Pukre 18

1Dena wa n tole la, n le nyɛ' la Yenɛ soŋora ayema me. A ze'ele la saazuo ha sigera na tara paŋa. A soŋa bahɛ te teŋa wa zuo n nɛɛ. 2Te a kaahɛ kekeko yeti, Babilon teŋa la n gane zan'an la sagom ya! A sagom ya! A dela zen'sɛka te bonbɛ'ɛhe kɛn'ɛra la zen'sɛka te bonɛngɛdoma sɛba n de bonyaalehe la bonfɛn'ɛha bɔna bini. 3Teŋhe zan'an nɛreba lu' mɛ doohe a yaalegɔ daam la poan. Te teŋhe naba doma tom yaalegɔ tooma la en. Te teŋparɛ wa zuo kɔɔheba doohe a koŋkoma'ahom la n ka ba'ahere la poan panrɛ. 4Te n le wom konkore tɔgɔre saazuo ha yeti, N nɛreba wa, yehe teŋa la poan na, la ya da lagom tom toonbe'ero la teŋa nɛreba la bii ya lagom to'e ba namehegɔ la. 5Te ba toonbe'ero la zoole mɛ ta du saazuo ha. Yenɛ me tɛnre ba pototɛn'ɛhegɔ woo. 6Enŋa ya ba sɛla te ba eŋɛ ya la. Yɔ ya ba sɛla woo te ba eŋɛ la sugumnɔɔren boyi' poan. Pere ya ba wama la la daam kpe'eŋo sugumnɔɔren boyi' wo ban daa eŋɛ se'em bo ya te ya nyu' la. 7Yamam me bahɛ te ba nyɛ' namehegɔ la sunsagaŋɔ. Wo ban daa nyɛ soŋa la panrega se'em la. Se'ere n sɔe a kelom yɛta a mɛŋa yeti, mam zin' la kalam ge me dɛna pɔgɔnaba n dagɛ pɔkɔɔnrɛ. N suunre kan malom sagom. 8A yele ana wa zuo, a wan nyɛ' namehegɔ kekeko daarɛ deyena. De me wan de'a la kum, la sunsagaŋɔ, la kom. Bugum me wan di' en. Se'ere n sɔe la Na'ayenɛ to Yenɛ, se'em n namehɛ en la n gane zan'an. 9Teŋa wa zuo nadoma sɛba n lagom yaale la en ge me lagom bɔna na'am bɔŋa la en, wan kaaha ge fɛngɛnha. Dena wa wan eŋɛ ba, ba han ta nyɛ' te bugum dita en te zun'uhe yɛhera na. 10Ba wan ze'a zen'en n zaan ha. Se'ere n sɔe la, dabeem wan tara ba namehegɔ la te ba nyɛta ge yɛta te, Wae! Wae! Babilon teŋsɛka n gane zan'an wa, la pon ka paɛ dayenɛ ge te ba kɔ'ɔn namehɛ hɔ wana. 11Kɔɔheba woo n bo teŋsehe wo teŋa wa zuo la wan kɛla a zuo. Se'ere n sɔe la, nɛnɛra ka le da'ara ba lɔgɔrɔ la yɛ'ɛha: 12sanlema la sanlenpeelega la sanlenkuga la kugasaalehe la fupeelehe la fusɔbɔlɔ la fusaalehe la fumɔlɔ la lemon tiihe dɔɔsonɔ la sɛla woo te ba dekɛ wɔbɔgɔ nyɛna maalɛ la dɔɔseto ligiri n zo'e la nyɔgom la kuto la kuguponpɔntɔ la 13pɔgɔrɔ la nyɛga la ko'ɛnka la muur la digilom la daam la tiihe kaam la zomsomɔ la ki' la nii la piihe la yiri la toroto la yamehe la nɛreba. 14Te kɔɔheba la yele ba yeti, Ya lɔgɔseto woo te ya daa bɔta la mɛlom ya. Ya tarega la woo la ya na'am bɔŋa la me ka le bɔna yɛ'ɛha. Ya me kan le maan nyɛ' tɔ yɛ'ɛha. 15Kɔɔhɔ sɛba n daa de bontateba yɛhera la ban daa koohe teŋa la poan la wan ze'a zen'an n zaan ha. Se'ere n sɔe la, dabeem n tare ba yɛhera la namehegɔ la te ba nyɛta la. Ba wan kaahɛ 16yɛta te, Wae! Wae! Babilon teŋkantɛ nɛreba wa. Ya daa ne dekɛ la fupeelehe la fumɔlɔ la fumɔlɔ mɛŋka yɛ' ya mɛhe. Ya daa ne me dekɛ la sanlema la sanlenkuga la kugasaalehe la. 17Ge la kan pon yue gee te ya bɔregɛ ya tarega wa woo. Sɛba woo n de zuodoma ɔɔnrɔnɔ la poan la sɛba n tone to to poan la, la sɛba n koohore lɔgɔrɔ to poan la daa ze' la zen'an n zaan ha. 18Ban daa ze' bala ha la nyɛ' te bugum la dite en te zun'uhe yɛhera na la, ge ba kaahɛ mɛ te, Teŋa ka tabelɛ bɔna paɛ wo teŋkantɛ dena wa. 19Ba yele wana ba'ahɛ la, ba vaɛ la tentɔnɔ yɛɛla ba mɛhe ge kaaha yeti, Wae! Wae! Teŋkantɛ dena wa. La dela teŋkana wa te sɛba n mɔne ɔɔnrɔnɔ ko'kantɛ ko'om la poan dɛna bontateba yɛhera ban koohe la bini. Ge te la pon ka yue ge te a bɔregɛ sɛla woo bahɛ. 20Sɛba n boe saazuo ha, tare ya popeelom la a sagaŋɔ la. Yenɛ nɛreba, la Yesu tontoneba, la nɔtɔgɔheba, tara ya popeelom. Se'ere n sɔe la, Yenɛ namehɛ en la n daa eŋɛ ya se'em la. 21Te Yenɛ soŋora n kpe'em dekɛ kugure n kanregɛ zona wo nɛɛrɛ lobe dɛ mɛ bahɛ ko'kantɛ la poan ge yɛta yeti, Babilon wan gbirige mɛ ge sagom ge te ba ka le nyɛ' dɛ yɛ'ɛha. 22Ba kan malom le wom kɔnlɔgɔ ŋmɛ'ɛreba la baambaandoma, la sɛba n peebere taletehe la tentana ho zen'en yɛ'ɛha. Ba me ka le malom nyɛ' tontoneba toonse'ere woo poan ho zen'en yɛ'ɛha. Ya ka le malom wom te ba nɛɛna nɛɛre poan ha. 23Dagɛ la butolela la ayema me bugum n wan laŋɛ ho zen'en. Ho me kelom kan le malom wom te pɔgɔdaana la seradaana yoona ho zen'en. Ho kɔɔheba la n daa de sɛba n gane zan'an teŋa wa woo poan. Ge ho dekɛ ho tiim yooro tooma la pan'ahɛ nɛra woo teŋa wa zuo. 24Ba namehɛ Babilon teŋa wa la ban daa nyɛ' nɔtɔgɔheba, la a nɛreba, la nɛresɛba woo te ba ko' teŋa wa zuo ziim bini la zuo.

will be added

X\