Yooma 92

1La ane soŋa te to pɛngɛ Na'ayenɛ, ge yoon yooma pɛngɛ hom Saazuo Daana wa. 2ge mɔɔla ho zo'ohogɔ la yele bolika woo, ge mɔɔla ho sakerɛ sera la me yele yu'uŋɔ woo. 3To wan pɛngera hɔ la giinli pia kɔnlɔgɔ, la gɔlɔmɛŋkɔ. 4Se'ere n sɔe la, hom Na'ayenɛ tooma la bo'ore mam la nyeema. Mam yoone mɛ la nyeema ho nu'uhe tooma la zuo. 5Na'ayenɛ ho tooma kanregɛ mɛ. Ho tɛn'ɛhegɔ dela ma'an. 6Gerego ka mi'. Gɔɔnɔ ka bɔkere yeti, 7Toonfɛn'ɛhadaana ihegere mɛ wo mɔɔ, te be'emdoma panta ge ba wan nyɛ sagaŋɔ kan le lebena. 8Ge hom Na'ayenɛ boe la bala ka tara ba'ahegɔ. 9Ge yelemɛŋɛrɛ, han dɛna ho diŋdoma la, hom Na'ayenɛ diŋdoma la, ba wan mɛlom. Be'emdoma woo wan mɛlom. 10Hom bahɛ te mam kpe'em mɛ wo mɔen lɔlega la. Kaam somɔ n dekɛ ka'ɛ yeele mam. 11Mam nini nyɛ mam dima te ba nyaŋɛ en se'em mɛ, te mam toba wom n diŋdoma toonfɛn'ɛhadoma la kaahega. 12Tontɔɔdoma la wan puura wo tɔ'a la. Ba wan zɔ'ɔra wo Lebanon teŋa mɔlɔsonɔ tia, 13sɛ Na'ayenɛ Yire la poan. Ba wan puhura soŋa to Yenɛ yire zenzaka la poan. 14Ba wan ta korogɛ ge kelom wɔna, te ba vɔntɔ kelom ma'ɛn soboge, 15te ba mɔɔla yeti, Na'ayenɛ dela yelemɛŋɛrɛ. Enŋa n de mam taŋa, te be'em ka bɔna a poan.

will be added

X\