Yooma 99

1Na'ayenɛ n sɔe zan'an beha. Bahɛ te teŋhe wa zan'an gbe'era la dabeem. A zin' la a na'am gɔŋɔ zuo te kelompagehedoma kae en. Bahɛ te teŋparɛ wa gbe'era la dabeem. 2Zion Na'ayenɛ la kanregɛ mɛ. Enŋa n sɔe teŋhe wa beha. 3Bahɛ te ba pɛngɛ ho yu'urɛ la kanregɛ mɛ ge dɛna dabeem yu'urɛ la. Na'ayenɛ dela fa'a. 4Naba la kpe'em mɛ. A nɔŋɛ la sera. Hom ete nɛra woo la boyena. Ho eŋɛ la sera, la yelemɛŋɛrɛ Yakob yire la poan. 5Zɛnkɛ ya Na'ayenɛ to Yenɛ wa yu'urɛ, ge na'aha en a na'ma teŋa. A dela fa'a. 6Moses la Aron yuun dela enŋa malemadoma. Samuel pa'ahɛ sɛba n po'ohe la poan mɛ. Ba ne kaahɛ bo la Na'ayenɛ, te a ne kelehe ba. 7A daa tɔgɛ bo ba la saŋgbanɛ la poan na. Ba yuun dole a kan'aŋɔ la malema te a bo ba la mɛ. 8Na'ayenɛ to Yenɛ wa, hom yuun kelehe ba sohoga mɛ. Hom yuun dela suguru Yenɛ bo Israel, la hom pon namehɛ ba ba toonbe'ero la zuo la. 9Zɛnkɛ ya Na'ayenɛ to Yenɛ wa yu'urɛ. Na'ahɛ ya en a toolom zoore la zuo. Na'ayenɛ to Yenɛ la dela fa'a.

will be added

X\