Pukre 20

1Te n le nyɛ' Yenɛ soŋora te a ze'ele saazuo ha sigera na. A zanlɛ la a nu'o poan boko kantɛ la kparehega la zɔnrekantɛ. 2A nyɔkɛ la bonsɛ'kantɛ la se'em n de bonsɛ'kɛka la te ba yi'ira Sagona bii Dima la. N nyɔkɛ en la, a lo' en la zɔnrekantɛ la biŋe yuun tuhure. 3Soŋora la n eŋɛ bala la, a nya dekɛ en mɛ lobe eŋɛ boko kantɛ la poan, ge kparɛ en ge bɛ' kɔ. A eŋɛ bala te a da ta'an nyaŋɛ pan'ahɛ nɛreba n boe teŋhe yɛ'ɛha, han dagɛna la yuun tuhure la n ta paɛ. Yuun tuhure la han paɛ, la sontii ba yo'ɛ en bahɛ dabeha fiin wa. 4Te n le nyɛ' na'am gɔnɔ, la sɛba n zin' to poan la. Ba bo ba paŋa te ba gankɛ. N me le nyɛ' sɛba te ba ko' yɛhera la ban mɔɔlɛ yelemɛŋɛrɛ la te Yesu lilige la Yenɛ yelehom la sɛɛhe. Ba n ka tabelɛ na'ahe bonsilimasio la bii sɛla la te ba yagom bo en la. Ba me na ka tabelɛ daanlɛ bonsilimasio la danlehom la eŋɛ ba gbɛ'ɛra zuto bii ba nu'uhen poan. Ba vo'e ba kum la poohen ge lagom la Yesu Krista sɔna behera wo nadoma tara tara la yuun tuhure. 5Dene wa n de yia te nɛreba vo'e ba kum poan. Sɛba n ge la daa ka vo'e ba kum la poohen han dagɛna la yuun tuhure la n da tole. 6Sɛba doma n lagom bɔna la sɛbadoma n de yiadoma te ba vo'e ba kum poan la n dela popeelom la toolom nɛreba. Kum sebo n pa'ahɛ yi' la ka le tara paŋa la ba. Ba wan de'a Yenɛ la Krista malemadoma. Ba wan lagom la en sɔna behera tara tara la yuun tuhure. 7Ge yuun tuhure la ha tole, ba wan yu'ɛ Dima pakadeen la poan bahɛ. 8A han yehe na, a wan keŋɛ ta pan'ahɛ teŋhe n yerege bɔna teŋa wa zuo woo n de Gog la Magog la. Dima wan tare ba zan'an na lagom taaba te ba zabɛ zaberɛ. Ba wan zo'e zona wo ko'kantɛ nɔgbenɛ tentɔnbin'ihegɔ la. 9Te ba yeregɛ teŋa wa zuo kae Yenɛ nɛreba n lagahɛ zen'an la la teŋsɛka te Yenɛ nɔŋɛ la bahɛ teŋasoka. Ge bugum ze'ele saazuo ha na sagom ba. 10Ge te ba dekɛ sagona la, se'em n pan'ahɛ ba la lobe bahɛ bugum ko'kantɛ la la kuguse'a n dite la bugum la poan. Zen'kaŋa te ba pon lobe bonsilimasio la la nɔtɔgɔha ponpɔrɔŋdoma bini la. Bilam, te ba wan nyɛ' namehegɔ wontɛɛŋa la yu'uŋɔ zan'an wuuha. 11Te n le nyɛ' na'am gɔŋɔ n ane fa'a ge kanrege la se'em n zin' ko poan la. Teŋa wa zuo la saazuo ha zɔ' mɛlom a nɛŋan. 12Te n nyɛ' ke'endoma bonkotɛ la bonbila zan'an te ba ze'a na'am gɔŋɔ la nɛŋa. Ba yu'uhɛ gɔnɔ bini mɛ. Ge ba wa yo'ɛ la gɔŋɔ koyema n de vom gɔŋɔ la. Ba gankɛ ke'endoma la yɛhera la sɛla te ba eŋɛ wo lan golehɛ gɔnɔ la poan se'em la. 13Te ko'kantɛ dekɛ sɛba n ki a poan la tehe na, te kum la Ke'enteŋa dekɛ sɛba n ki ba poan la tehe na. Te ba gankɛ ba woo yɛhera la ban eŋɛ se'em. 14Ge te ba nya daa dekɛ kum la Ke'enteŋa la lobe bahɛ bugum ko'kantɛ la poan. Bugum ko'kantɛ wa n de kum sebo n de yi'i la. 15Hon se'em yu'urɛ te ba ka golehɛ eŋɛ vom gɔŋɔ la poan, ba wan lobe ho bahɛ bugum ko'kantɛ la poan.

will be added

X\