Pukre 1

1Gɔŋkona wa liligere la Yesu Krista yɛla, Yenɛ n bo en yɛla la te a dekɛ pa'alɛ a yamehe sɛla n wan eŋɛ nananawa. A tom la a soŋora te a lilige yɛla ana wa bo a yameŋa Yon. 2Sɛla woo te Yon wom n la wana: Yenɛ yelehom la, la yelemɛŋɛrɛ la te Yesu Krista tɔgɛ la la sɛla woo te a nyɛ' la. 3Popeelom boe sɛbadoma n kaanlɛ gɔŋkona wa n golehɛ yɛta sɛla n wan wa'an pooren na. Popeelom boe sɛbadoma n kelehe yetɔgom sebo te ba mɔɔlɛ wa ge nana sɛla te ba golehe eŋɛ gɔŋɔ wa poan wa la. Se'ere n sɔe la, dabaherɛ la pɔnre te wana wa woo wan eŋɛ. 4Mam Yon n golehere bɔ'ɔra lagaŋɔ toyopɔe la n boe teŋse'ehe n lɛm Asia teŋa poan la. Yenɛ zo'ohogɔ la a sunma'ahom wan bɔna la ya. Yenɛ se'em n boe wa, la se'em n daa pon bɔna, la se'em n wan bɔna wuuha la sɛɛhe seyopɔe la n boe a Sɔ'ɔlom la poan la, 5la Yesu Krista. Enŋa n de se'em n tɔgɔre yelemɛŋɛrɛ ge dɛna yiadaana ta a vo'e a kum poan ge me dɛna nadoma naba teŋa wa zuo. A nɔŋɛ tɔ ge ki' to'e to, to yelebe'ero poan bahɛ. 6A bahɛ tɔ te to dɛna malemadoma buuri bɔna a Sɔ'ɔlom la poan tona bɔ'ɔra a Sɔ' Yenɛ. Pɛnka la paŋa wan bɔna la Yesu Krista daarɛ woo. Taarɛ. 7Behɛ ya Yesu n bala n ze'ele saŋgbana zuo kena na la. Nɛra woo wan nyɛ' en, la sɛba n daa lo' en la kanɛ la wan nyɛ' en. Nɛra woo n boe teŋa wa zuo wan kele a zuo mɛ. Bala n yeti la eŋɛ. Taarɛ. 8Na'ayenɛ to Yenɛ se'em n de Gaŋɛ Zan'an Yenɛ la se'em n boe, la daa pon bɔna, la wan bɔna wuuha wa yeti, Mam n de Pin'ileŋɔ la Ba'ahegɔ. 9Mam Yon n de ya sɔɔn la ayema. Ge me lagom namehera la ya, to bɔŋa Yesu sore la, la a Sɔ'ɔlom la poan, la sundin'inhegɔ. Mam daa mɔɔlɛ la yelesoma la, te ba daa nyɔkɛ mam ta bahɛ Patmos n de teŋpeka bɔna ko'om teŋasoka ha la te n nyɛ namehegɔ. 10Na'ayenɛ daarɛ la, a Sea la daa kɔ'ɔn tona la mam mɛ, ge te n daa wom te nɛra ayema vɔɔla n pooren wo tentanɛ la 11yeti, Golehɛ sɛla te ho nyɛ' wa la ho dekɛ gɔŋɔ la ta bo lagaŋɔ toyopɔe la n boe Epesus la Smirna la Pergamum la Tiatira la Sardis la Piladelpia la Laodisea tenhen poan la. 12Te mam ŋmɛregɛ te n behɛ ane n tɔgɔre bɔ'ɔra mam. Te mam n ŋmɛregɛ, n daa nyɛ' la sanlema butolela ze'elehe bonkanra seyopɔe. 13Te ba teŋasoka, sɛla n daa ze' ana wo asaala yɛ' fuwoko te ko paara a na'ma zan'an la te sanlema sɛganɛ kantɛ lo' a nyɔn'ɔn bɔba la. 14A zuo la a zonto daa pelege mɛ yere yere. Ge te a nini daa nyagera wo bugum la. 15A natala daa nyagere mɛ wo nyɔgom te ba duuhe la bugum la. Te a konkore damena wo ko'om n surugere la paŋa na la. 16A gurɛ la ŋmarebibihe seyopɔe a zuɔ nu'o, te so'a te ka gɛɛrehe seyi' la dita ze'ele a nɔɔrɛ poan yehe na. A nɛŋa la daa nyagere mɛ wo yentule la. 17Te mam n nyɛ' en la, n daa lu' la a nɛŋan wo n ki' me la. Te a dekɛ a zuɔ nu'o pagalɛ mam ge yeti, Da zɔta dabeem. Te mam n de Pin'ileŋɔ la Ba'ahegɔ. 18Mam vɔe mɛ. N daa ki' mɛ, ge behɛ, n vɔe mɛ, bɔna wuuha. Mam n sɔe kum la ke'endoma n boe zen'an la behera. 19Bala, golehɛ yelese'a to ho nyɛ' nananawa la yelese'a n wan eŋɛ pooren. 20Ge ŋmarebibihe seyopɔe la te n zanla n zuɔ nu'o wa la sanlema butolela ze'elehe te ho nyɛ' wa vɔnrɛ dela. Te ŋmarebibihe seyopɔe la dela lagaŋɔ toyopɔe la soŋoreba n bala. Ge te sanlema butolela ze'elehe seyopɔe la me dela lagaŋɔ toyopɔe la.

will be added

X\