa, teŋa wa nɛreba nyɛ' Yenɛ la a paŋa n an se'em yɛhera la sɛla woo te a maalɛ la. Se'ere n sɔe la nɛreba la kan le ta'an yeti bama tue mɛ la yelese'a te ba tona la. 21Ba baŋɛ Yenɛ ge ba ka bo'ore en na'ahegɔ seko n nare ba bɔ'ɔra en la. Ge me ka po'ohera en la yelese'a te a eta bɔ'ɔra ba la. Ba ton tɛn'ɛha la tɛn'ɛyooro bii ba potɛn'ya zan'an boe la lika poan. 22Ba dekɛ ba mɛhe yi' la yamdoma ge de'a gɔɔnɔ. 23Ba ka po'ohere Yenɛ se'em n tare vom la. Ge ba ton kaanbera la baga te nɛreba maalɛ te ba ana wo nɛresaala, n ane se'em bii niihe la dunhe la bonsɛ'doma n ane se'em me la. 24Te nɛreba toba kpa'a la zuo te Yenɛ dekɛ ba tehɛ te ba eta toonbe'sebo woo te ba sunya bɔta, ge te ba tona vitooma la taaba. 25Ba dekɛ la Yenɛ Yɛla la n de yelemɛŋɛrɛ la te de de'a ponpɔrɔŋɔ. Ge po'oha bɔ'ɔra sɛla te Yenɛ ton maalɛ la, ge bahɛ maala la a mɛŋa, se'em n ton nara ba pɛngera en wuuha la! Taarɛ. 26Te nɛreba etekona wa zuo, te Yenɛ bahɛ ba te ba eta ba potɛn'yaalehe etegɔ. Ge te ba pɔgɔba me tona yalomtooma la ba pɔgɔtadaandoma. 27Sodene mea n bala te boraahe la me eta. Ba bahɛ pɔgɔhe gan'an sɛla te Yenɛ eŋɛ te ba eta ge ton bɔta ba gan'an la ba boraa tadaandoma. Ge te boraahe kaanbɛ ta gan'an la boraahe. Bala, te Yenɛ nameha ba ba toonbe'ero la zuo. 28Ge nɛreba la n daa ka sakere te ba zamehɛ ba mɛhe Yenɛ Yɛla la zuo, te bala te Yenɛ dekɛ ba bahɛ te ba potɛn'yooro la poan te ba kɔ'ɔn tɛn'ɛha la be'em ma'an ge eta sɛla n dagɛ ba eŋɛ. 29Ba sunya zanwaabe kɔ'ɔn de'a la be'em yema yema. Ge me tona pototooma la nyika ge tona be'em la taaba, ge nyuuna ge koora nɛreba ge zabera ge parona ge me tɛn'ɛha be'em bɔ'ɔra nɛreba. Ba me dela yelebibihedoma 30ge me tɔgɔra be'em sagom na taaba yuya. Ba dela Yenɛ diŋdoma. Ba toore taaba ge zɛnkera ba mɛhe saazuo ge ŋmɛ'ɛra ba nyɔn'ɔnrɔ pa'ala ba mɛhe. Ba me kɔ'ɔn tɛn'ɛha la sɔrɔɔ seto te ba wan tom be'em. Ba ka nane ba sɔdoma bii ba madoma. 31Ba dela toonyoorodoma, ge me ka le tona sɛla te ba mɛhe yeti ba eŋɛ. Ba dela potɔpa. Ba ka zote nɛreba ninbɔn'ɔn. 32Ba me mi' te Yenɛ kiha la pa'alɛ te nɛresɛba n boe bɔŋsɛka taaba te ba bɔna wa sontii ba kɔrom ba. Ge bala mea zan'an ba sine ge kelom tona a mɛ. Ge ba yeti, nɛresɛba n tone wana wa la, te ba tone la ma'an.

will be added

X\