Yooma 88

1Na'ayenɛ, hom de Yenɛ se'ere n faanre mam. Bolika la yu'uŋɔ mam kaahere bɔ'ɔra la hom na. 2Bahɛ te n sohoga wa paɛ ho nɛŋan na. Kelehe n kaahega wa. 3Mam suunre perɛ mɛ la daaŋɔ, te mam yɛ'a kum. 4Mam kanlɛ pa'ahɛ la ke'endoma poan. Mam ane wo nɛra n banlɛ la. 5Mam yelege pa'ahɛ la ke'endoma poan. Mam ane wo sɛba n boe yɔɔen te hom ka le tɛnra ba yele la. Sɛba n ka le bɔna ho soŋorɛ poan la. 6Ho dekɛ mam bahɛ la yɔɔ poan, zen'an n boe lika poan poan ha. 7Ho sunsunyiim n ba' taɛ bahɛ mam zuo. Ho libe mam mɛ la ho ko'mi'inhe zan'an. 8Ho bahɛ te mam zɔdoma paɛ paɛ zagahɛ mam mɛ, ge eŋɛ mam te mam dɛna dabeem lɔkɔ bo ba. Mam boe la paka deo poan kan ta'an peɛn. 9Ninbɔn'ɔn ma'an n fɔ mam nini. Na'ayenɛ, mam yi'ire la hom daarɛ woo. Mam zɛnkɛ n nu'uhe bo la hom. 10Hom tone nyalema bɔ'ɔra ke'ema mɛ yoi? Sɛba n ki wa wan ta'an ihege na pɛngɛ hom mɛ yoi? 11Sɛba n boe yɔɔ poan wan ta'an tɔgɛ hom zo'ohogɔ la yele? Bii ba ta'an tɔgɛ hom de sakerɛ sera yele? 12Yɔɔ poan tɔgɔre hom nyalema la yele mɛ yoi? Bii ke'endoma tɔgɔra ho tontɔɔ bɔŋa la yele? 13Ge Na'ayenɛ, mam kaahere bɔ'ɔra la hom na te ho soŋɛ mam. Bolika woo mam sohoga wan paɛ ho nɛŋan na. 14Na'ayenɛ, bene te ho zagahɛ mam? Bene te ho ka bɔta te ho sure behɛ mam? 15Mam bilomen na, mam nyɛ pogoloŋɔ la bala, bɔna nyɔnpɔnhega poan. Mam namehɛ mɛ la dabeem, te n sea ta yehe n mɛŋa. 16Ho sunsunyiim la en piie mam keŋɛ. Ho dabeem yɛla la en sagom mam. 17Daarɛ woo ba kae mam la bala wo ko'om en uure na la. Yele ana wa libe mam mɛ zan'an. 18Ho bahɛ te n taaba, la sɛba n nɔŋɛ mam zan'an zagahɛ mam mɛ. Mam zɔ nya dela yɔɔ ma'an.

will be added

X\