Pukre 2

1Golehɛ la ho bo soŋora se'em n boe lagaŋseko n boe Epesus teŋa poan la. Yetɔgom wa ze'ele la se'emdaana n gorɛ ŋmarebibihe seyopɔe a zuɔ nu'o ge kena kaara sanlema butolela ze'elehe seyopɔe la. 2N mi sɛla te ya eŋɛ. N mi yan tom se'em ge din'inhe suunre se'em. N mi' te ya ka to'ohere sɛba n tone be'em. Ya me ne magahɛ sɛba n yeti bama dela Yesu tontoneba ge dagɛna la behɛ mɛ. Ya nyɛ' te ba dɛna la ponpɔrɔŋdoma. 3Ya din'inhe suunre. Ya namehɛ yɛla mam zuo ge me ka zagahɛ te ya kan dɔla mam. 4Ge yele dena wa te mam tara la ya. De dela ya ka nɔŋɛ mam nananawa wo yan daa nɔŋɛ mam se'em yia la. 5Behɛ ya yan tue se'em! Bala tee ya ya potɛn'ɛra ya yelebe'ero tooma poan gee ete ya wo yan daa ete se'em yia la. Ge ya han ka tee ya potɛn'ɛra ya yelebe'ero tooma poan, n wan wa'ana dekɛ ya butolela n ze' se'em poan la ge te a ka le bɔna zen'kaŋa yɛ'ɛha. 6Ya yelesonɛ dela yamam n yaɛ sɛla te Nikolaitasdoma daa eta la, wo mam n yaɛ a se'em la. 7Se'em n tare toba a kelehe sɛla te Yenɛ Sea la tɔgɔra bɔ'ɔra lagaŋɔ la. Hon se'em n nyaŋɛ sɛ' ze'ele di' nɛŋa, n wan bo en sore te a di' vom tia la n boe Yenɛ va'am la poan la wɔla. 8Golehɛ bo soŋora la n boe lagaŋɔ seko n boe Smirna teŋa poan la. Yetɔgɔbɔna wa ze'ele la se'emdaana n daa ki' ge vo'e la zen'en na. 9N mi' ya daaŋɔ la. N mi' te ya dela nahadoma. Ge yelemɛŋɛrɛ poan, ya dela bontateba. N mi' be'em yetɔgom sebo te sɛba n dekɛ ba mɛhe te bama dela Yudoma ge dagɛna la tɔgɛ bo ya la. Ba dela lagaŋseko n dole Dima la. 10Da tare ya dabeem la namehe seko n wan wa'ana la. Behɛ ya, sagona la wan magahɛ ya yɛhera la ya sɛba te ba wan nyɔkɛ eŋɛ pakadeen. Ya daaŋɔ la wan bɔna dabeha pia ma'an. Bala, kelom nam ya mam la han pon de'a la ya ki', ge n wan bo ya vom sebo n ka tare ba'ahegɔ te la dɛna ya yɔɔrɛ. 11Se'em n tare toba a kelehe sɛla te Yenɛ Sea tɔgɔra bɔ'ɔra lagaŋɔ la. Ge sɛba n nyaŋɛ la yi'i kum la kan paɛ ba. 12Golehɛ bo soŋora la n boe lagaŋɔ seko n boe Pergamum teŋa poan la. Yetɔgɔbɔna wa ze'ele la se'em n tare so'a la te ka gɛɛrehe seyi' la dita la zen'en na. 13N mi' yan boe zen'an. Ya boe zen'an te Dima la sɔna behera la. Ge ya kelom dɔla mam ma'an mɛ. La ban daa ta ko' Antipas n de mam yelemɛŋɛrɛ nɛra, Dima la sɔ'ɔlom poan la. 14Ge yɛla fiin wa te n tara la ya. Ya poan, ya sɛba boe dɔla Balaam pa'alegɔ la. Se'em n daa pa'alɛ Balak te a bahɛ te Israel teŋa nɛreba ton be'em yɛhera la ban di' disɛka te ba kanbɛ baga, ge tom yalomtooma. 15Bala mea, te ya tare nɛreba ya zen'en te ba dɔla Nikolaitasdoma pa'alegɔ la. 16Bala, tee ya potɛn'ɛra ya yelebe'ero tooma poan. Han dagɛna bala, n wan dekɛ so'a la n ze'ele n nɔɔrɛn na la wa'an nananawa na zabɛ la nɛrebama. 17Se'em n tare toba a kelehe sɛla te Yenɛ Sea la tɔgɔra bɔ'ɔra lagaŋɔ la. Sɛba n nyaŋɛ n wan bo ba disɛka n sogɛ. N me wan bo ba ayena ayena kugupeela. Te ba wan golehɛ yu'urɛ paala eŋɛ bini. Nɛnɛra kan baŋɛ sɛla te ba golehɛ eŋɛ bini la han dagɛna la se'emdaana n to'e de ma'an la n wan baŋɛ. 18Golehɛ la ho bo soŋora se'em n boe lagaŋɔ la boe Tiatira teŋa poan la. Yetɔgɔbɔna wa ze'ele la Yenɛ Dayɔa la zen'en na. A nini nyagere mɛ wo bugum la ge te a na'ma nyagera wo nyɔgom te ba suuhe la bugum la. 19N mi' yan ete sɛla la. N mi' ya nɔŋerɛ la, la ya birikina la, la ya tooma la, la ya sundin'inhegɔ la. N mi' te ya tone kekeko nananawa gana yan daa tone se'em yia la. 20Yelese'ere te n tara la ya dela dena wa. Ya to'e Yezebel n de pɔka la, yi'ira a mɛŋa te enŋa dela Yenɛ tontona la, pan'ahɛ Yenɛ yamehe. A pan'ahɛ ba yɛhera la a pa'alegɔ poan, te ba tom yalomtooma ge dita baga dia. 21N bo en sore te a tee a potɛn'ɛrɛ a be'em poan. Ge a ka bote a tee a potɛn'ɛrɛ a yalomtooma la poan. 22Bala, n wan bahɛ te ban'an nyɔkɛ en. Ge n me wan namehɛ sɛba n gan' la en te ba tona kabonhe la. N wan eŋɛ dena wa nananawa, han dagɛna la ba tee la ba potɛn'ɛra toonfɛn'ɛha se'a te ba tom la en la. 23N me wan ko' sɛba n dole en la, te lagaŋɔ la woo baŋɛ, te mam de se'em n mi' asaala potɛn'ɛrɛ la n tɛn'ɛhɛ sɛla. N wan yɛ' ya woo yɛhera la sɛla te ya tom. 24Yamam sɛba n boe Tayatira teŋa poan la, ka doohe be'em pa'ale kona wa. Ya ka zamehɛ sɛla te nɛreba yi'ira Dima ninmɔ'ɔrɛ yɛla la. N yele ya te n kan dekɛ yɛla pa'ahɛ ya. 25Ge ya kelom kɔ'ɔn tona toonsoma ge gura te n ta lebe na. 26Ge se'em woo n nyaŋɛ, ge kelom tona mam n bote se'em ta paɛ ba'ahegɔ, n wan bo en paŋa te a sɔna teŋhe behera. 27Ho wan wɔnregɛ ba la kuto doore, ho wan wɔnre ba burɛ wo yɔgɔrɔ dokɔ la. 28Paŋa sɛka te n bɔ'ɔra ba la ane wo mam to'e paŋsɛka n sɔ zen'en sɔna behera la. N me wan bo ba belomŋma'arɛ. 29Se'em n tare toba a kelehe sɛla te Yenɛ Sea tɔgɔra bɔ'ɔra lagaŋɔ la.

will be added

X\