Yooma 86

1Na'ayenɛ, kelehe n sohoga wa ge lerege mam. Se'ere n sɔe la, n boe la muguhego poan, ge dɛna naha. 2Gu' n vom wa, ge mam kaanbɛ n mɛŋa bo la hom. Hom n de mam Yenɛ, fan' ho yameŋa wa bahɛ ge mam dele la hom. 3N Daana, zɔ n ninbɔn'ɔn ge mam kele yi'ira la hom daarɛ woo. 4Bo' ho yameŋa wa nyeema, ge hom n Daana te mam dekɛ n suunre wa bo. 5N daana, hom dela sugurom dita, ge tara som. Ho perɛ mɛ la nɔŋerɛ kantɛ bɔ'ɔra sɛba woo n yi'ire ho. 6Na'ayenɛ, kelehe n sohoga wa. Kelehe mam kaahere ɛɛra ho zɔ n ninbɔn'ɔn wa. 7N daaŋɔ dabaherɛ, mam wan kaahɛ bo la hom. Ho me wan soŋɛ mam. 8N Daana bagarɛ ka boe wan dekɛ makɛ la hom, bii se'em tooma bɔna wan dekɛ makɛ la hom tooma wa. 9Teŋse'ehe woo te ho naam wa wan wa'an ho nɛŋan na na'ahɛ hom n daana wa, ge pɛngɛ ho yu'urɛ. 10Se'ere n sɔe la, ho kanregɛ mɛ, ge tona nyalema. Hom ma'an n de Yenɛ. 11Na'ayenɛ, pa'alɛ mam ho sore la, te n kena ho yelemɛŋɛrɛ la poan. Bo' mam suunre deyena te n tana zɔta ho yu'urɛ wa. 12Mam Daana la n Yenɛ wa, mam wan pɛngɛ hɔ la n suunre zan'an. Mam wan na'aha ho yu'urɛ soŋa la saŋa woo. 13Se'ere n sɔe la, ho tare la nɔŋerɛ kantɛ bɔ'ɔra mam. Hom fan' mam yɔɔ poan na bahɛ. 14Yenɛ, nɛre wuruba en zaberɛ la mam. Nɛre kooreba en eere ba ko mam. Ba dela nɛreba en ka zote hom. 15Ge hom n Daana wa dela ninbɔn'zɔta, la zo'ohogɔ Yenɛ, ka eta suunre tɔtɔ. Ho perɛ mɛ la nɔŋerɛ kantɛ la sakerɛ sera. 16Suunre behɛ mam na, ge zɔ n ninbɔn'ɔn. Bo' ho yameŋa wa ho paŋa, la ho fan' ho pɔsɔɔ bia wa bahɛ. 17Bo' mam hom som la danlehom, te n diŋdoma wa nyɛ te nyane di ba. Hom Na'ayenɛ n soŋɛ mam, ge bogolɛ mam suunre.

will be added

X\