Pukre 3

1Golehɛ bo soŋora se'em n boe lagaŋɔ la n boe Sardis teŋa poan la. Yetɔgom wa ze'ele la se'em n tare sɛɛhe seyopɔe la n ze'ele Yenɛ zen'en na la, la ŋmarebibihe seyopɔe la. N mi' te nɛreba tɛn'ɛhɛ te ya vɔe ge ya ki' mɛ. 2Bala, ihege ya mɛ la ya gorɛ sɛla te ya nan tara wa kpe'eŋkpe'eŋo ge te de baŋɛ ki' zan'an zan'an. Te mam baŋɛ ya te sɛla te ya eŋɛ la dagɛ ma'an n Yenɛ nɛŋan. 3Bala tɛnra ban daa pa'alɛ ya se'em la la sɛla te ya daa wom la. Nana ya a, ge tee ya potɛn'ɛra ya yelebe'ero la poan. Ya han ka ihege, n wan wa'an daanse'ere daarɛ te ya ka mina wo nayiga la. 4Ya fiin wa Sardis teŋa poan la futo n ka tare dɛngerɔ. Ya wan yɛ' futo n ane fa'a kena la mam. Se'ere n sɔe la, ya nare bala. 5Sɛba n nyaŋɛ la wan yɛ' futo n ane fa'a wana. N me kan saalom ba yu'ura vom yu'ura gɔŋɔ la poan bahɛ. N wan ze'ele n Sɔ la a soŋoreba nɛŋan yeti ba dela mam nɛreba. 6Se'em n tare toba a kelehe sɛla te Yenɛ Sea yɛta bɔ'ɔra lagaŋɔ la. 7Golehɛ bo soŋora se'em n boe lagaŋɔ la n boe Piladelpia teŋa poan la. Yetɔgɔbɔna wa ze'ele la se'em n de Fa'a la yelemɛŋɛrɛdaana la zen'en na. Enŋa n zanle David kparehega la. A han yu'ɛ koleŋa la, se'em ka boe wan ta'an yo' dɛ. A han le yo', se'em ka boe wan ta'an yu'ɛ. 8N mi' sɛla te ya eta. N mi te ya paŋa ka zo'e, ge ya kelom dɛna la birikindoma bo mam pa'alɛ se'em la. N yu'ɛ koleŋa biŋe ya te se'em kan ta'an yo' ka. 9Ge behɛ ya, ya sɛba boe la Dima la lagaŋɔ la poan ge dɛna ponpɔrɔŋdoma. Ba dekɛ ba mɛhe te bama dela Yudoma. Ge ba dagɛ. N wan bahɛ ba te ba wa'ana dɔnbelɛ teŋa ya nɛŋan. N wan bahɛ te ba baŋɛ te n nɔŋɛ ya. 10Ge yan dole mam nɔɔrɛ din'inhe suunre la zuo, n wan to'e ya bahɛ daanseko n ye teŋa wa zuo woo na la, te ko magahɛ la nɛreba teŋa wa zuo behɛ. 11La kan yuue la mam lebe na. Bala, kelom kɔ'ɔn tone ya sɛla n ane soŋa te se'em da ta'an fan' sɛla te ya to'e la. 12N wan bahɛ te sɛba n nyaŋɛ la dɛna zɛɛnrɛ sɛ' ze'ele Yenɛ Yire la poan, kan malom yehe bini. N wan golehɛ n Yenɛ yu'urɛ la a teŋa la yu'urɛ labelɛ ba. A teŋa la me dela Yerusalem teŋpaalega la. De yeti de ze'ele la n Sɔ' Yenɛ zen'en, saazuo ha sige na. N me wan golehɛ n yu'urɛ paalega la eŋɛ a zuo. 13Se'em n tare toba a kelehe sɛla te Yenɛ Sea yɛta bɔ'ɔra lagaŋɔ la. 14Golehɛ bo soŋora se'em n boe lagaŋɔ la n boe Laodisea teŋa poan la. Yetɔgɔbɔna wa ze'ele la se'emdaana yu'urɛ n de Taarɛ la zen'en na. Enŋa n de yelemɛŋɛrɛdaana ge seren tɔgɔra la sɛla te a nini nyɛ'. Enŋa daa pɔhɛ sɛla woo poan te Yenɛ naam la. 15N mi' ya eŋɛ sɛla. N mi' te ya ka nɔŋɛ mam ge me ka le yaɛ mam. Mam poorɛ wan pee ne ya han nɔŋɛ ne mam bii ya yaɛ mam mɛ. 16Ge yan dagɛ ba se'em la ge tɛn'ɛha boyi' boyi' la zuo, n wan dige ya n nɛŋan. 17Ya yeti te ya dela bontateba tara sɛla woo te ya bɔta. Ge ya ka mi' yan tare ninbɔn'ɔn ge ka mina ya mɛhe n boe zen'an se'em. Ya dela nahadoma, ze'a beele ge de'a fɔɔhe. 18Mam ka'an ne ya te ya da' sanlema mam zen'en. Sanlema sera sera la ya ta'an de'a bontateba. Ya me da' futo n ane fa'a la ya yɛ' pin' ya beele wa n bo'ore ya vi' wa. Ya me le da' tiim la ya sɔn' ya nini la la ya ta'ana nyɛta. 19Mam tanhe ge nameha sɛba te n nɔŋɛ. Bala mɔ'ɛ ya nini la tee ya potɛn'ɛra ya yelebe'ero poan. 20Behɛ ya, mam ze' la koleŋa nɔɔrɛn ŋmɛ'ɛra. Se'em n wom ge yu'ɛ, n wan kɛn' a yire la na, di' la en ge te enŋa me di' la mam. 21Bala, sɛba n nyaŋɛ, n wan bo ba sore te ba zin'ire lɛm mam n na'am gɔŋɔ la zuo. Wo mam n nyaŋɛ se'em nya zin'an lɛm n Sɔ' na'am gɔŋɔ la zuo la. 22Se'em n tare toba a kelehe sɛla te Yenɛ Sea yɛta bɔ'ɔra lagaŋɔ la.

will be added

X\