Yooma 94

1Na'ayenɛ, Yenɛ se'ere n lete wa, Yenɛ se'ere n lete wa, nɛɛ na. 2Teŋparɛ zan'an gankera wa, ihege mɛ. Lebehe yɔ pa'alɛ mɛŋa doma la ba yɔɔrɛ n de se'ere. 3Na'ayenɛ, toonfɛn'ɛhadoma, toonfɛn'ɛhadoma wa wan nyeena yuura la wane? 4Ba ogore la yetɔgɔyooro. Toonbe'erodoma la woo okore mɛ, ba perɛ mɛ la pa'alɛ mɛŋa. 5Na'ayenɛ, ba wɔnte hom nɛreba la mɛ. Ba muguhere hom sɔ'ɔlom la mɛ. 6Ba kɔrɔne pɔkɔnpa mɛ la saama, koora keenbehe. 7Ba yeti Na'ayenɛ ka nyɛte. Yakob Yenɛ la ka kelehe. 8Gɔɔnɔ wa n boe nɛreba wa poan wa, behɛ ya soŋa. Geto wa, wane ma'an te ya wan nyɔkɛ yam? 9Se'emdaana n maalɛ toberɛ la ton ka wuna? Se'emdaana n maalɛ niho la ton ka nyɛta? 10Se'em n dɔnlegere teŋhe toba la wan bahɛ kan dɔnlegɛ? Enŋa se'em n pa'alɛ nɛreba yam la, ton ka tara yam. 11Na'ayenɛ mi' nɛresaala tɛn'ɛhegɔ mɛ, a mi' te nɛra tɛn'ɛhegɔ ka tare vɔnrɛ. 12Na'ayenɛ, kan'an boe mɛ la se'em te a dɔnlegɛ a toborɛ. Kan'an boe mɛ la se'em te hom pa'alɛ en ho pa'alegɔ la poan. 13Ho fan' en bahɛ mɛ daaŋɔ daarɛ, gura te boko ta tun' biŋe toonfɛn'ɛhadoma la. 14Na'ayenɛ kan zagahɛ a nɛreba. A kan malom bahɛ a sɔ'ɔlom la. 15Yelemɛŋɛrɛ wan bɔna yetɔgom zen'enhe poan, te sɛba woo sunya n de ma'an la wan dɔla dɛ. 16Ane wan zabɛ toonfɛn'ɛhadoma wa bo mam? Ane wan zabɛ la be'emdoma wa? 17Yenɛ han ka bo ne mam soŋorɛ, wana ma'an mam boe la kum poan baanlam. 18Mam han ta yeti mam na'ma n sɛrɛhe, hom Na'ayenɛ zo'ohogɔ wan n ne tɛ'ɛla mam. 19Sunsagaŋɔ han ne ta zo'e n zen'an, hom Na'ayenɛ pan'ahegɔ wa ne tare nyeema na bo mam suunre. 20Ŋmɛlema na'am wan ta'an naɛ la hom? Se'em n ŋmɛlene malema kan ta'an naɛ la hom? 21Ba naɛ la taaba zabera la tontɔɔdoma la, koora sɛba n ka tare tuure. 22Ge Na'ayenɛ n de mam paŋa zen'an, mam Yenɛ, la mam taŋa sɛka te mam sogɛ ka poan. 23A wan yɔ ba ba tuure la. A wan sagom ba ba toonfɛn'ɛha la zuo. Na'ayenɛ to Yenɛ la wan sagom ba.

will be added

X\