Pukre 12

1Yelenyalema n nɛɛ saŋgbanɛ poan ha. Pɔka n daa bo ha te a futo dɛna yentule, te ŋmarega bɔna a natala poan ha. A me vuge la muŋa te ŋmarebibihe pia la bayi' bɔna ko poan. 2Pɔka la pɔnre mɛ te a dɔgɛ. Te a iŋduŋa la la namehe seko te a nyɛta yɛhera la a dɔgom la poan bahɛ te a kaaha mɛ. 3Yelenyalema deyena me n le nɛɛ saŋgbanɛ poan ha. Bonsɛ'kantɛ n de mɔlega n boe ha. A tare la zuto toyopɔe la ila pia te a zuto la daa vuga muŋa muŋa. 4A daa dekɛ la a zuurɛ uue lɔgɔrɛ deyena ŋmarebibihe saŋgbanɛ poan ha lɔga atan' la poan, lobe bahɛ teŋa wa zuo na. A ze' me la pɔka la te ka han kɔ'ɔn dɔgɛ, a obe a bia la. 5Te pɔka la dɔgɛ bodibila. Bodibila wa yeti a dekɛ la kurugo doore sɔna teŋhe woo behera. Ge ba zɛ' en tare en keŋɛ Yenɛ zen'en la a na'am gɔŋɔ la poan. 6Pɔka la me zɔ' keŋɛ la mɔɔ zen'an te Yenɛ daa maalɛ bo en. Dabeha tuhure la kɔbehe seyi' la pihiyoobe te a wan bɔna bini te ba behera en soŋa soŋa. 7Te zaberɛ daa kɔ saazuo ha. Te Yenɛ soŋora Mikael la soŋoreba zabera la bonsɛ'kantɛ la. Te bonsɛ'kantɛ la a soŋoreba la me zabera lɛbeha ha na. 8Ge ba nyaŋɛ bonsɛ'kantɛ la. Ban nyaŋɛ en bala la, ba ka sakɛ te enŋa la a soŋoreba la le bɔna saazuo ha. 9Ba dekɛ bonsɛ'kantɛ la lobe bahɛ mɛ na. Enŋa n de deeme deeme ha bonsɛla la te ba yi'ira en Dima la sagona la enŋa n bala dɔla pan'aha teŋparɛ wa zuo zan'an. Ba dekɛ en mɛ la a soŋoreba la lobe bahɛ teŋa wa zuo na. 10Te n daa wom te konkore vɔɔla saazuo ha yeti, Yenɛ faanrɛ dabaherɛ la nya paɛ ya. Yenɛ nya pa'alɛ a paŋa te a dela naba. Se'em te Yenɛ Loe la nya pa'alɛ a paŋa. Se'ere n sɔe la, ba tɛnbɛ se'emdaana n ne ze'a to Yenɛ nɛŋan wontɛɛŋa la yu'uŋɔ zɛrɛgera sɛba nam Yenɛ la bahɛ na. 11Ba n nyaŋɛ en la Pebila la ziim la poan, la yelemɛŋɛrɛ la te ba mɔɔla la, ba daa ka gangɛ kum. 12Bala, se'em woo n boe saazuo ha, tara ya popeelom. Ge behɛ ya namehe seko te teŋa wa zuo la ko'kantɛ la yeti ba nyɛ'. Se'ere n sɔe la sagona la wa'an ya zen'en na. A sunsunya nyii mɛ. Se'ere n sɔe la, a mi' te a dabaherɛ la ka le gee zo'e te a tom a tooma. 13Te bonsɛ'kantɛ la n daa baŋɛ te ba lobe en bahɛ la teŋa wa zuo na la, a doohe pɔgɔsɛka n dɔgɛ bodibila la na'ma. 14Ba bo pɔka wa la tuguho kelompagehe seyi'. Ba bo ka bala te a ta'an ɛnkɛ keŋɛ a zen'en mɔen. Zen'kaŋa te ba yeti ba behera en saŋa, saŋhe, la saŋa gito te bonsɛ'kantɛ la kan ta'an daan en. 15Te bonsɛ'kantɛ la okɛ ko'om woo kolaa n perɛ la ma' pɔka la ha te bo zɛ' en tare keŋɛ. 16Ge teŋa wa zuo soŋɛ pɔka la. Teŋa wa zuo ya'ɛ la nɔɔrɛ nyu' ko'om la n ze'ele bonsɛ'kantɛ la nɔɔrɛn la zan'an. 17Bonsɛ'kantɛ la sunsunya n nyii pɔka la. Te a nya keŋɛ te a zabɛ la pɔka wa yaahe woo. A yaahe la dela sɛba woo n de birikindoma bo Yenɛ pa'alegɔ la ge gurɛ yelemɛŋɛrɛ la kaŋkaŋɛ te Yesu pa'alɛ la. 18Te bonsɛ'kantɛ la ze'a ko'kantɛ la nɔgbenɛ.

will be added

X\