Pukre 19

1Dena wa n tole la, n wom la sɛla te la vɔɔla wo nɛrekooŋɔ n boe saazuo yɛta yeti, Pɛngɛ ya Yenɛ! Yenɛ n tare faanrɛ la soŋa la paŋa. 2Sɛla woo te a namehɛ la dela tontɔɔ la yelemɛŋɛrɛ. A gankerɛ pɔgɔsɛka n daa sagom teŋa wa zuo la a yalomtooma la. Yenɛ daa namehɛ en la n ko' a yamehe la zuo. 3Ba le kaahɛ kekeko yeti, Pɛngɛ ya Yenɛ! Teŋkantɛ la te bugum la dita la zun'uhe wan zon ha wuuha. 4Te kema pihiyi' la banaahe la la kelompagehedoma banaahe la lu' teŋa. Ba lu' na'aha Yenɛ se'em n zin' na'am gɔŋɔ la poan la ge yɛta yeti, Taarɛ, pɛngɛ ya Yenɛ. 5Te nɛra wa ze'ele na'am gɔŋɔ la poan na yɛta yeti, Pɛngɛ ya Yenɛ sɛba woo n de Yenɛ yamehe, la a nɛreba woo, bonkotɛ la bonbila zan'an bɔ'ɔra en na'ahegɔ la. 6Te n wom te la vɔɔla wo nɛrekooŋɔ n tɔgɔre la ana wo bɔka kɔ'ɔn n surugere la paŋa la ge ana wo saa n damenɛ la. N wom ban tɔgɔre te, Pɛngɛ ya Yenɛ! Te Pɛɛntɛɛnreba Na'ayenɛ to Yenɛ Na'ayenɛ n de naba. 7Bahɛ ya te to de'ene ya ge tara ya popeelom. Bahɛ ya te to pɛngɛ ya a kantɛ la n zom se'em la. Te Pebila pɔgɔdire dabaherɛ la paɛ ya. A pɔka la me maahom a mea gura dɛ. 8Ba bo ka la fupeelehe n an yere yere te a yɛ'. Fuo ane fa'a la dela Yenɛ nɛreba yelemɛŋɛrɛ tooma la. 9Te Yenɛ soŋora la yele mam yeti, Golehɛ dena wa te, Popeelom bo sɛbadoma te ba yi' ba Pebila la pɔgɔdire de'eŋɔ poan la. Te soŋora la daa le yele pa'ahɛ te, Wana wa n de Yenɛ yelemɛŋɛrɛ yelehom la. 10N yele mam wana wa la, n lu' na'mai te n na'ahe en. Ge a yele mam yeti, Da eŋɛ bala. Na'ahe Yenɛ. Te mam me lagom de'a la yameŋa woo, hon la ho sɔɔnrɔ la n de se'em la. Ho sɔɔnrɔ sɛba n gorɛ yelemɛŋɛrɛ la kaŋkaŋɛ te Yesu lilige la. Te yelemɛŋɛrɛ la te Yesu lilige la n bala te nɔtɔgɔheba tɔgɔra la. 11Te n nyɛ' te saazuo ha yu'ɛ. Yepeelega n boe bini ha. Se'em n ban' bo la yu'urɛ daa dela birikina la Yelemɛŋɛrɛ. A namehe mɛ la yelemɛŋɛrɛ ge zabera a zaba. 12A nini an wo bugum peelom la, ge te a vuga sanlema muhe kekeko. A tare yu'urɛ te de golehɛ lama en. Ge nɛnɛra ka boe n mi' de, han dagɛna la a mɛŋa ma'an n mi' de. 13Fuo seko te a yɛ' la daa lerom mɛ la ziim. Yu'urɛ se'ere te ba yi'ira en dela Yenɛ Yelehom. 14Saazuo ha pɛɛntɛɛnreba n ban' yipeelehe ge yɛ' fupeelehe yere yere doohe en. 15So'a n dite n ze'ele a nɔɔrɛ poan yehe na. So'kaŋa te a wan dekɛ zabɛ nyaŋɛ tenhen. A wan wɔnrɛ ba la kuto doore. A wan namehɛ wo Gaŋɛ Zan'an Yenɛ eŋɛ sunsunyiim se'em te a namehɛ ba la. 16Ba golehɛ la yu'urɛ eŋɛ a fuwoko la la a na'arɛ poan. Ba golehɛ te, nadoma Naba la daandoma Daana. 17Te n le nyɛ' Yenɛ soŋora te a ze'a yentule poan. Te a nyabegɛ kekeko yɛta ziiro la woo n ɛngere saazuo la te, Wa'an ya na la ya lagom taaba la ya de'eŋ Yenɛ de'eŋkantɛ wa. 18Wa'an ya na la ya obe nɛra woo iinhe. Ba dela nadoma la kpɛ'ɛndoma la pɛɛntɛɛnreba la yiri la sɛba n ban' yiri la la yamehe la sɛba n ka le de'a yamehe yɛ'ɛha la, bonkotɛ la bonbila. 19Te n nyɛ' bonsilimasio la nadoma teŋa wa zuo, la a pɛɛntɛɛnreba. Ba lagom la taaba te ba zabɛ la se'em n ban' yeho la la a nɛreba la. 20Ba nyɔkɛ bonsilimasio la mɛ. Ba nyɔkɛ en mɛ la nɔtɔgɔha ponpɔrɔŋdoma la, se'em n eŋɛ yelenyalema tooma a nɛŋa la. La dela yelenyalema toon aŋa te a daa dekɛ pan'ahɛ sɛba n daa daanlɛ bonsilimasio danlehom la ge na'ahe sɛla te ba yagom bo bonsilimasio la. Ba dekɛ bonsilimasio la la nɔtɔgɔhɔ ponpɔrɔma la lobe ba la vore bahɛ. Ba lobe ba bahɛ la bugum ko'kantɛ la poan n dite la kuguse'a n dite la bugum la. 21Sosɛka n yehe se'em n ban' yeho la nɔɔrɛ poan na la, ko' ba pɛɛntɛɛnreba la mɛ. Ba daa ko' bala la, ziiro woo daa gɔ' ba iinhe la tegɛ mɛ.

will be added

X\