Pukre 14

1Te n le behɛ nyɛ te Pebila la yaga Zion Zoore la zuo ha. Enŋa la nɛreba tuhure kɔbega la tuha pihinaahe la tuha anaahe (144,000) ze' bini ha. Pebila la yu'urɛ la a Sɔ yu'urɛ te ba daa golehɛ eŋɛ nɛreba la gbɛ'ɛra zuto. 2Te n wom te nɛra tɔgɔra saazuo ha. A nyabegɛ wo bɔka ko'om n surugere la paŋa wo saa n tanhɛ la, ge nyabegɛ wo kɔnlɔgɔ ŋmɛ'ɛreba n ŋmɛ'ɛre ba kɔnlɔgɔ la. 3Te nɛreba tuha kɔbega la tuha pihinaahe la tuha anaahe (144,000) la ihege ze'a tɔ na'am gɔŋɔ la, la kelompagehedoma banaahe la, la kemadoma la. Ba yoon la yoonpaalɛ. Nɛnɛra ka ta'an zamehɛ yuun dena wa han dagɛna la bama ma'an. Saaleba woo poan bama ma'an n nyɛ faanre. 4Ba dela boraa se'ehe n tare ba mɛhe soŋa soŋa ge ka gan'anrɛ la pɔgɔhe. Ba dole Pebila la yɛ'a zen'an woo te a yɛ'a. Yenɛ n daa duuhe ba ba yelebe'ero poan te ba dɛna yiadoma bo en la Pebila la. 5Ba nan ka tabelɛ parom ponpɔrɔŋɔ. Ba me ka tare tuure. 6Te n le nyɛ' soŋora ayema me te a ɛngera n zuo ha. A tare la yelesoma la n tɔgɔra yɛhera la vom sebo n ka tare ba'ahegɔ la Yenɛ zen'en la. A yeti a mɔɔlɛ de bo nɛresɛba n boe teŋa wa zuo la, la teŋhe woo, la buuri woo, la yetɔgom sebo woo, la nɛreba buuri buuri woo. 7A yele kekeko yeti, Na'aha ya Yenɛ ge bo ya en pɛnka. Se'ere n sɔe la, dabaherɛ la paɛ ya te a gankɛ nɛresaala. Na'ahera ya se'emdaana n naam saazuo, la teŋa wa zuo, la ko'kantɛ la, la bɔgɔhe la n buule ko'om la. 8Te soŋora se'em n pa'ahɛ boyi' la doohe soŋora yiadaana la poore ge yɛta te, Babilon teŋa gbirige ya! Babilon Teŋkantɛ la gbirige ya! Babilon teŋa bahɛ te teŋa zuo teŋhe nɛreba zan'an nyu' la a yaalega daam la buge. 9Te soŋora se'em n pa'ahɛ botan' la dɔla yia soŋoreba bayi' la ge yɛta yeti, Ya sɛba n na'ahere bonsilimasio la la ban yagom sɛla bo en la, ge to'e danlehom la ya gbe'ere zuo bii ya nu'o poan, 10wan nyɛ' namehegɔ Yenɛ zen'en. Bo me dela sunsunya daam sebo ta a ka'ɛ bo eŋɛ a gankerɛ wama poan ge ka pule bo la ko'om la. Ge sɛba woo n eŋɛ dena wa, bugum la, la kuguse'a n dite la bugum la wan di' ba Yenɛ toolom soŋoreba la Pebila la nɛŋan. 11Zun'uhe la n yehere bugum sebo n dite ba poan la wan zɔna ha wuuha. Sɛba n po'ohere bonsilimasio la la sɛla te ba yagom bo en la kan nyɛ' vo'ohogo wontɛɛŋa la yu'uŋɔ zan'an. Bala mea me, n wan eŋɛ se'em woo n tare danlehom la n de a yu'urɛ la. 12Dena wa dela Yenɛ nɛreba dɛna birikindoma ge gurɛ Yesu kaŋkaŋɛ. 13N le wom konkore n tɔgɔre saazuo ha yeti, Golehɛ yeti yehe zina yɛ'ɛha popeelom wan bɔna sɛba n ki Na'ayenɛ tooma poan. Te Yenɛ Sea la lebehe yeti, La kɔ'ɔn de'a la bala. Ban wan vo'ohe mɛ yɛhera la ba toon kpe'eŋo la poan. Se'ere n sɔe la, Na'ayenɛ kan tamɛ ba ton se'em la. 14Te n le behɛ nyɛ' la saŋgbanɛ peelega, te sɛla zin'an bini wo asaala la. A vuga sanlema muŋa ge zanla kɛreŋa n dite a nu'o poan. 15Te Yenɛ soŋora ayema me yehe Yenɛ Yire la poan na. N yehe bala na la a kaahɛ la kekeko yɛta se'em n zin' saŋgbanɛ la zuo la te, Dekɛ ho kɛɛreŋa la la ho kɛ' dia la. Se'ere n sɔe la, teŋa la bi'e mɛ sekɛ kɛɛa. Dabaherɛ la paɛ ya te ba namehɛ potɔpa teŋa wa zuo. 16Bala, te se'em n zin' saŋgbanɛ zuo la, loboge a kɛɛrega kɛ' teŋa zuo. 17Te n le nyɛ' te Yenɛ soŋora ayema me yehe Yenɛ Yire n bo saazuo la poan. Enŋa me tare la kɛɛreŋa n dite. 18Te soŋora ayema me, se'em n sɔe bugum la behera la daa ze'ele kaanbegɔ zen'an la yehe na, tanhɛ soŋora se'em n tare kɛɛreŋa la n dite la, kekeko yeti, Dekɛ ho kɛɛreŋa la kɛ' wɔla la. Se'ere n sɔe la dia la bi'e ya. 19Bala te soŋora la daa dekɛ a kɛɛreŋa la daa kɛ wɔla, ta ka'ɛ ba eŋɛ tiihe wɔla daam ŋmɛkerɛ zen'an n de Yenɛ sunsunyiim la. 20Te ba daa ŋmɛkɛ wɔla la sɛnka poan ha la, ziim n daa yehe na, ulegɛ gan'an zaan mɛɛla kɔbega la pihinii, ge te bo ko'olom paɛ wo santira anuu.

will be added

X\