Pukre 4

1Yele dena n tole la, n daa behɛ mɛ nyɛ' te koleŋa yu'ɛ saazuo ha. Te nɛra se'em n vole wo tentanɛ, te n pon wom te a tɔgɛ bo mam yeti, Zom kalam na te n pa'alɛ hɔ sɛla n wan eŋɛ pooren. 2Te bilam bilam te Yenɛ Sea la kɔ'ɔn tona la ma. Saazuo ha la, te na'am gɔŋɔ bɔna bini te nɛra zin'an bini. 3Se'em n zin' bini la nɛŋa daa nyagere mɛ wo am la mɔlebagenɛ sanlenkuga la. Gumatia tanhɔ te a wonɛ beheŋa kuga me n daa kae dɛ bahɛ teŋasoka. 4Na'am gɔnɔ pihiyi' la banaahe n kae na'am gɔŋɔ la bahɛ teŋasoka. Kpɛ'ɛndoma pihiyi' la banaahe daa zin' ba zuto. Ba daa yɛ' la futo n ane fa'a ge vuga sanlema muhe. 5Saa n nyagere ge tanhera ge suna na'am gɔŋɔ la poan na. Bugum boyopɔe n daa dite na'am gɔŋɔ la nɛŋan. Bugum boyopɔe la dela Sɛɛhe seyopɔe la n ze'ele Yenɛ zen'en na la. 6Na'am gɔŋɔ la nɛŋan sɛla gan' ana wo ko'kantɛ nyagera wo beheŋa la. Bondoma banaahe n bo teŋasoka kae na'am gɔŋɔ la. Ba nɛhe la ba pɔya zan'an daa tare la nini. 7Bondoma la se'em n de yiadaana la ane me wo gbegenɛ la. Boyi' daana la ane me wo lɔlega la. Batan' daana la tare la nɛŋa te ka ana wo asaala nɛŋa la. Gee te bonaahe daana la ana wo tuguho la. 8Bondoma wa banaahe la ayema woo tare la kelompagehe seyoobe, ge te nini pin' kelompagehe la poan la yeŋa zan'an. Ba yuune mɛ wontɛɛŋa la yu'uŋɔ ka gɔ'ɔra yeti, Fa'a, fa'a, fa'a dela Na'ayenɛ to Yenɛ, Gaŋɛ Zan'an Yenɛ. A dela se'em n daa boe, kelom bɔna, ge wan wa'ana. 9Ge kelompagehedoma banaahe la yuune yuuma n tare pɛnka, la na'ahegɔ, la po'ohegɔ bɔ'ɔra se'emdaana n zin' na'am gɔŋɔ la bɔna wuuha la. Te kelompagehedoma banaahe la han ne ta yuun bala, 10kema pihiyi' la banaahe la ne lu la teŋa na'ahe se'emdaana n zin' na'am gɔŋɔ la poan la bɔna wuuha la. Ba ne vuguhe ba sanlema muhe la mɛ lobe bahɛ na'am gɔŋɔ la nɛŋan ge yeti, 11To Na'ayenɛ la to Yenɛ, ho nare hɔ to'e pɛnka, la na'ahegɔ, la paŋa. Se'ere n sɔe la hon naam sɛla woo. La dela hon sunboolom la zuo te ba bɔna wa.

will be added

X\