Pukre 17

1Te Yenɛ soŋoreba bayopɔe la ayema, se'em n tare laahe seyopɔe la wa'an n zen'en na yele mam yeti, Wa'ana te n pa'alɛ hɔ namehe seko taaba te yaloma se'em n gane zan'an la yeti a nyɛ' la. A dela teŋkantɛ la te ba mɛ lɛm kolaahe poohen la. 2Nabadoma teŋa wa zuo tom yalomtooma la nɛreba la n boe bini la la yaloma se'em n gane zan'an wa. Teŋa wa zuo nɛreba buge mɛ la a yalomtooma wo nɛra n buge daam se'em la. 3Te Yenɛ Sea la kɔ'ɔn tona la mam ge te Yenɛ soŋora la tara ma keŋɛ pɔgɔtia poan ha. Pɔgɔtia la poan te n nyɛ' pɔka te a zin'an bonsilimasio n de bonmɔlega zuo. Ba golehɛ la yu'urɛ se'a n toore Yenɛ eŋɛ bonsilimasio wa iŋa woo. A me tare la zuto toyopɔe la ila pia. 4Pɔka la mea yɛ' la fuo n de sabega la mɔlega. A yɛ la sanlema la sanlenkuga la kugasaalehe. A zanle la sanlema ko'wanɛ a nu'o poan. Ko'wanɛ la perɛ mɛ la yelenyalehetooma la yelefɛn'ɛhatooma. Wana wa woo daa yehe la a yalomtooma la poan na. 5Ba daa golehɛ la yu'urɛ eŋɛ a gbe'ere zuo. Ba me ka lilige yu'urɛ wa vɔnrɛ n de se'em. Ba golehɛ yu'urɛ la te, Babilon teŋkantɛ, teŋa wa zuo yaalegɔ la toonfɛn'ɛha zan'an ma'. 6N nyɛ pɔka wa n ko' nɛresɛba n na'ahe Yenɛ kekeko la nɛrebana sɛba n daa mɔɔle Yesu yɛla la. Mam n nyɛ' en bala la, la daa eŋɛ mam pakerɛ zo'e zo'e. 7Te Yenɛ soŋora la soke mam yeti, Wane te la eŋɛ hɔ pakerɛ? N wan lilige pɔka la, la bonsilimasio la vɔnrɛ n de se'em bo ho. Bonsilimasio la, se'em n tare zuto toyopɔe la ila pia te a ban' la. 8Bonsilimasio la te ho nyɛ' la wa daa vɔna mɛ, ge a ka le vɔna. A yeti a ze'ele la boko kantɛ la poan yehe na. A me han yehe bala na, ba wan sagom en. Ge nɛresɛba teŋa wa zuo te ba ka golehɛ ba yuya eŋɛ vom gɔŋɔ la poan gee daa nya baŋɛ naam teŋa wa zuo, han nyɛ' bonsilimasio la, la wan eŋɛ ba pakerɛ. A daa vɔe ge nananawa a ka le vɔna, ge a wan le ta vɔna. 9Dena wa tare la yam la bɔkerɛ kena na. Zuto toyopɔe la dela zɔya ayopɔe. Zɔya aŋa n bala, te pɔka la zin'an a zuo la. Zuto toyopɔe la me le dɛna la nadoma bayopɔe. 10Te banuu pia la poan na'am n ba'ahɛ. Ayena me n nan kelom sɔna behera ge te ayema le me, nan ka wa'ana. Ge a han wa'an, a kan bɔna yue. 11Te bonsilimasio la n daa wa vɔna, ge daa wa le ka bɔna la mɛŋa n de naba se'em n pa'ahɛ nadoma banii. A lagom de'a la nadoma bayopɔe la nɛra ayema. A me ye' la sagaŋɔ poan. 12Ge ila pia la te ho nyɛ' la, dela nadoma pia. Ba me nan ka pɔhɛ sɔna behera nana. Ge ba wan bo ba paŋa te ba sɔna behera wo nadoma. Ba yeti ba naa mɛ la bonsilimasio la sɔna behera dabaherɛ fiin wa ma'an. 13Ba pia la woo lagom tara la potɛn'ɛrɛ deyena. Ba me dekɛ ba paŋa, la ba sɔ'ɔlom bo la bonsilimasio la. 14Ba yeti ba zabɛ mɛ la Pebila la. Ge Pebila la, la sɛba te a yi', la sɛba te a loe la, la sɛba n de birikindoma wan lagom taaba nyaŋɛ ba. Se'ere n sɔe la, Pebila la n de sɛba n de Daandoma la Daana, la Nabadoma Naba. 15Te Yenɛ soŋora la me daa yele ma yeti, Kolaahe la te ho nyɛ' te teŋkantɛ la te yaloma la zin'an bo zuo la dela tenhen, la nɛreba buuri buuri, la buuri yema yema, la yetɔgom buuri buuri. 16Ila pia la, la bonsilimasio la te ho nyɛ' la wan yaɛ yaloma la. Ba wan dekɛ sɛla woo te a tara ge bahɛ en beele. Ba me wan obe a iŋa la ge nyɔ' en la bugum. 17Se'ere n sɔe la, Yenɛ n bahɛ te ba potɛn'ɛra kɔ'ɔn tɛn'ɛha bɔta la ba tom Yenɛ potɛn'ɛrɛ n bote se'em. Ba ete dena wa yɛhera la ban tone la nɔyenɛ ge bɔ'ɔra bonsilimasio la ba paŋa te a sɔna behera la. N yete a sɔna behera la dela boyena la sɛla yuun pon golehɛ eŋɛ Yenɛ gɔŋɔ poan la. 18Ge pɔka la te ho nyɛ' la dela teŋsɛka n gane zan'an la. Teŋkaŋa la n sɔe nadoma teŋa wa zuo behera la.

will be added

X\