Pukre 7

1Dena wa n daa tole la, n le nyɛ' te Yenɛ soŋoreba banaahe ze'a teŋa wa zuo lɔga anaahe la poan. Ba gorɛ la sabebego lɔga la poan teŋa wa zuo te bo da ta'an lobe teŋa wa zuo, bii ko'kantɛ la poan, bii tisɛka poan. 2Te n le nyɛ' te Yenɛ soŋora ayema me ze'ele dapɔya bɔba kene mɛ na la Yenɛ Se'em n Vɔe la danlehom. Te Yenɛ soŋora la yi' a soŋoreba taaba banaahe la te Yenɛ bo ba paŋa te ba sagom teŋa wa zuo la ko'kantɛ la kekeko. 3A yeti, Da sagom ya teŋa wa zuo la ko'kantɛ la, la tiihe la nana. Bahɛ ya te to ta daanlɛ enŋa Yenɛ yamehe la gbɛ'ɛra ge te ya nya sagom. 4N wom te nɛresɛba te ba daa daanlɛ te ba de'a Yenɛ nɛreba la kanlɛ n de se'em. La dela tuha kɔbega la tuha pihinaahe la tuha banaahe (144,000) Israel buuri woo ba poan. 5Yuda yizuo dela tuha pia la tuha ayi' (12,000) te ba daanlɛ la. Areuben yizuo dela tuha pia la tuha ayi' (12,000). Gad yizuo dela tuha pia la tuha ayi' (12,000). 6Aser yizuo dela tuha pia la tuha ayi' (12,000). Naptali yizuo dela tuha pia la tuha ayi' (12,000). Manase yizuo dela tuha pia la tuha ayi' (12,000). 7Simeon yizuo dela tuha pia la tuha ayi' (12,000). Levi yizuo dela tuha pia la tuha ayi' (12,000). Isakar yizuo dela tuha pia la tuha ayi' (12,000). 8Zebulun yizuo dela tuha pia la tuha ayi' (12,000). Yosef yizuo dela tuha pia la tuha ayi' (12,000). Ge te Benyamin yizuo me dela tuha pia la tuha ayi' (12,000). 9Yele dena wa n tole la, n behɛ nyɛ' la nɛrekooŋɔ. Se'em ka boe n wan nyaŋɛ kaanlɛ nɛreba la zan'an. Ba yehe la nɛreba woo poan, la buuri woo, la teŋhe woo, la yetɔgom woo poan na. Ba ze' la na'am gɔŋɔ la, la Pebila la nɛŋan yɛ' futo n ane fa'a ge zanla konkɔnrɔgɔ ba nu'uhen poan, 10ge yele kekeko yeti, Tomam Yenɛ, se'em n zin' na'am gɔŋɔ la poan la la Pebila la n wan fan' to bahɛ. 11Te Yenɛ soŋoreba la woo n ze' kae na'am gɔŋɔ la, la kema la, la kelompagehedoma banaahe la, lu na'am gɔŋɔ la nɛŋan na'ahe Na'ayenɛ. 12Ba na'ahe yeti, Taarɛ. Pɛnka la soŋa la yam la fara la na'ahegɔ la paŋa la kpe'eŋo wan bɔna la to Yenɛ wuuha. Taarɛ. 13Te kema la ayema soke mam yeti, Bane n de nɛrebana wa yɛ' futo n ane fa'a wa? Ba yehe la bɛ na? 14Te n lebehe yele en yeti, Naa, mam ka mi'. Hon mi'. Te a le yele mam yeti, Nɛrebana wa dela sɛba n yehe namehegɔ la poan soŋa soŋa na. Ba dekɛ ba fuwogorɔ la pee la Pebila ziim la poan bahɛ te to ana fa'a. 15Bala zuo te ba ze'a Yenɛ na'am gɔŋɔ la nɛŋan, tona bɔ'ɔra en wontɛɛŋa la yu'uŋɔ zan'an Yenɛ Yire la poan. Ge te se'emdaana n zin' na'am gɔŋɔ la poan la wan gu'ura ba. 16Kom la ko'nyuuro ka le malom tara ba bii wontɛɛŋa la tuluga paara ba. 17Se'ere n sɔe la, Pebila la, se'em n bo na'am gɔŋɔ la teŋasoka la wan dɛna ba duŋkeena. Enŋa n wan gu'ura ba keŋɛ bulega sɛka ko'om n bo'ore vom n ka tare ba'ahegɔ Yenɛ zen'en. Ge te Yenɛ wan duuhe ba nintam.

will be added

X\