Pukre 15

1Mam le nyɛ yelenyalema a se'a saazuo ha. Soŋoreba bayopɔe n boe bini tara namehegɔ sugumnɔɔren boyopɔe la. Namehekona n de ba'ahegɔ. Se'ere n sɔe la, bama poan te Yenɛ sunsunyiim la wan perɛ. 2Te n le behɛ nyɛ' sɛla ayema n ane wo ko'kantɛ n nyagere wo beheŋa la. Bo lagom mɛ la bugum. N me nyɛ' sɛba n daa nyaŋɛ bonsilimasio la, la sɛla yagom la, la a yu'urɛ la de a danlehom te ba golehɛ dela. Ba ze' la ko'kantɛ la n nyagere wo beheŋa la zanle kɔnlɔ te Yenɛ dekɛ bo ba. 3Ba yuunɛ la Yenɛ yameŋa Moses yuunɛ bɔ'ɔra Pebila la. Ba yuune te, Na'ayenɛ to Yenɛ, Gaŋɛ Zan'an Yenɛ, ho eŋɛ yelenyalema te la eŋɛ nɛra woo pakerɛ. Teŋhe woo naba, ho yɛla dela tontɔɔ la yelemɛŋɛrɛ. 4Na'ayenɛ, nɛra woo zote ho mɛ. Nɛra woo mi' te ho dela se'em n gane zan'an. Hon ma'an n de Fa'a. Teŋa wa zuo nɛreba woo wan wa'an ho nɛŋa na na'aha hɔ. Se'ere n sɔe la, nɛra woo nyɛ' ho tontɔɔtooma la mɛ. 5Dena wa n tole la, n nyɛ' te Yenɛ Yire se'em n de Sogorɛ la yu'ɛ saazuo ha. 6Te Yenɛ soŋoreba bayopɔe, sɛba n tare namehegɔ sugumnɔɔren boyopɔe la daa yehe Yenɛ Yire la poan na. Ba yɛ' la fupeelehe ge dekɛ sanlema sɛganɛ kantɛ lo' ba nyɔn'ɔnrɔ. 7Te kelompagehedoma banaahe la ayema dekɛ sanlema laahe seyopɔe bo soŋoreba bayopɔe la. Laahe la da perɛ mɛ la Yenɛ se'em n bo wuuha la sunsunyiim. 8Zun'uhe n perɛ Yenɛ Yire la yehe Yenɛ soŋa la a paŋa la poan. Nɛnɛra me kan ta'an kɛn' Yenɛ Yire la poan han dagɛna la soŋoreba bayopɔe la n tare namehegɔ sugumnɔɔren boyopɔe la n ta ba'ahɛ.

will be added

X\