Pukre 21

1Te n daa nyɛ' saazuo paalega la teŋa wa zuo paalega. Yia yia saazuo la teŋa la mɛlom mɛ. Te ko'kantɛ la me mɛlom. 2N nyɛ' toolom teŋa n de Yerusalem teŋpaalega la, n ze'ele la Yenɛ zen'en saazuo ha sigera na, maalɛ ka mea ge maahom wo pɔka n maahom ka mea te a to'ohɛ a sera la. 3Te n wom te konkore tɔgɔra kekeko na'am gɔŋɔ la poan yeti, Yenɛ nya bo mɛ la nɛreba. A wan bɔna la ba ge te bama me wa dɛna a nɛreba. Yenɛ mɛŋa n wan bɔna la ba ge dɛna ba Yenɛ. 4A wan duuhe ba nintam ba nini poan bahɛ. Kum, la sunsagaŋɔ la kɛlega bii iŋduŋa ka maan bɔna. Yelekɛgɛhe la mɛlom ya. 5Te se'em n zin' na'am gɔŋɔ la yeti, Nananawa, n ete sɛla woo te la de'a paalega. A le yele mam yeti, Golehɛ dena wa. Se'ere n sɔe la, yele ana wa dela yelemɛŋɛrɛ ge te ba wan ta'an dɛla a. 6A le yeti, La ba'ahɛ ya. Mam n de Pin'ileŋɔ la Ba'ahegɔ. Te hon se'em te ko'nyuuro tara, n wan bo en vom ko'om la te a nyu' ge kan yɔ sɛsɛla. 7Se'em n sɛ' ze'ele nyaŋɛ, a wan to'e bo mam zen'en. N wan dɛna a Yenɛ ge te enŋa me de'a n dayɔa. 8Ge dabɛbehe la, la sɛba n ka sakɛ bo mam, la toonfɛn'ɛhadoma, la nɛrekooreba, la sɛba n tone yalomtooma, la sɛba n tone tiimtooma, la bagakaanbereba, la ponpɔrɔŋdoma zen'an dela bugum ko'kantɛ la n dite la kuga la. Zen'kaŋa n de yi'i kum la. 9Te Yenɛ soŋoreba bayopɔe la ayema, se'em n daa tare laahe seyopɔe te se perɛ la ba'ahegɔ namehegɔ sugumnɔɔren boyopɔe la daa wa'an n zen'en na yeti, Wa'ana ge n wan pa'alɛ ho pɔka la, Pebila la pɔga la. 10Bilam te Yenɛ Sea la kɔ'ɔn tona la mam, ge te soŋora la tare mam zom zoore kantɛ zuo ha ta pa'alɛ mam toolom teŋa Yerusalem la. Teŋa wa ze'ele la Yenɛ zen'en saazuo ha sigera na, 11ge nyagera la Yenɛ soŋa. Ka nyagere mɛ wo sanlenkuga la, nyagera wo am kuga la. 12Ka dangoone la kanregɛ mɛ ge me de'a dangoonwoko. Ka tare la zanɔya pia la toyi'. Yenɛ soŋoreba pia la bayi' n behere zanɔya wa. Ba golehɛ la Israel buuri pia la bayi' la yuya eŋɛ zanɔya la poohen. 13Zanɔya atan' n boe lɔgɔdeyena woo. Batan' boe dapɔya bɔba, te batan' zuɔ bɔba, te batan' gɔbega bɔba, te batan' bɔna nɛŋan bɔba. 14Teŋa wa dangoone la ɛɛnbere mɛ' yagelɛ la kuga pia la bayi' zuto, te ba golehɛ la Pebila la tontoneba pia la bayi' la yu'ura eŋɛ kuga wa zuto. 15Yenɛ soŋora se'em n daa tɔgɛ bo mam la daa tare la sanlema dibesɛka n makere sɛla n zone se'em. A tara ka te a makɛ la teŋa la la ko zanɔya la, la ko dangoone la n zone se'em. 16Teŋa la dela bonmɔkɔ te ko woko la ko yaleŋa n zone se'em la, ko woko dela mɛɛla tuhure la kɔbehe senaahe. Koyaleŋa la konwogɛ tokɛ se'em ha zone mɛ la konwogɛ se'em la. 17Soŋora la me daa makɛ dangoone la n zone se'em. N daa makɛ dɛ la, dɛ kantɛ dela santira kɔbega la pihinaahe la anaahe. Wo nɛra han nɛ na'ma makɛ. 18Ba dekɛ la am kuga mɛ' dangoone la ge dekɛ sanlema n nyagere wo beheŋa la me mɛ teŋa la mea. 19Ba dekɛ la sanlenkuga tɔka tɔka woo lagom golɛ teŋa la dangoone ɛɛnberɛ la. Kuguse'ere n de yia ɛɛnberɛ la dela am kuga, boyi' la dela kuga poonhogɔ, botan' la dela kugu ponpɔnra, bonaahe la dela beheŋa kuga. 20Bonuu la dela kugu ponpɔnrɔsabelega, boyoobe la dela kugu mɔlebagenɛ, boyopɔe dela peele. Bonii dela kugu zenzengemɔlɔgɔ, bowae' dela kugu mɔlɔdɔɔnrɔ, pia dela kugu dɛnlemadɛntɔ, pia la ayena dela dɛnlemadɛnpoohogɔ, ge te pia la bayi' la me de'a mɔlɔgɔ. 21Nayahe pia la ayi' la dela kugasaalehe kanra pia la ayi'. Nayaŋa woo dela kugasaala deyena te ba dekɛ maalɛ dɛ. Teŋa la poan sɔrɔtɔ kanra la dela sanlema ma'an n nyagera wo beheŋa la. 22N daa ka nyɛ' Yenɛ Yire la teŋa la poan. Se'ere n sɔe la, Na'ayenɛ to Yenɛ n de Gaŋɛ Zan'an Yenɛ la Pebila la n de Yire la. 23Nɛreba teŋa la poan ka tare wontɛɛŋa bii ŋmarega te ba bo en nɛɛhom. Se'ere n sɔe la, Na'ayenɛ soŋa n nɛɛ bini ge te Pebila la me dɛna nɛɛhom. 24Teŋparɛ wa zuo nɛreba woo wan kena a nɛɛhom la poan. Nabadoma woo teŋa wa zuo me wan tare ba tarega wa'an a poan na. 25Ba ka maan yu' teŋa la zanɔya la. Se'ere n sɔe la, yu'uŋɔ kan malom bɔna. 26Teŋhe woo wan tare ba tarega wa'an teŋa la poan na. 27Ge sɛla n de dɛngerɔ, bii se'em n tone toonfɛn'ɛha, bii sɛba n parone kan kɛn' teŋa la poan. Sɛba ma'an n wan kɛn' dɛ, dela sɛba yu'ura te ba golehɛ eŋɛ Pebila vom gɔŋɔ la poan la.

will be added

X\