Pukre 22

1Yenɛ soŋora la me daa pa'alɛ mam vom ko'om kolaa. Bo nyagere me wo saakuga la. Bo ze'ele la Yenɛ la Pebila la na'am gɔŋɔ la poan na. 2Bo zote la teŋa la poan paalɛ la teŋasoka. Kolaa la yakenɛ woo tare la vom tia la. Ko wone la sugumnɔɔren pia la boyi' yuunɛ, ŋmarega woo ka daa wone mɛ ge te ba tara ko vɔntɔ la me tebera teŋhe la. 3Sɛla te Yenɛ kan' kan'be'ero bo la ayena me ka bo teŋa la poan. Yenɛ la Pebila na'am gɔŋɔ wan bɔna teŋa la poan, ge te a yamehe la me na'aha en. 4Sɛba te ba golehɛ Yenɛ yu'urɛ eŋɛ a gbɛ'ɛra zuto wan nyɛ' a nɛŋan. 5Yu'uŋɔ kan malom bɔna. Ba me kan ɛɛra butoleladoma bii yentule. Se'ere n sɔe la, Na'ayenɛ n de Yenɛ wan dɛna nɛɛhom bo ba, ge te ban wan sɔna behera wo nadoma wuuha. 6Te Yenɛ soŋora la daa yele mam yeti, Sɛla woo te ho golehɛ la dela yelemɛŋɛrɛ ge te ban wan ta'an dɛla a. Na'ayenɛ to Yenɛ se'em n bo'ore a nɔtɔgɔheba la ba sɛɛhe la n tom a soŋora na. Te a pa'alɛ a yamehe la sɛla n ka yuuɛ ge eŋɛ. 7Te Yesu yeti, Behɛ, la kan yuuɛ ge te n wa'an na. Popeelom wan bɔna sɛbadoma n nane Yenɛ nɔtɔgɔha yetɔgom la n boe gɔŋkona wa poan wa. 8Mam Yon wom gee nyɛ' yele ana wa waabe mɛ. Te mam wom ge nyɛ' a ba'ahɛ la, n lu soŋora la nɛŋan te n na'ahe en. Enŋa n pa'alɛ mam yele ana wa la. 9Ge a yele mam yeti, Da eŋɛ bala. Na'aha Yenɛ. Te mam me lagom de'a la yameŋa wo hon la ho tadaandoma, sɛba n de nɔtɔgɔheba la, la sɛba woo n nane yele ana wa n bo gɔŋɔ wa poan la n de se'em la. 10Te soŋora la nya yele mam yeti, Da sogɛ nɔtɔgɔheba yɛla la n bo gɔŋkona wa poan wa. Se'ere n sɔe la, dabaherɛ la pɔnre te yele ana wa woo wan eŋɛ. 11Be'emdaana kelom tona a be'em, te se'em n yaale kelom yaala, se'em n tone som kelom tona ba som, te sɛba n de toolom nɛreba kelom dɛna ba toolom nɛreba. 12Yesu le yeti, Behɛ ya, n kan go'om n ken na. N wan tare n yɔɔrɛ na bo nɛra woo yɛhera la sɛla te a tom. 13Mam n de nɛŋadaana la poorendaana, pin'ileŋɔ la ba'ahegɔ. 14Bala, popeelom wan bɔna la sɛbadoma n pee a futo te to ana fa'a. Ban wan tara sore te ba di' vom tia dia la. Ba me tare sore te ba doohe teŋa la poan zanɔya la poohen. 15Ge nɛreba n boe yeŋa la teŋa la poan la dela sɛba n de toonfɛn'ɛhadoma la, la sɛba n tone tiimtooma, la sɛba n tone yalomtooma, la sɛba n de nɛrekooreba, la sɛba n de baga kaanbereba, la sɛba n de ponpɔrɔŋdoma ba yetɔgom poan bii ba tooma poan. 16Mam Yesu n tom n soŋora te a mɔɔlɛ yele ana wa bo ya sɛba n dole mam sore lagaŋɔ poohen la. Mam dela David yaaŋa. Mam n de belomŋma'arɛ la. 17Te Yenɛ Sea la la Pɔka la yeti, Wa'ana. Se'em woo n wom dena wa me sontii a yeti, Wa'ana, hon se'em te ko'nyuuro tara, wa'an na. Hon se'em me bote wa'an na to'e ko'om sebo n ka lebehe yɔɔra dɛna vom ko'om. 18Mam Yon yeti ya mɛ la ninmɔ'ɔrɛ yeti se'em woo n wom Yenɛ nɔtɔgɔha yelehom la n boe gɔŋkona wa poan la. Te hon se'em n pa'ahɛ yelese'ere yele ana wa poan, Yenɛ me wan pa'ahɛ ho namehegɔ. A wan eŋɛ dena wa yɛhera la namehe seto te n golehɛ eŋɛ gɔŋkona wa. 19Hon me se'em n yehe yelese'ere nɔtɔgɔheba yelehom gɔŋkona wa poan, Yenɛ me wan yehe ho tɔntɛ vom tia dia la ho zen'en. A me wan yehe ho tɔntɛ toolom teŋa. N golehɛ ana wa woo eŋɛ gɔŋkona wa poan mɛ. 20Se'emdaana n tɔgɔre yele ana wa n yeti, La kɔ'ɔn de'a la bala. La kan yuuɛ la mam wan wa'an. Taarɛ. To Daana Yesu, wa'ana. 21To Daana Yesu zo'ohogɔ la wan bɔna la to zan'an.

will be added

X\