Pukre 8

1Pebila la lakɛ sɛla bayopɔe n dekɛ tabɛ pa'ahɛ boyopɔe, voole ka bo saazuo ha te la yue fiin wa. 2Te n nyɛ' Yenɛ soŋoreba bayopɔe la te ba ze'a Yenɛ nɛŋa. Ba bo ba la tentana ayopɔe. 3Te Yenɛ soŋora ayema tara sanlema laa daa wa'an na ze'ele kaanbegɔ zen'an la. Te ba bo en digilom kekeko te a dekɛ pa'ahɛ Yenɛ nɛreba sohoga la poan, nyɔ' ba sanlema daka la poan na'am gɔŋɔ nɛŋan. 4Te zun'uhe yɛhere digilom la dite la poan na. Zun'uhe la lagom mɛ la Yenɛ nɛreba sohogɔ zom ha. Bo ze'ele la soŋora se'em n ze' Yenɛ nɛŋa nu'uhen zom ha. 5Te soŋora la dekɛ sanlema laa la vaɛ bugum la kaanbegɔ zen'an la. N eŋɛ bala la, a nya dekɛ bo mɛ lobe bahɛ teŋa wa zuo na. Saa nyagere, ge damena, ge suna ge te teŋa me miim. 6Te Yenɛ soŋoreba bayopɔe la n tare tentana la maahom na te ba peebe ba. 7Te soŋora se'em n de yiadaana la peebe a tentanɛ la. N peebe bala la, saakuga la bugum n daa lagom la ziim n daa ka'are teŋa wa zuo na. Lɔgɔrɛ deyena lɔga atan' teŋa wa zuo na daa di' bugum. Ta' la tiihe se'ehe la mɔɔrɔ seto n daa boe zen'kana wa daa di' mɛ. 8Te soŋora se'em n pa'ahe boyi' la me peebe a tentanɛ la. N eŋɛ bala la, ba dekɛ sɛla ayema n ane wo zoore kantɛ dita bugum la lobe bahɛ ko'kantɛ poan. Lɔgɔrɛ deyena lɔga atan' ko'kantɛ la poan ko'om n daa lebege ziim. 9Bonvɔɔhe n daa bo zen'kaŋa bɔba la me daa ki' mɛ. Ge te ɔɔnrɔŋseto n bo zen'kaŋa mea la me daa sagom. 10Te soŋora se'em n pa'ahɛ botan' la peebe a tentanɛ la. N peehe bala la, ŋmarebilkantɛ n dite bugum ze'ele la saŋgbanɛ zuo lu' kolaa se'ehe la bɔgɔse'ehe n boe lɔgɔrɛ deyena lɔga botan' la poan la. 11Ŋmarebila la yu'urɛ dela Too. Lɔgɔrɛ deyena ko'om lɔga atan' la poan la lebege de'a la ko'om sebo n tɔe. Nɛreba zo'e zo'e n daa ki' yɛhera la ban daa nyu' ko'om la. Se'ere n sɔe la, ko'om la daa tɔe mɛ. 12Te soŋora se'em n pa'ahɛ bonaahe la peebe a tentanɛ la. N peebe bala, lɔgɔrɛ deyena me lɔga atan' la poan wontɛɛŋa daa sagom mɛ, te lɔgɔrɛ deyena me lɔga atan' la poan ŋmarega daa sagom mɛ, lɔgɔrɛ deyena lɔga atan' la poan ŋmarebibihe daa sagom mɛ. Lɔgɔrɛ deyena lɔga atan' la poan nɛɛhom daa ka boe teŋa wa zuo wontɛɛŋa la yu'uŋɔ. 13Te n le behɛ ge wom te tuguho te a ɛngera saazuo ha. A yeti kekeko yeti, Wae! Wae! La kan ana soŋa bo sɛba woo n boe teŋa wa zuo Yenɛ soŋoreba batan' la han ta peebe ba tentana la.

will be added

X\