Pukre 9

1Te Yenɛ soŋora se'em n pa'ahɛ bonuu la daa peebe a tentanɛ la. N eŋɛ bala la, n nyɛ' te ŋmarebila ze'ele saŋgbanɛ zuo lu' teŋa wa zuo na. Ba bo en la boko kantɛ la kparehega. 2Te a yu'ɛ boko kantɛ la. N eŋɛ bala la, zun'uhe n yehe na wo mɔɔ te ba nyɔ' zun'uhe la. Boko kantɛ zun'uhe la daa bahɛ te wontɛɛŋa la saŋgbanɛ la sobe mɛ. 3Sonwa'ara ze'ele zun'uhe la poan yehe wa'an teŋa wa zuo. Ba me bo ba paŋa wo naŋhe la. 4Ba yele ba te ba da sagom mɔɔrɔ la la tiihe la bii sɛla woo n yehere zɔ'ɔra. Ba yele ba te ba ta'an sagom nɛresɛba ma'an te ba ka daanlɛ ba gbɛ'ɛra pa'alɛ te ba dela Yenɛ nɛreba. 5Ba ka sakɛ te sonwa'ara la ko' nɛrebana wa. Ge ba namehɛ ba ŋmarehe senuu. Iŋduma sɛka te ba nyɛ' yɛhera la namehe kona wa la ane wo naŋa n dom nɛra te a wɔla se'em la. 6Te ŋmaresene poan la, nɛreba wan ɛɛra te ba ki'. Ge ba kan nyaŋɛ ki'. Ba wan bɔta te ba ki', ge sɛla n wan bahɛ ba te ba ki' kan bɔna. 7Sonwa'ara la ane wo yiri te ba mahona te ba zabɛ zaberɛ la. Ba tare la ba zuto poan bondoma te la ane wo sanlema muhe la. Ba nɛhe ane wo asaala nɛŋa la. 8Ba zonto wogɛ mɛ wo pɔgɔhe zonto la. Ge te ba nyɛna ana wo gbegenɛ nyɛna la. 9Ba dekɛ la bon la ayema n ane wo kuto fuo la pin' ba nyɔn'ɔnrɔ. Ge te ba kelompagehe damena wo yiri kekeko n date toroto vɔɔla yɛ'a te ba zaberɛ la. 10Ba tare zoya ge dona wo naŋhe la. Ba zoya la n tare paŋa la zuo, n wan bahɛ te nɛreba nyɛ' namehegɔ ŋmarehe senuu. 11Ba tare naba te a behera ba. Naba la dela Yenɛ soŋora se'em n sɔe boko kantɛ la behera. A yu'urɛ Yudoma yetɔgom poan dela Abadon ge te Greek yetɔgom poan dɛna Apolion. 12Namehe seko n de yia la tole ya. Ge dene n tole la, namehegɔ sugumnɔɔren boyi' wan wa'ana. 13Te soŋora se'em n pa'ahɛ boyoobe la peebe a tentanɛ la. N eŋɛ bala la, mam wom la konkore ze'ete sanlema kaanbegɔ daka la zen'en n ze' Yenɛ nɛŋan lɔga anaahe la poan yɛhera na. 14Te konkore la yele soŋora se'em n de boyoobe daana la tara tentanɛ la yeti, Lorege Yenɛ soŋoreba banaahe la te ba daa lo' Euprates Kolaa kantɛ la poan la bahɛ. 15Te ba lorege soŋoreba la banaahe la bahɛ. Ba maahene ba gura la wana ma'an wa, te ba ko' lɔgɔrɛ deyena nɛreba woo lɔga atan' la poan teŋa wa zuo. 16Ba yele mam sɛba n ban' yiri zabera zaba la kanlɛ n de se'em. Ba dela tansuga tuha pihiyi' sugumnɔɔren tuhe pia (200,000,000). 17Te mam n behere bon la n daa nɛɛ bo mam la, n daa nyɛ' yiri la la sɛba n ban' ba la. Ba tare la kuto fuseto n pin'inre nyɔn'ɔn bɔba. To daa mɔ'ɛ wo bugum la, ge sobe wo zunkiilom la, ge ana wo dɔnboolom la. Yiri la zuto daa ane me wo gbegema zuto la. Ge te bugum, la zun'uhe, la kuguse'a n dite la bugum daa ze'ele ba nɔya poan yehe na. 18Bugum namehe kona wa, la zun'uhe wa, la kuguse'a n dite la bugum wa daa ze'ele la yiri la nɔya yehe na. Ba daa yehe na ko' la lɔgɔrɛ deyena la nɛreba lɔga atan' la poan. 19Ge yiri la panhen bo la ba nɔya la ba zoya poohen. Ba zoya me ane me wo bonsɛ'doma n tare zuto la, ge te ba tara zose'a te ba tara dona te la wona nɛreba. 20Ge nɛresɛba n gee la ka ki' yɛhera la namehe kona wa la, kelom dɔla la sɛla te ba mɛhe maalɛ la mɛ. Ba ka go'e kaanbegɔ. Ba kelom kaanbera bɔ'ɔra la bonbɛ'ɛhe la bagase'a te ba dekɛ sanlema, la sanlenpeelega, la nyɔgom, la kuga, la dɔɔrɔ maalɛ la. Bana wa ka nyɛte, bii wona, bii ta'an kena. 21Nɛrebana wa daa ka tee ba potɛn'ɛra la ban koore nɛreba la, ge eta tiimtooma la, ge tona yalomtooma la, ge zuunra la.

will be added

X\