Yooma 89

1Mam wan yoona Na'ayenɛ nɔŋerɛ saŋa woo. Mam wan dekɛ n nɔɔrɛ mɔɔlɛ ho sakerɛ sera wa yele bo buuri woo. 2Mam wan yele te ho nɔŋerɛ la sɛ mɛ kaŋkaŋɛ ka tare ba'ahegɔ, te ho sakerɛ sera sɛ Yenɛ mɛŋa yire poan. 3Ho yeti, N biŋe la nɔɔrɛ la se'em te n loe wa. N biŋe la nɔɔrɛ bo n yameŋa naba David yeti, 4n wan sɛ a yaahe ze'ele yɛ'ɛha, ge bahɛ te a buuri la zin'an na'am gɔŋɔ la zuo yɛ'ɛha. 5Na'ayenɛ, saazuo ha pɛngere la ho nyalematooma la, te ho soŋoreba la pɛngera ho sakerɛ sera la. 6Ane boe saazuo ha wan dekɛ makɛ la hom? Ane boe Yenɛ soŋoreba wa poan wan dekɛ makɛ la hom Na'ayenɛ? 7Saazuo doma lagaŋɔ la poan Yenɛ te ba zɔta. Hom n de dabeem gana sɛla woo n kae ho la. 8Na'ayenɛ n de Pɛɛntɛɛnreba nɛŋadaana wa, ane boe kpe'em wo hom Na'ayenɛ? Saksera ma'an en kae hɔ mum. 9Hom behere ko'kantɛ wa. Ko'mi'inhe la han ta ihegera, hom bahere te se ana sim. 10Hom tɔnhɛ Arahab wo nɛra te ba ko bahɛ. Hom mɛŋa paŋa en dige ho diŋdoma te ba zɔ. 11Saazuo woo dela hom denɛ, te teŋparɛ wa dɛna hom denɛ. Hom naam ba, la sɛla woo n boe ba poan. 12Hom naam zuɔ, la gɔbega bɔba wa zan'an. Tabor la Hermon zɔya kanra wa yoone mɛ la nyeema pɛngere ho yu'urɛ. 13Ho kpe'em mɛ. Ho paŋa la gaŋɛ mɛ. Ho nu'o paŋa la gaŋɛ mɛ. 14Tontɔɔ vom, la narehom en te'e ho na'am gɔŋɔ la teŋa, te nɔŋerɛ kantɛ la sakerɛ sera bɔna ho nɛŋa. 15Popeelom boe mɛ la sɛba n mi' ho de'eŋɔ yoona la, ba wan kena hom Na'ayenɛ nɛɛhom la poan saŋa woo. 16Ba nyeene mɛ ho yu'urɛ la poan daarɛ woo, ge tara zuo la ho tontɔɔ vom la n boe ba poan la. 17Hom n de ba soŋa la ba paŋa. Hom ninbɔn'zɔrɛ la zuo te to paŋa wa tara zuo. 18Yelemɛŋɛrɛ, tomam tɛ'ɛla dela Na'ayenɛ. Tomam naba dela Israel fa'a Daana la. 19Ho tabelɛ tɔgɛ mɛ doohe liligere poan bo ho sakerɛ sera nɛreba wa yeti, N soŋɛ la nɛra en kpe'em. N zɛnkɛ la se'em te n loe nɛreba la poan. 20Mam loe n yameŋa David, ge dekɛ n toolom kaam la sɔ' en. 21Mam nu'o wan paga a zuo saŋa woo, mam mɛŋa paŋa n wan dɛna a paŋa. 22Dima kan malom nyaŋɛ en te a bɔna a nu'uhen. Toonfɛn'ɛhadaana kan malom nyaŋɛ muguhe en. 23N wan wɔnrɛ a diŋdoma a nɛŋan, ge ko sɛba n zaberɛ la en. 24Mam sakerɛ sera, la mam nɔŋerɛ la wa bɔna a zuo. Mam yu'urɛ poan, a paŋa wan nyɛta yu'urɛ. 25N wan bo en paŋa te a sɔna ko'kantɛ, la kolaahe woo la se teŋhe beha. 26A ne wan yi' mam yeti, Hom n de mam sɔ, mam Yenɛ, la mam faanrɛ taŋa. 27N wan eŋɛ en n dayɔkeema. A wan dɛna teŋparɛ wa woo zuo naba sɛka n gane nadoma woo. 28N nɔŋerɛ kantɛ la wan bɔna la en ka tara pa'ahegɔ. Nɔbiŋere se'ere te n biŋe la en la kan malom bahɛ. 29N wan sɛ a buuri te ba bɔna bala yɛ'ɛha, te na'am la bɔna a yire yuura wo saŋgbanɛ n boe yuura se'em wa. 30A kɔma nya han ta bahɛ mam pa'alegɔ la, ka dɔla mam nɔze'elego la, 31ba han ta zagahɛ mam malema la, ka dɔla mam bo ba nɔse'ere la, 32n wan namehɛ ba la kpa'aherɛ ba tuure la zuo, n wan feebe ba ba be'em la zuo, 33ge n kan foe n zo'ohogɔ la ba poan, bii n yehe n sakerɛ sera la te n tara la en la poan. 34N kan zagahɛ n nɔbiŋere la, bii n luke n nɔɔrɛ la te en tɔgɛ se'em bo en la. 35Mam pɔ' la n fa'a yu'urɛ boyena. N ka parone bɔ'ɔra David, la mam yeti, 36a tuunhom wan bɔna la bala yɛ'ɛha, te na'am la bɔna a yire saŋa woo mam nɛŋan wo wontɛɛŋa wa n boe saŋa woo se'em la. 37Na'am la wan sɛ a yire la poan wo ŋmarega n de saazuo aseradaana sɛ zɛ'a saŋgbana zuo se'em la. 38Ge nananawa, ho zagahɛ en mɛ, ho lobe en bahɛ mɛ, ho eŋɛ la suunre la se'em te ho mɛŋa sɔ' la kaam la. 39Ho luke nɔbiŋere la te ho biŋe la ho yameŋa wa la mɛ. Ho vuke a muŋa la mɛ vɛɛnlom teŋa ganlom ka. 40Ho aanhom a dangɔɔma mɛ, kɛn' gbirige a paŋa zen'enhe la, te a lebege daboo. 41Se'em woo n dole tɔla faanre en la n bote se'em, te a taaba kɛha en. 42Ho bo la a diŋdoma paŋa, ho bo a diŋdoma la nyeema. 43Hom salɛ a zaba so'a bahɛ, ka soŋora en pɛɛntɛɛnrɛ poan. 44Hom gu' a na'am kpe'eŋo la, ge kpilom a na'am gɔŋɔ la lobe bahɛ. 45Hom ŋmaɛ a bonbilomen dabeha bahɛ, ge pin' en la nyanɛ. 46Na'ayenɛ wane ma'an? Hom yeti ho bahɛ mam yuue la wane? Hom sunsunyiim wa n dite wo bugum wa yeti bo yuue la wane? 47Tɛnra te n dabeha ka zo'e. Tɛnra te ho naam saaleba la yoo. 48Ane wan bɔna kan malom ki, bii fan' a mɛŋa yɔɔ paŋa poan? 49Na'ayenɛ, ho yia zo'ohogɔ la te ho ze'ele ho sakerɛ sera la poan biŋe nɔɔrɛ la David la bɛɛ? 50N Daana, tɛnra ban ɛnregerɛ ho yameŋa wa se'em. Tɛnra mam unhure la teŋhe wa woologo wa n suunre wa poan se'em. 51Na'ayenɛ tɛnra woologo seko te ho diŋdoma wa ɛnregera mam se'em te ho sɔ' la kaam wa n na'arɛ zɛnkere woo la. 52Pɛnka dela Na'ayenɛ denɛ saŋa woo. Taarɛ, Taarɛ.

will be added

X\