Yooma 9

1Mam wan pɛngɛ Na'ayenɛ la n suunre zan'an. Mam wan mɔɔlɛ ho nyalematooma la yele. 2Mam poorɛ wan pee, te n nyeena hom poan. N wan yoon yooma pɛngɛ hom Gaŋɛ Zan'an Yenɛ yu'urɛ wa. 3Mam diŋdoma han ne nyɛ hɔ, ba ne ŋmɛregɛ mɛ. Ba tu'una ŋmɛ'ɛra na'ma, ta mɛlom ho nɛŋan. 4Bala, hom nyɛ mam yelemɛŋɛrɛ la mam yele. Tontɔɔ gankerɛ ma'an n boe hom na'am gɔŋɔ la zuo. 5Ho zagahɛ teŋhe mɛ. Ho sagom be'emdoma mɛ. Ho saalom ba yu'ura nananawa kɔ'ɔn yɛ'ɛha. 6Sagaŋɔ n ka tare ba'ahegɔ nyɔkɛ diŋdaana la. Ho voen ba teŋkanra la bahɛ mɛ. Sɛla n wan dekɛ ne tɛnra ba la saalom ya. 7Na'ayenɛ behera teŋparɛ la wuuha. A maahom la a na'am koka te a zin'ire gankɛ. 8A yeti a dekɛ la tontɔɔ bɔŋa gankɛ teŋparɛ wa. A wan gankɛ teŋparɛ wa mɛ la lan nare se'em. 9Na'ayenɛ n de nahadoma sokazen'en, ge dɛna paŋa zen'an bo sunsagaŋɔ saŋa. 10Sɛba n mi' ho yu'urɛ la wan dɛla hɔ. Se'ere n sɔe la hom Na'ayenɛ ka tabelɛ zagahɛ sɛba n eere hom. 11Yoon ya pɛnka yooma bo Na'ayenɛ n zin' Zion wa. Mɔɔlɛ ya a tooma la bo nɛreba. 12Na'ayenɛ tɛnre a nɛreba mɛ, lɛta ba diŋdoma, ge lɛbeha lan wune sɛba kaahega. 13Na'ayenɛ, zɔ n ninbɔn'ɔn, behɛ sɛba n yaɛ mam wa n namehe mam se'em. Fan' mam kum nu'uhen bahɛ, 14te n pɛngɛ hɔ. N nyaŋɛ ze'ele Yerusalem nayahe wa nɔɔrɛn, la nyeem ho faanrɛ wa poan. 15Teŋhe la zan'an lu' la boko seko te ba mɛhe tun' la poan. Ba sige bɛnregɔ seko te ba mɛhe ga'ɛ sogɛ biŋe la poan. 16Na'ayenɛ nɛɛ a mɛŋa te to mina en. A bahɛ te narehom n tona. Be'emdoma mɛŋa nu'uhe tooma n bɛnrɛ ba nyɔgɛ. 17Be'emdoma zan'an wan sige yɔɔen. Teŋse'ehe woo n zagahɛ Na'ayenɛ, kum n de ba lɔkɔ. 18Na'ayenɛ kan malom tamɛ nahadoma yele, bii bahɛ sɛba n boe namehegɔ poan n tɛn'ɛhere se'em. 19Na'ayenɛ ihege, da bahɛ te asaala la nyaŋɛ yelese'ere poan. Bahɛ te ba gankerɛ teŋhe wa ho nɛŋan. 20Na'ayenɛ, dekɛ dabeem ma'an ko' ba. Bahɛ te teŋhe wa baŋɛ te ba dela nɛresaaleba ma'an.

will be added

X\